135
Godɨn ziam fer onger akam
Ia bar Ikiavɨra Itir Godɨn ziam fɨ!
Ia ziar ekiam a danɨng!
 
Ia Ikiavɨra Itir Godɨn ingangarir gumaziba,
ia an ziam fɨ.
Ia gumazir Ikiavɨra Itir Godɨn Dɨpenimɨn tuivighav itiba,
ia an ziam fɨ.
 
Ikiavɨra Itir God a bar dera,
kamaghɨn ia an ziam fɨ.
An apangkuvim bar en ekefe,
kamaghɨn ia an ziam fɨ ighiabar amu.
Ikiavɨra Itir God ua baghvɨra Jekop ginaba,
kamaghɨn Israelia kar bar Godɨn adarazira.
 
Kɨ kamaghɨn fo, Ikiavɨra Itir God gavgavir ekiam iti,
egha aseba bar dagh afira.
An overiam ko, nguazim ko, ongarim, ko ongarir konimɨn bizim damuasa,
an a gami.
Ana amozimɨn mɨgharir pɨzibagh ami, da nguazir oteviba bar dar zui,
ana onɨmaribagh ami, da taghtagha amozim sara izi.
An amɨnim gami, a dɨkava ivava danganiba bar dar zui.
 
+A Isipian otarir ivariaba ko,
men asɨzir apurir faragha otivizir avɨribav soghezɨ, da ariaghire.
+A Isipɨn atrivim ko, an ingangarir gumaziba, me damightɨ me foghasa,
a mirakelba ko dɨgavir kuram gamir arazibagh ami.
10 Ikiavɨra Itir God, kantrin avɨribagh asɨghasigha,
atrivir gavgavir avɨribav soghezɨ, me ariaghire.
11  +An atrivir gavgavir kabar maraziv soghezɨ me ariaghire,
Sihon Amorian atrivim, ko Ok a Basanian atrivim, ko Kenanian atriviba, bar moghɨra.
12 An Atrivir kabar nguaziba, isa uan gumazamiziba Israelia ganɨngi.
Eghtɨ da men nguazibara mɨn ikiam.
 
13 O, Ikiavɨra Itir God, gumazamiziba zurara kamagh nɨ mɨkɨm suam,
nɨ uabɨ guizbangɨra God.
Gumazamizir gɨn otivamin kaba me nɨ gɨfogham.
14 Ikiavɨra Itir God, uan gumazamizibar araziba tuisɨgh, egh suam,
me osɨmtɨziba puvatɨ.
Egh a uan ingangarir gumazibar kuarkuvam.
 
15  +E fo, Kantrin Igharazibar Gumazamiziba me silva ko golba isa,
uan dafaribara marvir guaba kɨri.
16 Marvir guar kaba, da akatoriba ikia egha mɨgeir puvatɨ.
Da damaziba ikia bizibar garir puvatɨ.
17 Da kuariba ikia, egha orazir puvatɨ.
Me ikɨrɨmɨrir e datɨrɨghɨn ikiava angamɨra itir kam puvatɨ.
18 Guizbangɨra, gumazir marvir guar kabar ingariba,
me uari marvir guar me ingarir kabar mɨn iti.
Gumazir nɨghnɨzir gavgavim marvir guabar itiba,
me uari dar mɨn iti.
 
19 Ia Israelia, ia Ikiavɨra Itir Godɨn ziam fɨ.
Ia Ikiavɨra Itir Godɨn ofa gamir gumaziba,
ia an ziam fɨ.
20 Ia Livain adarasi, ia Ikiavɨra Itir Godɨn ziam fɨ.
Ia gumazamizir Ikiavɨra Itir Godɨn atiatiba,
ia an ziam fɨ.
21 Saion, an ziar mam Jerusalem,
a Ikiavɨra Itir Godɨn nguibam.
Ia an itir gumazamiziba,
an ziam fɨ.
 
Aleluia!
Ia bar Ikiavɨra Itir Godɨn ziam fɨ.
+ 135:8 Ua Me Ini 12:29 + 135:9 Ua Me Ini 7:14--10:29 + 135:11 Dɨboboniba 21:21-35 + 135:15 Onger Akaba 115:4-8; Akar Mogomem 9:20