84
Gumazim Godɨn Dɨpenim bar a gifonge
Kar Koran adarazir onger akam.
Gumazir onger akar kamɨn faragha zuim gumazibav kemezɨ, me Getɨn nguibamɨn ingarizir gita inigha a gikararai.
1 O Ikiavɨra Itir Godɨn Gavgaviba Bar Itim.
Nɨn dɨpenim a bar moghɨra dera.
2 Nan navir averiamɨn, kɨ nɨn dɨpenimɨn, dughiabar zurara gumaziba uari akuvi naghɨn aven ikiasa.
Nan ifongiam kamakɨn, kɨ bar nɨn Dɨpenim gifonge.
Nɨ Godɨn angamɨra itim.
Kɨ uan mɨkarzim ko nɨghnɨzim sara, nɨ bagh bar akuegh, ighiabar amuam.
3 O Ikiavɨra Itir Godɨn Gavgaviba Bar Itim.
Nɨ nan God ko nan atrivim.
Kuarazir muziariba nɨn ofa gamir dakozimɨn boroghɨra uari bagha mɨkonibar ingara,
ota uan nguzibar gari.
4 Nɨn Dɨpenimɨn aven itir darasi,
men naviba deragha bar akonge,
me zurara nɨn ziam fava ighiaba bati.
(Ighiam gamua an suiam
atugha avughsegha ua
ighiam gami.)
5 Gumazamizir nɨn gavgavim iniasava amiba,
nɨ bagha Saionɨn Mɨghsɨamɨn mangasa ifongeziba,
me bar akongegh.
6 Me dɨpar atuir dɨpaba puvatɨzibar zui.
Danganir kamɨn ziam Temeriba Itir Danganir Zarim.
Me mozir dɨpaba danganir kamɨn dagh amizɨ da otifi.
Mɨzarazibar amoziba izima mozir dɨpar kaba izefi.
7 Me tuavimɨn ghua nɨn gavgavim isa ghuavɨra ikia gavgafi.
Me mangɨ Saionɨn Mɨghsɨamɨn otivigh Godɨn gantɨ a ikiam.
Godɨn kam, a godba bar dar pɨn iti.
8 O Ikiavɨra Itir Godɨn Gavgaviba Bar Itim,
nɨ Jekopɨn God.
Nɨ nan azangsɨzim barakigh.
(Ighiam gamua an suiam
atugha avughsegha ua
ighiam gami.)
9 O God, nɨ en atrivimɨn gan deragh a damu.
A uabɨ oramɨn mɨn e moga deravɨra e geghufi.
Nɨ uabɨ ua bagha a ginabazɨ, an atrivimɨn iti.
Nɨ deravɨram a damu.
10 Kɨ aruer vamɨran nɨn dɨpenimɨn gumaziba uari akuvi naghɨn iti, a bar dera.
Aruer kam, a 1,000plan aruer kɨ nguibar igharazimɨn itibagh afira.
Kɨ uan Godɨn Dɨpenimɨn tiar akamɨn tughɨv ikiasa bar akonge.
Kɨ gumazir kurabar dɨpenibar ikian aghua.
11 Ikiavɨra Itir Godɨn Gavgavim, an aruemɨn mɨn tuavim en akakagha, oramɨn mɨn e modi.
A en apangkuva egha ziar ekiam e ganɨdi.
A gumazir an damazimɨn deraziba,
a uan bizir aghuiba men anogorozir puvatɨ.
12 O Ikiavɨra Itir Godɨn Gavgaviba Bar Itim,
gumazamizir nɨghnɨzir gavgavim nɨn itiba,
me zurara bar akuegham.