122
Me Jerusalemɨn nguibam gɨnɨghnɨgha ighiam gamua bar akonge
Devit ighiar kam osiri.
Godɨn Dɨpenimɨn ghuavanaga an ziam fer ighiam.
1 Kɨ orazi, me kamagh na mɨgɨa ghaze,
“Ia dɨkavigh e mangɨ Ikiavɨra Itir Godɨn Dɨpenimɨn mangam.”
Kɨ kamaghɨn oregha bar akonge.
2 E datɨrɨghɨn otivigha gɨvagha,
Jerusalemɨn nguibam avɨnizir dɨvazimɨn aven tuivighav iti.
3 Me Jerusalemɨn nguibamɨn ingarizɨ,
a gavgavigha ganganim datɨrɨghɨn bar dera.
4 God faragh Israelian anababav kemezɨ me iza kagh Ikiavɨra Itir God mɨnabazɨ moghɨn,
me datɨrɨghɨn izava ami.
5 Danganir kam, atrivim kotiaba barazir dɨpenim iti.
Kar Atrivim Devitɨn ovavir boriba kotiaba baragha
da tuisɨzir danganim.
6 Ia Jerusalem bagh Ikiavɨra Itir God ko mɨkɨm.
Eghtɨ a navir amɨrizim Jerusalemɨn iti darazir anightɨ,
me navir amɨrizimɨn ikɨva deragh ikiam.
7 Gumazamizir Jerusalemɨn dɨvazimɨn aven itiba deragh ikɨva,
ua mɨdorozim damuan kogham.
8 Kɨ uan adarazi ko, uan namakabagh nɨghnɨgha,
kamaghɨn Jerusalem mɨgɨa ghaze,
“Nɨ amɨragh nɨmɨra ikɨtɨ
mɨdoroziba nɨn aven otivan markɨ.”
9 Kɨ, Ikiavɨra Itir God, en God, an Dɨpenim gɨnɨghnɨsi.
Egha Jerusalem bar deraghvɨra ikiasa kɨ a bagha God ko mɨgei.