8
Godɨn ziar ekiam ko gumazibar ziar aghuim
Devit onger akar kam osiri.
Gumazir onger akar kamɨn faragha zuim gumazibav kemezɨ, me Getɨn nguibamɨn ingarizir gita inigha a gikararai.
1 O Ikiavɨra Itir God, nɨ en Ekiam.
Nguazir kamɨn nguibaba bar dar gumazamiziba,
nɨn gavgavimɨn gara ziar ekiam nɨ ganɨdi.
Ezɨ nɨn ziar ekiam bar overiam gizɨfa.
2 Borir bar iririviba uaghan nɨn ziam fe.
Nɨn apaniba ko, nɨn akam batozir darazi nɨ men tuavim apɨrasa,
dɨvazir bar gavgavim atɨ.
3 Kɨ kogha pɨn overiar nɨ uan dafarimɨn ingarizimɨn gara,
egha uaghan iakɨnim ko mɨkovezir uan danganir nɨ me arɨghɨzibar gari,
4 kɨ kamaghɨn nɨghnɨgha ghaze,
e gumazamiziba ti manmaghɨram amizir biziba, ezɨ nɨ mɨghɨgha e gɨnɨghnɨsi?
E pura biziba.
Manmaghɨram amizɨ, nɨ bar puvɨrama e gɨnɨghnɨsi?
5 Nɨ uabɨ en ingarigha, e isa uabɨn apengan e atɨ.
Nɨ gavgavim ko ziar ekiam isa e ganɨga e afazɨ,
bizir nɨ ingariziba bar en apengan iti.
6 Bizir nɨ ingarizir kaba bar,
nɨ dagh ativagh dar ganasa e amɨsefe.
Biziba bar moghɨra nɨ da isa
e gumazamiziba en suemningɨn apengan da arɨki.
7-8 Bizir kaba bar moghɨra:
Sipsipba, bulmakauba, asɨzir ruarimɨn itiba ko,
overiamɨn itir kuaraziba,
ongarimɨn osiriba ko ongarimɨn aven aruir biziba,
da bar en apengan iti.
9 O Ikiavɨra Itir God, nɨ en God.
Nguazir kamɨn nguibaba bar dar gumazamiziba,
nɨn gavgavimɨn gara ziar ekiam nɨ ganɨdi.