37
God gumazamizir aghuiba deragh me damuva, gumazamizir kuraba pazɨ me damuam
Devit onger akar kam osiri.
+Nɨ gumazamizir kuraba amir araziba bagh nɨghnɨgh osɨman markɨ.
Egh me amir bizibar gan navim dɨkavan markɨ.
+Guizbangɨra, me graziba mɨdɨi moghɨn zuamɨra mɨsigham.
Egh ter afarir gariba imua mɨdɨi moghɨn,
zuamɨra mɨsigh puvarigham.
Nɨ nɨghnɨzir gavgavim Ikiavɨra Itir Godɨn ikɨ,
egh arazir aghuibar amu.
Egh nɨ nguazir kamɨn ikɨ deragh ikiam.
+Nɨ Ikiavɨra Itir God bagh bar akueghtɨ,
a bizir nɨn uan navir averiam ifongeziba nɨ danɨngam.
+Nɨ uabɨra uabɨ isɨ Ikiavɨra Itir God danigh,
egh nɨghnɨzir gavgavim an ikɨtɨ, a nɨn akuragham.
+A nɨn arazir aghuim damightɨ,
nɨn arazir aghuir kam,
aruem aruer arɨzimɨn isiragha gavgavizɨ moghɨn isiragham.
+Nɨ Ikiavɨra Itir Godɨn damazimɨn uabɨn asugh a mɨzuamtɨ,
a nɨn akuragham.
Gumazamizir taba uan nɨghnɨzibar gɨn mangɨ bizir aghuir avɨriba initɨ,
nɨ men gan navim dɨkavan markɨ.
Eghtɨ gumazamiziba arazir kurabar amutɨ,
nɨ dagh nɨghnɨgh osɨman markɨ.
+Nɨ atar egh osɨman markɨ.
Bizir kaba nɨ gekuightɨ nɨ arazir kuram damigham.
+Gumazamizir nɨghnɨzir gavgavim Ikiavɨra Itir Godɨn itiba,
me uan nguazimɨn ikɨ deraghvɨra ikiam.
Eghtɨ gumazamizir kuraba bar ikuvigham.
10  +Dughiar ruarim puvatɨghtɨ,
gumazamizir arazir kurabagh amiba pura puvarigham.
Nɨ men nguibabar me buriva
men apighan kogham.
11  +Gumazamizir uari abɨra aghumra itiba,
me deragh uan nguazim dapiagh
bizir avɨriba inigh bar akuegh ikiam.
12 Gumazamizir arazir kurabagh amiba,
me gumazamizir aghuibagh asɨghasɨghasava amua,
men atara atariba kuskusi.
13 Ekiam kamaghɨn fo,
gumazamizir kuraba gɨvaghamin dughiam a izi.
Kamaghɨn a men ingaravati.
14 Gumazir kuraba uan mɨdorozir sababa asia,
egha beniba uan pibagh afi.
Me gumazamizir onganarazibagh amiba ko, asaghasaziba ko, gumazamizir aghuibagh asasa.
15 Puvatɨgham.
Men mɨdorozir sababa raghɨregh merara mɨsueghtɨ me arɨmɨghiregham.
Eghtɨ men piba, bar moghɨra dɨpɨrighiregham.
16  +Gumazir aghuimɨn bizir muziarim,
a gumazamizir kurabar bizir avɨribagh afira.
17 E fo, Ikiavɨra Itir God gumazir kurabar gavgavim agɨvagham.
Egh a gumazamizir aghuiba deragh me geghuv men ganam.
18 Ikiavɨra Itir God gumazamizir an akamɨn gɨn zuiba,
a deravɨra me geghuva men gari.
Ezɨ nguazir me itim, a bar moghɨra men nguazimɨn mɨn ikɨ
mamaghɨra ikiam.
19 Me dughiar kurabar osɨmtɨziba bativan kogham.
Egh dagheba oteveghamin dughiamɨn, me dagheba oteveghan kogham,
me damɨ mamaghɨra ikiam.
20 Eghtɨ gumazamizir kuraba me bar ikuvigham.
Ikiavɨra Itir Godɨn apaniba, me graziba ko akɨmarir aghuibar mɨn bar iregham.
Me mɨgharimɨn mɨn dughiar otevimɨn ikɨ
mangɨgh bar puvarigham.
21 Gumazir kuram, a pura gumazibar biziba isa da ikarvazir puvatɨ.
Gumazir aghuim, arazir aghuibagh amua
pura biziba isa gumazir igharazibagh anɨdi.
22 Gumazamizir Ikiavɨra Itir God deragha amiba,
me nguazir kam inigh deraghvɨra an ikiam.
Eghtɨ Ikiavɨra Itir God asɨghasɨghamin gumazamiziba,
me puvarigham.
23  +Ikiavɨra Itir God ifongezɨ moghɨn, a gumazamiziba daruasa
me bagha tuavim atɨ.
A gumazitamɨn arazim bagh bar akongeghɨva,
an a geghuv gavgavim a danɨngtɨ, a tugh gavgavigham.
24 Ikiavɨra Itir God uan dafarimɨn gumazamizir kabar suiragh men akuraghtɨ,
me ua dɨkavigh tuivigham.
Kamaghɨn gumazamizir kaba irɨghsɨ damuamin dughiam,
me bar ireghan kogham.
