141
Gumazir mam dɨmangan God ko mɨgei
Devit onger akar kam osiri.
1 O Ikiavɨra Itir God, kɨ datɨrɨghɨn nɨn azangsɨsi,
nɨ zuamɨra nan akuragh.
Kɨ uabɨn akurvaghasa nɨ ko mɨgei,
nɨ nan azangsɨzim barakigh.
2 Kɨ guaratɨzibar ofa gami, nɨ mɨgharir mughuriar aghuim zuim barazi moghɨn,
kɨ nɨ ko mɨgeir mɨgɨrɨgɨaba, nɨ da baragh da iniasa kɨ ifonge.
3 O Ikiavɨra Itir God, nɨ deragh nan akatorimɨn gan,
egh kɨ mɨgeir mɨgɨrɨgɨaba nɨ ifongezɨ moghɨn kɨ me mɨkɨmam.
4 Nɨ na ateghtɨ nan navim arazir kuraba bagh dɨkavan markɨ.
Kɨ gumazir kuraba ko uari akuva arazir kuratam damuan kogham.
Nɨ na ateghtɨ,
kɨ me ko men isar kurabar ikian kogham.
5 Gumazir aghuim nan apangkuvigh, arazir aghuim damusɨ nan atar fofozim na danɨngtɨ,
kamaghɨn a dera.
Kamaghɨn, kɨ gumazir kuraba ko namakabar amuan kogham.
Kɨ zurara God ko mɨgɨa ghaze,
a men arazir kuraba uam ada ikarvagham.
6 Gumazitaba gumazir kurar kaba inigh me gasɨghasightɨ,
me fogh suam, nan akam a bar guizbangɨra.
7 Me gumazir kurar kabar aghariba inigh,
Gumazamizir Oveaghuezibar Nguibamɨn mozir torim mɨkɨnigham,
mati gumazim temer akuam abɨagharɨghizɨ
an muziariba tintinimɨn ire.
8 O Ekiam, nɨ Ikiavɨra Itir God,
kɨ nɨghnɨzir gavgavim nɨn ikiavɨra ikia,
egha nɨn aven modi.
Nɨ deravɨra nan gantɨ
kɨ ovengan kogham.
9 Nɨ deragh nan gantɨ,
gumazir kuraba na bagha modogha guizir azuazir katam na suiraghan kogham.
10 Nɨ gumazir kurabar amightɨ,
me uari uan azuazibar guighɨv ikɨ.
Eghtɨ kɨ puvatɨgham.
Kɨ bar deravɨra darutɨ,
bizitam na gasɨghasɨghan kogham.