98
God gumazamiziba bar men Atrivim
Kar Godɨn ziam fer onger akam.
1 Ia onger akar igiatam Ikiavɨra Itir God bagh, a bangɨ.
A uan agharimɨn bizir aghuir igharagha garibagh ami.
A uan gavgavir ekiamɨn amodoghɨn,
mɨdorozir kam gamua apaniba abɨra.
2 Ikiavɨra Itir God, apaniba ko mɨsogha
me abɨrazir bizimɨn gun mɨkeme,
a uan akurvazir arazim isa
gumazamizibar akazɨ me bar an gari.
3 A Israelian apangkuvigha
men akuraghasa dɨkɨrɨzir akar kam gɨnɨghnɨghavɨra ikia,
me ataghizir puvatɨ.
Kantribar gumazamiziba Godɨn gari,
an apaniba ko mɨsogha me abɨragha, uam e ini.
4 Nguazimɨn gumazamiziba, ia Ikiavɨra Itir God bagh bar akongezir ighiabar amu.
Ia onger akaba pamten dar amuva bar akuegh an ziam fɨ.
5 Ia gitabav sogh, Ikiavɨra Itir God bagh ighiabar amu.
Ia boabav soghtɨ, dar arareba bar deragh.
6 Ia sɨghaba ko itabagh iviva,
pamten dɨmɨva Ikiavɨra Itir Godɨn ziam fɨ,
a en atrivim.
7 Nɨ ongarim, nɨ ko nɨn itir osiriba, ko bizir nɨn aven itiba,
ia bar pamten dɨm mɨkɨm.
Nɨ nguazim, nɨ ko nɨn itir gumazamiziba ko bizir nɨn itiba,
ia bar onger akabar amu.
8 Ia faner ekiaba, ia dafaribav sogh.
Ia mɨghsɨaba, ia ighiabar amuva bar akongegh.
9 Ikiavɨra Itir God izɨ nguazim gativagh an ganam.
An atrivimɨn ikɨ, guizɨn arazimɨn gumazamizibar araziba tuisɨgham.
Kamaghɨn amizɨ, ia a bagh bar akuegh onger akabar amu.