25  +Kɨ uan igiamɨn ikia iza datɨrɨghɨn kɨ ghurigha gari,
God akɨrim ragha gumazir aghuitam gasarazir puvatɨ.
Kɨ uaghan garima,
men boriba dagheba puvarɨgha da bagh azangsɨghizir puvatɨ.
Bar puvatɨ.
26 Gumazamizir aghuiba zurara apangkuva biziba isa pura gumazamizibagh anɨdi.
Ezɨ God bizir bar aghuiba isa me ganɨdi moghɨn, a boriba isa me ganɨdima
me bar akonge.
 
27 Nɨ uan arazir kuraba akɨrim ragh dagh asaragh,
egh arazir aghuibara amu.
Egh nɨ zurara deravɨra nguazir kamɨn ikɨvɨra ikiam.
28  +Ikiavɨra Itir God, an arazir aghuibara ifonge.
Kamaghɨn, a uan gumazamiziba me ataghɨrazir puvatɨ.
A dughiabar zurara me geghuva arazir aghuibara me gami.
Egh a gumazir kurabar boribagh asɨghasɨgham.
29 Gumazamizir aghuiba, God me ganɨngizir nguazim inigh,
a dapiagh ikɨ mamaghɨra ikiam.
30 Gumazamizir aghuiba, mɨgɨrɨgɨar aghuibaram ami.
Men mɨgɨrɨgɨaba bar moghɨra nɨghnɨzir aghuiba ikia
guizɨn arazimɨn gumazamizibar akurvasi.
31  +Me uan Godɨn Akar Gavgavim isa
uan navir averiabagh atɨgha,
deragha arui.
32 Gumazir kuram gumazir aghuim mɨsueghtɨ an aremeghasa,
a bagha mɨzua gara iti.
33 Ikiavɨra Itir God gumazamizir aghuiba ataghɨrazima,
apaniba me mɨsozi me ariaghirir puvatɨ.
Gumazir kuram gumazir aghuim isɨ kot datɨghtɨ,
Ikiavɨra Itir God gumazir aghuim ateghtɨ,
gumazir kuram kotɨn aven a gafiragh anebɨraghan kogham.
34 Nɨ nɨghnɨzir gavgavim Ikiavɨra Itir Godɨn ikɨ a mɨzuamɨva an akabar gɨn mangɨ.
Nɨ kamaghɨn damutɨ a ziar ekiam isɨ nɨ danɨngam.
Eghtɨ nguazir a nɨ ganɨngizir kam nɨ a iniam.
Egh nɨ uabɨ gantɨ a nɨn apanibagh asɨghasigham.
 
35  +Kɨ gumazir kuramɨn garima, a gavgavir ekiam iti.
A Lebanon kantrin temer sidan mɨn ekevegha tughav ikia,
temer igharaziba bar dagh afira.
36 Kɨ gɨn uamategha zuima, gumazir kam ua itir puvatɨ.
Kɨ a bagha gara,
bar an apizir puvatɨ.
Bar puvatɨ.
37  +Gumazamizir Godɨn damazimɨn deraziba, me osɨmtɨzitam itir puvatɨ.
Nɨ men gan fogham.
Me navir amɨrizimɨn ikia deravɨram apiazɨ,
men ovavir boribar dabirabim deragha ikia mamaghɨra iti.
38 Gumazamizir kuraba me bar puvarigham.
Eghtɨ men ovavir boriba uaghan bar gevegham.
39 Ikiavɨra Itir God uabɨ, gumazamizir an damazimɨn derazibar akura.
Me osɨmtɨzibar aven ikiava, a baghavɨra ghua an aven modima,
a me geghuva deragha men gari.
40  +Ikiavɨra Itir God men akuragha ua me ini.
Me an boroghɨn ikia an aven modi.
Ezɨ a gumazamizir kurabar dafaribar uam me inizɨ,
me deraghavɨra iti.
+ 37:1 Onger Akaba 73:3; Aghuzir Akaba 23:17; 24:1; 24:19 + 37:2 Onger Akaba 90:5-6 + 37:4 Aisaia 58:14 + 37:5 Aghuzir Akaba 16:3; Matyu 6:25; Luk 12:22; 1 Pita 5:7 + 37:6 Jop 11:17; Maika 7:9 + 37:7 Onger Akaba 62:1; Aisaia 30:15; Jeremaia 12:1 + 37:8 Onger Akaba 73:3; Efesus 4:26 + 37:9 Jop 27:13-14; Aisaia 57:13 + 37:10 Jop 20:9; Hibru 10:36-37 + 37:11 Matyu 5:5 + 37:16 Aghuzir Akaba 15:16; 16:8; 1 Timoti 6:6 + 37:23 1 Samuel 2:9; Aghuzir Akaba 16:9 + 37:25 Onger Akaba 37:28; 59:15; 109:10 + 37:28 Onger Akaba 11:7; Aghuzir Akaba 2:22; Aisaia 14:20 + 37:31 Godɨn Araziba 6:6; Onger Akaba 40:8; 119:98; Aisaia 51:7 + 37:35 Jop 5:3 + 37:37 Aisaia 32:17; 57:2 + 37:40 1 Eghaghaniba 5:20; Aisaia 31:5; Daniel 3:17; 3:28; 6:23