17
Arazir kuratam gamizir puvatɨzir gumazim, a God ko mɨgei
God ko mɨgeir mɨgɨrɨgɨar kam, Devit an osiri.
1 O Ikiavɨra Itir God, kɨ nɨn damazimɨn dera,
egha osɨmtɨzir me na garɨziba bagha nɨn dɨa ghaze,
nɨ na baragh nan akuragh.
Kɨ guizbangɨra nɨ ko mɨgei,
nɨ nan akuragh.
2 Guizɨn arazir gumazamiziba tuisɨzim, nɨ a gɨfo.
Kamaghɨn nɨ nan kotiamɨn nan akuragh.
3-4 Nɨ uabɨ nan navir averiam gɨfo.
Nɨ dɨmangan na bagha iza nan araziba tuisigha gɨfa,
egha nan arazir kuratamɨn apizir puvatɨ.
Gumazamizir igharaziba akar kurabav gei, ezɨ kɨ bar gavgavigha ghaze, kɨ akar kuratam mɨkɨman kogham.
Kɨ nɨn Akar Gavgavimɨn suiragha an gɨn gua,
adariba ko mɨdorozir arazibar gɨn zuir puvatɨ.
5 Dughiabar zurara nɨ nan akakazir tuavimra, kɨ an gɨn zui.
Kɨ tuavir kam ategha pura tintinibar zuir puvatɨ.
6 O God, kɨ fo, kɨ nɨ ko mɨgeir mɨgɨrɨgɨaba nɨ da barasi.
Kamaghɨn amizɨ, kɨ nɨn dia nɨ ko mɨgei.
Kɨ nɨ ko mɨgeir mɨgɨrɨgɨar kaba,
nɨ kuarim atɨgh da baragh.
7 Nɨ uan apangkuvir arazir kam azenara anekagh,
uan gavgavimɨn en akuragh.
Eghtɨ e nɨ ko ikɨ nɨn aven modoghtɨ,
apaniba e gasɨghasighan kogham.
8 Nɨ uabɨ uan damazir tuzim geghuva deragha an gari moghɨn,
nɨ na geghuv deragh nan ganam.
Mati tuarir amebam uan nguziba akumakua uan avɨzimningɨn apengan me modi moghɨn,
nɨ na avaragh na modogh.
9 Kamaghɨn gumazir kurar kaba na gasɨghasighan kogham.
Me datɨrɨghɨn bar nan apanim gamigha na okarigha gɨfa.
10 Me gumazamizir igharazibar apangkuvir nɨghnɨzitam tong bar men itir puvatɨ.
Me akaba akara egh uarira uan ziaba fe.
11 Me datɨrɨghɨn nan diariba pegha iza bar na okarigha gɨfa.
Me na abɨraghtɨ kɨ magɨrasa dafariba na gasegha gɨfa.
12 Me mati laion asɨzim mɨsueghtɨ an aremeghasa,
na bagha modogha mɨzua iti.
13 O Ikiavɨra Itir God, nɨ dɨkavigh izɨ.
Egh nan apanibav sogh bar me abɨnigh.
Nɨ uan mɨdorozir sabam inigh egh gumazir kurar kaba ko mɨsogh,
men dafaribar ua na inigh.
14 O Ikiavɨra Itir God, nɨ uan gavgavir ekiamɨn nan akuraghtɨ,
gumazir kaba nan ikɨrɨmɨrir kam agɨvaghan kogham.
Nguazir kamɨn bizir gumaziba uari bagha akuviba,
nɨ men dafaribar ua da inigh.
Kɨ fo, gumazamizir nɨ bar ifongeziba, nɨ men mɨtiriaba agefi.
Men boriba dagher avɨriba iti.
Ezɨ me uan ovavir borir gɨn otivamiba bagha bizir aghuiba arɨsi.
15 Eghtɨ kɨrara, kɨ gumazir nɨn damazimɨn derazim,
kɨ nɨn guamɨn ganam.
Kɨ dakuigh osegh dɨkavigh fogh suam,
nɨ na ko iti, egh kɨ bar akuegham.