138
Gumazim God mɨnabi
Ighiar kam, Devit an osiri.
1 O Ikiavɨra Itir God,
kɨ uan navir averiamɨn aven bar nɨ mɨnaba.
Egha asebar damazibar,
kɨ ighiar nɨn ziam febagh ami.
2 Nɨ zurara bar na apangkuvigha bar deragha nan gari.
Nɨn akam ko nɨn ziam kamaghɨn en akagha ghaze,
nɨ bar ekevegha bizir igharaziba bar dagh afira.
Kamaghɨn, kɨ nɨn Dɨpenim uan guam a mɨsuegh,
teviba apɨrigh egh nɨn ziam fam.
3 Kɨ nɨn deima, nɨ dughiar kamɨn nan dɨmdiaba barasi.
Egha uan gavgavim na ganɨgavɨra iti.
4 Nɨ mɨgei, nguazir kamɨn atriviba uari nɨn akam baraki,
kamaghɨn me nɨn ziam fam.
5 Me nɨn ziar ekiam ko gavgavim gɨnɨghnɨgh,
nɨ amizir biziba bagh ighiabar amuam.
6 O Ikiavɨra Itir God, nɨ bar faraghavɨra ikia egha bar pɨn iti.
Gumazir uari abɨra nɨn apengan itiba,
nɨ me gɨnɨghnɨsi.
Egh gumazir uari feba,
me nɨn damazimɨn uari mongɨva avegham.
7 Osɨmtɨzir avɨriba na batifi,
ezɨ nɨ nan gari kɨ deragha iti.
Nan apaniba nan atari,
ezɨ nɨ me ko mɨsogha
uan gavgavimrama ua na ini.
8 Ikiavɨra Itir God, nɨ na ko dɨkɨrɨzir akamɨn gɨn mangɨ biziba bar dar amu.
Nɨ nan apangkuvigha ikia mamaghɨra iti.
Ingangarir nɨ damuasa nɨghnɨzim,
nɨ a damu bar anegɨfagh.