49
Gumazim dagɨaba ko bizir avɨribara nɨghnɨsi, a gumazir onganim
Kar Koran adarazir onger akam.
Kar onger akabar faragha zuir gumazimɨn onger akam.
1 Ia bar moghɨra bizir kam baragh.
Ia nguazir kamɨn itir gumazamiziba, ia bar kuariba arigh deragh nan akam baragh.
2 Ia gumazir ziaba itiba ko ziaba puvatɨziba,
dagɨaba itir gumazamiziba, ko dagɨaba puvatɨziba, ia akar kam deragh a baragh.
3 Nan navir averiam nɨghnɨzir aghuir mam an dɨkafi.
Kɨ nɨghnɨzir aghuir kam mɨkɨmtɨ a fofozir aghuim ia danɨngam.
4 Kɨ faragh aghuzir akar tabav kemegh,
gita mɨsogh aghuzir akar kamɨn mɨngarim bangɨ ia mɨkɨmam.
5 Gumazir kuraba na ekɨaruzɨ, kɨ dughiar kurabar ikia,
egha dughiar kurar kabar atiatir puvatɨ.
6 Gumazir bizir avɨriba itir kaba,
me uan bizibagh nɨghnɨgha uari uan ziaba fa mɨgɨrɨgɨabagh ami.
Ezɨ kɨ men atiatir puvatɨ.
7 E fo, gumazitam uabɨ uan mɨkarzim givezeghan kogham.
Egh a uabɨ uan ikɨrɨmɨrim givesɨ dagɨatam God danɨngan kogham. Bar puvatɨ.
8-9 Guizbangɨra, gumazimɨn ikɨrɨmɨrim givezamin ivezim, a bar pɨn ko.
Gumazim angamɨra ikɨsɨ dagɨaba God danightɨ,
God aneteghtɨ an angamɨra dughiar ruarimɨn ikeghan kogham.
Bar puvatɨgham.
10 E fofozir gumazamizibar garima, me uaghan ariaghiri.
Ezɨ gumazamizir kuraba ko gumazamizir onganiba, me uaghan ariaghiri.
Gumazamizir kaba bar uan dagɨaba ko bizir aghuiba ateghtɨ,
gumazamizir igharaziba da iniam.
11 Gumazamizir kaba faragha uari nguaziba iti.
Datɨrɨghɨn matmatiaba men nguibar me zurara ikiamibar mɨn ikiam.
12 Gumazimɨn ziar ekiam, an ovengamin tuavim apɨrighan kogham.
Puvatɨ. E bar asɨzibar mɨrarama arɨmighiram.
13 Arazir kamnang, a gumazamizir uarira uarigh nɨghnɨgha bizir avɨriba itiba bativam.
Gumazamizir kamaghɨn amiba me nɨghnɨzir aghuiba puvatɨ,
me bizir isir kaba bagh bar akuegh,
uaghan kamaghɨram ovengam.
(Ighiam gamua an suiam
atugha avughsegha ua
ighiam gami.)
14 God me amɨsevegha ghaze, me sipsipbar mɨn arɨghirɨ,
Gumazamizir Oveaghuezibar Nguibamɨn mangam.
Eghtɨ ovevem me geghuv men garir gumazimɨn mɨn ikiam.
Me uan dɨpenir aghuiba ateghtɨ, men mɨkarziba bar kurighɨreghtɨ, me Gumazamizir Oveaghuezibar Nguibamɨn ikiam.
Eghtɨ amɨmzaraghan, gumazamizir aghuiba gumazamizir kabagh ativagh men ganam.
15 Eghtɨ God nan akuragh ua nan ikɨrɨmɨrim givezeghtɨ,
Gumazamizir Oveaghuezibar Nguibamɨn gavgavim ua nan suighan kogham.
A ua bagh ua na iniam.
(Ighiam gamua an suiam
atugha avughsegha ua
ighiam gami.)
16 Gumazitam dagɨar avɨriba inigh egh dɨpenir ekiatamɨn ingarigh ua bagh bizir bar aghuiba a darightɨ,
nɨ bizir kam gɨnɨghnɨgh osɨman markɨ.
17 Nɨ fogha gɨfa, a gɨn aremegh bizir katam sara mangɨghan kogham.
An bizir aghuir kaba, a ko Gumazamizir Oveaghuezibar Nguibamɨn mangɨghan kogham.
18 An angamɨra itir dughiam, a bizir kabar gara da bagha bar akonge.
Egha bizir avɨriba iniasa bar pamten ingarima,
gumaziba a mɨgɨa ghaze,
“A gumazir bar aghuim.”
19 An aremegh uan inazir afeziaba ko,
nguibar uam aruer angazangarimɨn garir puvatɨzimɨn ikiam.
20 Gumazimɨn ziar ekiam, an ovengamin tuavim apɨrighan kogham.
Puvatɨ. E bar asɨzibar mɨrarama arɨghiram.