144
God atrivimɨn apaniba abɨrazɨ, an a mɨnabi
Ighiar kam, Devit an osiri.
Ikiavɨra Itir God, nɨ dagɨar ekiamɨn mɨn itima
kɨ an aven modozɨ
nɨ deragha nan gari.
Kamaghɨn kɨ nɨn ziam fe.
A mɨdorozir arazibar nan aka.
A dagɨar ekiamɨn mɨn itima, kɨ an aven modi.
Egha dɨpenir gavgavimɨn mɨn itima, kɨ an aven iti.
Egha a nguibar gavgavimɨn mɨn ikia nan akurvasi.
Egha nan oramɨn mɨn itima,
kɨ an uabɨ apazagha deragha iti.
Kɨ nɨghnɨzir gavgavim an itima,
a na ko ikia nan akurvazi kɨ deravɨra iti.
A gumazamizir igharazibagh amizɨ me nan apengan iti.
 
+O Ikiavɨra Itir God, e gumazamizir kɨniba.
Manmagh amizɨ, nɨ e gɨnɨghnɨgha deragha en gari?
E pura bizir kɨnibar mɨn iti,
ezɨ nɨ manmaghsua mɨghɨgha e gɨnɨghnɨsi?
E mati gumazim, uan akatorimɨn dughiar vamɨran amɨnim givera.
E dughiar bar otevimra ikiam,
mati aruem isirazɨ nɨn nedazim dughiar otevimra ikegha
ua zuamɨra puvatɨ.
 
O Ikiavɨra Itir God, nɨ overiam abigh izighirɨ.
Egh uan agharim mɨghsɨabar amadaghtɨ
dar mɨturir ekiaba otiv.
Nɨ uan onɨmarim damightɨ a taghtagh,
apanibar agɨraghtɨ me tintinibar aregh.
Nɨ uan baribar me gasɨtɨ me aregh.
Nɨ uan dafarim amadaghtɨ a izighirɨ, na gekuightɨ
kɨ dɨpar konir kaba ategh uam anaboka.
Nɨ Kantrin Igharazibar Gumazamizibar dafariba da uam na inigh.
Gumazamizir kaba guizbangɨra mɨgeir puvatɨ,
me akar ifavaribagh ami.
Me ifara uari isa pɨn uari arɨgha ghaze,
me guizbangɨra mɨgei.
 
O God, kɨ nɨn ziam fɨ egh ighiar igiatam bangam.
Kɨ gita mɨsogh nɨ bagh onger akam damuam.
10 Nɨ atrivibar akurvazi
me mɨsogha uan apaniba abɨri.
Kɨ nɨn ingangarir gumazim Devit,
nɨ nan akuragha nan apaniba da uam na ini.
11 Nɨ nan apanir pazavɨra na gamibar dafaribar, nan akuragh ua na inigh.
Nɨ Kantrin Igharazibar Gumazamizibar dafariba da uam na inigh.
Gumazamizir kaba guizbangɨra mɨgeir puvatɨ, me akar ifavaribagh ami.
Me ifara uari isa pɨn uari arɨgha ghaze,
me guizbangɨra mɨgei.
 
12 E kamaghɨn ifonge, en otarir igiaba aghung mangɨ ekevegh,
temebar mɨn gavgavigham.
Eghtɨ en guivibar ganganiba bar deragham,
mati Atrivimɨn dɨpenir ekiamɨn aven itir dɨpenir akɨnibar itir nedazir bar aghuiba.
 
13 E uaghan kamaghɨn ifonge, en azenibar dagheba bar mɨghɨghvɨra otɨtɨ,
en dagher peniba izɨvagham.
Eghtɨ en sipsipba nguzir avɨriba batɨ,
mangɨ mamaghɨra ikiam.
14 En bulmakauba otɨ mamaghɨra ikiam.
Eghtɨ dar nguzitam ikuvighan kogh, egh tam aremeghan kogham.
E kamaghɨn aghua, e oraghtɨ
gumazitam o amizitam, osɨmtɨziba ater tuangɨva arangam.
 
15  +Gumazamizir God kamaghɨn deragha me gamiba,
me bar akongegh.
Gumazamizir Ikiavɨra Itir God inizɨ, a men Godɨn mɨn iti,
me bar akongegh.
+ 144:3 Jop 7:17-18; Onger Akaba 8:4 + 144:15 Onger Akaba 33:12