43
Gumazim uan nguibam ategha saghon itir kantrin ikia God ko mɨgei
1 O God, gumazamizir akɨrim ragha nɨ gasiba na abɨnasa.
Nɨ nan akuragh gavgavim isɨ nan akabar anɨng, egh na bagh mɨkɨmtɨ
me kamaghɨn fogham, kɨ arazir kuratam gamizir puvatɨ.
Nɨ gumazir ifara arazir kurabagh amibar dafaribar nan akuragh ua na inigh.
2 O God, kɨ nɨ baghavɨra zuima nɨ na modi.
Nɨ manmaghsua nan aghuagha na batoke?
Manmaghsua nan apaniba na abɨrazɨ,
nan navim osemegha kamaghɨra iti?
3 Nɨ uan guizɨn akam amadagh uan angazangarim akaghtɨ,
aning tuavim nan akagh uam na inigh Saionɨn Mɨghsɨar nɨ ua bagha inabazimɨn,
Dɨpenir nɨ uabɨ itimɨn mangam.
4 O God, nɨ nan God, nɨrara nan navim gamima
a derazɨ kɨ bar akonge.
Kɨ nɨn ofa gamir dakozimɨn mangɨ,
egh uan gita mɨsogh nɨn ziar ekiam fam.
5 Kɨ uan navir averiamɨn aven uabɨra uabɨn azangsɨgha ghaze, kɨ tizim bagha bar oseme?
Kɨ osɨman kogham.
Kamaghɨn deragham, kɨ ua nɨghnɨzir gavgavim Godɨn ikɨva, uam an ziam fam.
A nan God, a nan Akurvazir Gumazim.