149
Godɨn gumazamiziba uan apaniba abɨragha, an ziam fe
1 Ia bar Ikiavɨra Itir Godɨn ziam fɨ!
Ia ighiar igiam, a bagh a bangɨ.
Ia gumazamizir a baghavɨra itiba,
ia an ziam fasa mɨsevezir dughiaba,
ia uari akuv ziar ekiam a danɨng.
2 Ia Israelia, God ian ingari,
ezɨ ia an bizir kam bagh bar akongegh.
Ia Saionɨn nguibamɨn gumazamiziba,
ia uan atrivim bagh bar akongegh.
3 Ia ighiabar amuva an ziam fɨva ighɨ.
Ia gitaba ko, tambarinbav sogh
an ziam fɨ.
4 Ikiavɨra Itir God uan gumazamizibagh ifonge.
Gumazir uari abɨra igharaz darazir apengan itiba, a men ziaba fava,
me gami me mɨdorozim gamua uan apaniba abɨri.
5 Godɨn gumazamiziba uan apaniba ko, mɨdorozim gamigha me abɨragha gɨfa.
Me datɨrɨghɨn bar akongegh.
Me dɨmagariba sara uari akuvir dughiabar,
me God bagh bar akongezir ighiabar amu.
6 Me pamtem dɨmɨva Godɨn ziam fɨ.
Me mɨdorozir sabar ghumtɨziba uan dafaribar da suikigh.
7 Egh kantrin igharaziba akɨrsɨ mɨsogh,
mɨzazim me gasɨ me abɨnigh.
8 Apanibar gumazir dapaniba ko atriviba,
me senɨn ainɨn ingarizibar me ikegham.
9 Me God osirizɨ moghɨra me damuam.
Godɨn gumazamiziba arazir kamnaghɨra damu, uan apaniba akɨram.
God baghavɨra itir gumazamizir kaba, arazir kamra damu,
uan apaniba abɨnigh ziar ekiam iniam.
Aleluia!
Ia bar Ikiavɨra Itir Godɨn ziam fɨ!