102
Gumazim osɨmtɨzim ikia God ko mɨgei
1 O Ikiavɨra Itir God,
kɨ uabɨn akurvaghasa nɨn dei,
nɨ nan dɨmdiam barakigh.
2 Kɨ osɨmtɨzim ikɨtɨ,
nɨ nan modogh akɨrim ragh na gasan markɨ.
Kɨ nɨn dɨmamin dughiam,
nɨ zuamɨra na ikaragh nan akuragh!
3 Guizbangɨra, nan ikɨrɨmɨrim mɨgharimɨn mɨn dughiar otevimɨn ikegha ua ghugha gɨfa.
Ezɨ nan mɨkarzim mati avir ekiam nan isi moghɨn puvɨra nan fei.
4 Ezɨ nan navir averiam mati, me dadar mɨdiaribar mɨn,
na dɨkaragha na abɨrazɨ, kɨ iraghu.
Ezɨ kɨ bar osemegha daghebar aghuagha
damasa nɨghnɨzir puvatɨ.
5 Kɨ mɨzazim baragha pamten arai.
Ezɨ nan mɨkarzim ikuvizɨ, kɨ agharim gura.
6 Kɨ kuarazir bagabar mɨn gumazamiziba puvatɨzir danganimɨn uabɨra iti.
Egha kuarazir mɨghɨamɨn mɨn danganir kurar gumaziba ikian aghuazibar iti.
7 Kɨ mɨsiamɨn akuima, nan damazimning kuiaghirɨghavɨra iti.
Kɨ uabɨn apangkufi. Kɨ kuarazir dɨpenir siriabagh apiavtimɨn mɨn uabɨra iti.
8 Ezɨ dughiabar zurara, nan apaniba mɨgɨrɨgɨabagh amua na dɨpova na gasɨghasɨsi.
Egha me gumazamizir igharazibagh asɨghasɨghasa nan ziam dɨbora ghaze,
osɨmtɨzir kɨ inizibar mɨn me uaghan da iniam.
9-10 Nɨ adarir ekiam ko anɨngagharim nan iti,
egha nɨ na inigha mati gumazamiziba bizir mɨzɨrɨziba makurir danganimɨn da makuri moghɨn nɨ na makuni.
Kamaghɨn amizɨ, kɨ bar osemegha dagheba api moghɨn api moghɨn, avir sirim api
ezɨ nan damazimningɨn teriba dɨpamɨn mɨn itarim girima, kɨ anepi.
11 Nan ikɨrɨmɨrimɨn dughiam mati nedazim zuamɨra ghua guaratɨzimɨn gɨfa.
Ezɨ kɨ angamɨra itir ikɨrɨmɨrimɨn dughiam bar otefe.
Kɨ mati dadam aghua ghua mɨsigha gɨfa.
12 O Ikiavɨra Itir God, nɨrara gumazamizibagh ativagh men ganvɨra ikiam.
Eghtɨ gumazamizir gɨn otivamiba nɨn ziar ekiam gɨfogham.
13 Eghtɨ nɨ dɨkavigh izɨ Saionɨn nguibamɨn apangkuvigham.
Ezɨ datɨrɨghɨn dughiar apangkuvamim oto.
Nɨ datɨrɨghɨn an uabɨn torogh, egh an akurvagham.
14 Saionɨn nguibam ikufi.
Ezɨ nɨn ingangarir gumazamiziba bar a gifonge.
A datɨrɨghɨn ikuvigha mati nguazir mɨnemniamɨn otozɨ,
me bar an apangkufi.
15 Eghtɨ Kantrin Igharazibar Gumazamiziba, Ikiavɨra Itir Godɨn ziar ekiam ko gavgavimɨn atiating,
an apengan ikiam.
Eghtɨ nguazimɨn atriviba an gavgavim ko angazangarir gavgavimɨn atiatingam.
16 Ikiavɨra Itir God, gɨn ua Saionɨn nguibamɨn ingarigh,
egh uan gavgavim ko angazangarim sara gumazamizibar akagham.
17 Egh a uan gumazamizir fomɨra pura taghiziba, a men azangsɨziba baragham.
Egh men azangsɨzibar aghuaghan kogham.
18 Bizir Ikiavɨra Itir God amir kam, tav akɨnafarimɨn an osirigh,
eghtɨ en ovavir borir gɨn otivamiba a gɨfogh, egh uaghan an ziam fam.
19 Gumazir osiramin kam kamaghɨn osiram:
“Ikiavɨra Itir God uan Nguibamɨn ikia,
egha nguazir kamɨn vangɨnan gari.
20 A gara orazi,
kalabuziar gumazamiziba uan osɨmtɨziba aterava arai.
A gari, me marazi isa kotiam garɨgha egha ghaze, me arɨghregham.
God men akuraghasa ifonge,
eghtɨ me fɨrighregh, egh ovengan kogham.”
21-22 Kamaghɨn amizɨ, ikɨzir avɨribar gumazamiziba ko kantribar gumazamiziba Ikiavɨra Itir Godɨn ziam fɨsɨ,
uari akuvagh Saionɨn nguibamɨn ikɨva, an ziam pɨrafam.
Guizbangɨra, me Jerusalemɨn nguibamɨn ikɨva ziar ekiam a danɨngam.
23 Guizbangɨra, kɨ igiamra itima, God nan gavgavim gasɨghasɨki.
Egha na gamizɨ, nan ikɨrɨmɨrimɨn dughiam otefe.
24 Kamaghɨn, kɨ ghaze, O nan God, nɨ ikia mamaghɨra iti.
Kɨ igiamɨn ikiavɨra iti, kɨ ghurizir puvatɨ.
Nɨ datɨrɨghɨn na inigh mangan markɨ.
25 Nɨ bar faraghavɨra nguazir kamɨn ingari,
ezɨ a gavgavigha ikiavɨra iti.
Nɨ uan dafarimningɨn,
overiam ko bizir pɨn itibar ingari.
26 Overiam ko nguazim bar ikuvigh gɨvagham,
eghtɨ nɨ zurara ikiam.
Guizbangɨra, aning bar ikuvigham,
mati inim ghurigha bar bɨaghire.
Nɨ aning damightɨ aning gɨvagham,
mati gumazim korotiar ghurim suegha a makuni.
Eghtɨ aning bar gɨvagh
ua ikian kogham.
27 Ezɨ nɨ ikia kamaghɨra iti, egha gevir puvatɨ.
Eghtɨ nɨn azeniba gɨvaghan kogham.
28 E nɨn ingangarir gumazamiziba.
Nɨ deraghvɨra en boribar gantɨ,
me deraghvɨra ikiam.
Egh nɨ men ovavir borir gɨn otivamibar akuraghtɨ,
me deraghvɨra ikiam.