63
Gumazim God ko ikiasa a ko mɨgei
Devit ghua Judan Distrighɨn aven itir gumazamiziba puvatɨzir danganimɨn ikia, ighiar kam osiri.
+O God, nɨ nan God, kɨ nɨn ganasa
nɨ baghavɨra mɨzua iti.
Kɨ mati, dɨpaba puvatɨzir danganimɨn ikia
dɨpam bagha ariaghiri moghɨn,
nan duam nɨ ko ikiasa ifongezɨ,
kɨ bar uabɨ isa nɨ ganɨngi.
 
Kɨ nɨn Dɨpenimɨn aven nɨn ganasa ifonge,
nɨ uan gavgavim ko ziar ekiam nan akaghasa kɨ ifonge.
Nguazir kamɨn ikɨrɨmɨrim a dera,
ezɨ nɨn apangkuvir arazim a gafiragha bar moghɨra dera.
Kamaghɨn, kɨ nɨn ziam fe.
Kɨ angamɨra ikɨvɨra ikɨ,
nɨ mɨnabɨva nɨn ziam fɨvɨra ikiam.
Kɨ uan dafariba fegh ghuanabogh nɨ ko mɨkɨmam.
Nan duam bar deraghavɨra ikia mati,
gumazim dagher aghuiba amegha bar ikɨri.
Kamaghɨn, kɨ bar akuegha nɨn ziam fa ighiabagh ami.
 
6-7  +Nɨ dughiabar zurara nan akurvasi.
Ezɨ kɨ dɨmagaribar uan mɨsiam girɨghav ikia nɨrara nɨghnɨsi.
Kɨ tuarir nguzim uan amebamɨn avɨzimɨn apengan iti moghɨn,
kɨ bar nɨn boroghɨn ikia,
bar akuegha ighiabagh ami.
+Nan duam nɨ ko poroghav iti,
ezɨ nɨn agharim deragha na avara.
 
Gumazir na mɨsueghtɨ kɨ aremeghasava amiba,
me Gumazamizir Oveaghuezibar Nguibamɨn mangam.
10 Me mɨdorozim damu an aven oveghtɨ,
afiar atiaba men mɨkarzibar amam.
 
11  +Eghtɨ Atrivim God bagh bar akuegham.
Gumazir Godɨn ziam dɨbora a koma akam akɨriziba, me an gɨn mangɨ bar akuegham.
Gumazir ifariba, God men akabar kumightɨ me mɨkɨman kogham.
+ 63:1 1 Samuel 23:14; Onger Akaba 42:2; 84:2; 143:6 + 63:6-7 Onger Akaba 42:8; 61:4; 119:55; 149:5 + 63:8 Aisaia 26:9 + 63:11 Godɨn Araziba 6:13; Aisaia 45:23