114
Godɨn gumazamiziba Isipɨn kantrin azenan izezir ighiam
1 Israelia me Jekopɨn ovavir boriba,
me Isipɨn kantri ategha azenan ize.
Kar akar igharazibav geir gumazamiziba, men kantri.
2 Dughiar kam, Judaba, Ikiavɨra Itir God baghavɨra itir gumazamizibar mɨn iti.
Guizbangɨra, Israelia God me gativagha men gari, ezɨ me an gumazamizibar mɨn iti.
3 Dughiar kam, Ongarir Aghevim Godɨn gavgavimɨn garava egha arav ghu.
Ezɨ Jordanɨn Fanem pura mɨtɨghav ikia ua ivemarir puvatɨ.
4 Ezɨ mɨghsɨar ekiaba memebar mɨn uari akuri.
Ezɨ mɨghsɨar muziariba sipsipɨn nguzibar mɨn uari akuri.
5 O Ongarim, nɨ manmaghsuava arav ghu?
O Jordanɨn Fanem, nɨ manmaghsua ua ivemari puvatɨ?
6 O mɨghsɨar ekiaba, ia manmaghsua memebar mɨn uari akuri?
O mɨghsɨar doziba ia manmaghsua sipsipɨn nguzibar mɨn uari akuri?
7 O nguazim, datɨrɨghɨn Ekiam a izɨ, nɨ nɨghɨva akong.
A Jekopɨn God a izegha gɨfa,
ezɨ nɨ an damazimɨn nɨghɨva akong.
8 Godɨn kam, a dagɨam gamizɨ, a mozir dɨpamɨn mɨn oto.
Guizbangɨra, a mɨghsɨar gavgavim gamizɨ,
a dɨpar nguazimɨn aven afora azenan izimɨn mɨn oto.