29
Godɨn dɨmdiam, e amɨnim ko amozir ekiamɨn aven a barasi
Devit onger akar kam osiri.
1 Ia Godɨn Nguibamɨn itir enselɨn gavgaviba,
ia Ikiavɨra Itir Godɨn ziam fɨ.
Ia an gavgavim ko an ziar ekiam bagh bar akongegh.
2 Ia Ikiavɨra Itir Godɨn ziar ekiamɨn gun mɨkɨm.
Egh an damazimɨn zuegh ikɨ an ziam fɨ.
3 Ikiavɨra Itir Godɨn tiarim ongaribagh isɨn izima, da bar a barasi.
Godɨn Gavgavir Bar Ekiam Itim, araribar mɨn pamten dagarvasi.
An akam ongarimɨn danganiba bar dagh isɨn pamten dagarvagha da avara.
4 Ikiavɨra Itir Godɨn dagarvaziba gavgaviba dar iti.
A dagarvazima, gumazamiziba a baragha an atiatia an ziam fe.
5 Ikiavɨra Itir Godɨn dagarvazima,
an tiarim Lebanonɨn kantrin itir temer sidaba apɨragharɨsi.
6 A Lebanonɨn kantrin mɨghsɨabagh amizɨ,
da bulmakaun nguzibar mɨn uari ekura uanaga izaghiri.
A Hermonɨn Mɨghsɨam gamizɨ,
a bulmakaun apurir igiabar mɨn uari ekura uanaga izaghiri.
7 Ikiavɨra Itir Godɨn tiarim otiva
onɨmarim gamima a taghtasi.
8 Ikiavɨra Itir Godɨn tiarim,
a gumazamiziba puvatɨzir danganim gamima, a nɨghava agoi.
Guizbangɨra, a Kadesɨn gumazamiziba puvatɨzir danganim gamizɨ,
a puvɨra nɨghava agoi.
9 Ikiavɨra Itir Godɨn tiarim pamtem asɨzir atiabagh amima,
da agoa otamin dughiaba ataghɨragha puram oti.
Ezɨ ruarimɨn ter afarir angamtɨziba
purama asiaghira iri.
Ezɨ Godɨn Dɨpenimɨn aven itir gumazamiziba bar pamtem dɨa ghaze,
“God uabɨra gavgavim ko ziar ekiam iti!”
10 Ikiavɨra Itir God uan atrivir dabirabim gaperagha ongarir konibagh ativagha dar gari.
A en atrivimɨn ikia, egh mamaghɨra ikiam.
11 Ikiavɨra Itir God uan gumazamiziba gavgavim me ganɨga,
deragha me gamua dabirabir aghuim ko navir amɨrizim me ganɨdi!