146
Ikiavɨra Itir God, men akurvazima, me an ziam fe
1 E bar Ikiavɨra Itir Godɨn ziam feka!
Kɨ uan navir averiamɨn aven uabɨra uabɨ mɨgɨa ghaze,
kɨ Ikiavɨra Itir Godɨn ziam fam!
2 Nan dughiar kɨ nguazimɨn ikiamimɨn, kɨ an ziam fam.
Kɨ ighiaba bangɨ an ziam fɨ kamaghɨra ikɨ,
mangɨ uan ovevem batogham.
3 Ia uarir akurvaghsɨ nguazir kamɨn atriviba ko, gumazir dapaniba, me gɨnɨghnɨghan markɨ.
Me pura gumazir kɨniba, me ian akuraghan kogham.
4 Me arɨmɨghiregh pura ua nguazim gavagh,
bizir me damuasa mɨkemeziba,
me dar amighan kogham.
5 Gumazitam nɨghnɨzir gavgavim Jekopɨn Godɨn ikɨ suam,
Ikiavɨra Itir God nan akuragham,
gumazir kam bar akongegh.
6 God, overiam ko nguazim, ko ongarimɨn ingarigha, dar itir biziba bar dar ingari.
God dughiabar zurara bizir a gun mɨkemegha gɨvazibar gɨn ghua dagh ami.
7 A gumazamizir gavgaviba puvatɨziba, deragha me gamizɨ, me dera.
A mɨtiriaba aziba, dagheba isa me ganɨdi.
A kalabuziar gumazamiziba fɨri,
me kalabus ataghɨragha azenibar izi.
8 A gumazamizir damazir okavrɨzibagh amima, me datɨrɨghɨn ua gari.
Gumazamizir, men apaniba me abɨniziba, a ua me fava gavgavim me ganɨdi.
Ikiavɨra Itir God, an damazimɨn derazɨ adarasi,
a bar me gifonge.
9 Kantrin Igharazibar Gumazamizir en nguazimɨn itiba, Ikiavɨra Itir God deragha men gari.
Amizir paba ariaghireziba ko, borir afeziaba ariaghireziba,
a me fava men akurvasi.
A gumazamizir arazir kurabagh amiba, a men tuaviba apaghapaki.
10 Ikiavɨra Itir God, Atrivimɨn ikɨ mamaghɨra ikiam.
Ia Saionɨn gumazamiziba,
ian God, a Atrivimɨn ikɨ, zurara ikɨvɨra ikiam.
Aleluia!
E bar Ikiavɨra Itir Godɨn ziam fam!