51
Gumazim uan arazir kuraba gɨn amangasa God ko mɨgei
Devit onger akar kam osiri.
A gumazir onger akabar faragha zuim gɨnɨghnɨgha an osiri.
Devit Batseba ko arazir kuram gamizɨ, Godɨn akam inigha izir gumazim Natan, iza akam a gasara. Ezɨ Devit uan arazir kuram gɨnɨghnɨgha ighiar kam osiri.
1 O God, nɨ uan apangkuvir arazimɨn gɨn mangɨ,
egh nan apangkufigh.
Nɨ apangkuvir ekiar kam nan ikɨ,
egh nan arazir kuraba batokegh.
2 Gumazamiziba rua ua zue moghɨn,
nɨ na rueghtɨ nan arazir kuraba mangɨghtɨ
kɨ zueka.
3 Kɨ fo, kɨ arazir kuram gamigha gɨfa.
Egha arazir kurar kɨ amizir kam,
kɨ a gɨnɨghnɨghavɨra iti.
4 Kɨ bar nɨrara, nɨn damazimɨn arazir kuram gami.
Nɨ uan arazir aghuimɨn gɨn ghua na isa kot gatɨgha,
nan arazir kuraba bagha ivezir kuram na ganɨngi.
5 Kɨ uan amebamɨn navir averiamɨn aven ikiavɨra itima,
arazir kuraba nan iti.
Arazir kurar kaba nan mɨkarzimɨn ikiavɨra itima
nan amebam na bate.
6 Kɨ fo, nɨ kamaghɨn ifonge, kɨ uan nɨghnɨzimɨn aven nɨn guizɨn akamɨn gɨn mangam.
Kamaghɨn, nɨ uan nɨghnɨzir aghuim isɨ
nan navir averiam datɨgh.
7 Nɨ hisopɨn ter aguar muziaritam inigh a isɨ dɨpam darugh,
egh nan mɨkarzimɨn a kavamadaghtɨ, kɨ nɨn damazimɨn zueka.
Egh na rueghtɨ kɨ bar zuegh nir ghurghurimɨn mɨn bar ghurghurika.
8 Bar guizbangɨra, nɨ bar na dɨkabɨragha egha nan arazir kuraba ikaragha gɨfa.
Datɨrɨghɨn nan navir averiam deraghtɨ kɨ bar akuegham.
9 Nɨ nan arazir kuraba ua dar ganan markɨ.
Nɨ da batuegh ua adagh nɨghnɨghan markɨ.
10 O God, nɨ nan navir averiam damightɨ a zuegh ua igiamɨn otogh.
Eghtɨ nɨn ifongiar aghuim nan aven izɨtɨ kɨ nɨrara ganam.
11 Nɨn Duam nan aven iti,
ezɨ nɨ uabɨn boroghɨn na batuegh, na da uan duam inian markɨ.
12 Nɨ faraghavɨra ua na inizɨ kɨ nɨ bagha bar akonge.
Nɨ datɨrɨghɨn bar akongezir arazir kam na danɨngigh.
Kɨ nɨn akabar gɨn mangamin ifongiar kam, nɨ ua na danɨngigh.
13 Eghtɨ kɨ gumazir arazir kurabagh amiba nɨn akamɨn me mɨkɨmam,
eghtɨ me nɨ bagh izam.
14 O God, nɨ nan Akurvazir Gumazim,
kamaghɨn nɨ nan akuraghtɨ, kɨ uan arazir kurar kam bagh ovengan kogham.
Kamaghɨn amizɨ, nɨ nan akurazir bizir kam bagh,
kɨ pamten ighiabar amuam.
15 O Ekiam, nɨ nan akuraghtɨ,
kɨ deragh eghaghanibagh fogh nɨn ziam fam.
16 Kɨ fo, nɨ kamaghɨn aghua, kɨ asɨzim inigh izɨ nɨ bagh an ofa damuam.
Kɨ ofa damusɨ asɨzim mɨsuegh a tuaghtɨ, a bar isi mɨghɨran nɨ aghua.
17 O God, nɨ kamaghɨn ifonge, kɨ ofan mɨn bar uabɨ abɨragh bar nɨn apengan ikiam.
Gumazamizir uari abɨra navibagh iziba,
nɨ akɨrim ragha me gasir puvatɨ.
18 O God, nɨ uan ifongiamɨn gɨn mangɨ Saionɨn gumazamizibar akuragh,
egh Jerusalemɨn nguibamɨn dɨvaziba uam adar ingarightɨ da tuifigh.
19 Dughiar kamɨn me ofan aghuir nɨn damazimɨn deraziba ko, asɨzim tuaghtɨ a bar isi mɨghɨrighamin ofa,
me da isɨ nɨ danɨngam.
Me uan bulmakaun apuriba inigh nɨn ofa gamir dakozimɨn izɨ
nɨ bagh dar ofa damuam.