15
E Kraisɨn nɨghnɨzim ko arazimɨn gɨn mangam
1 E gumazamizir nɨghnɨzir gavgavim itiba, gumazamizir gavgaviba puvatɨziba, men osɨmtɨziba ater men akurvagham. E uarira uarir akurvaghsɨ nɨghnɨghan kogham.
2 E bar vaghvagh uan adarazi bagh pamten ingar men akurvagham. E kamaghsua, men nɨghnɨzir gavgavim gavgavigh ikɨvɨra ikiam, kamaghɨn e men akurvagham.
3 E fo, Krais uabɨ uabɨn akurvaghasa nɨghnɨzir puvatɨ. Godɨn Akɨnafarimɨn arazir a batozimɨn osizirim kamakɨn, “Akar kurar gumazamiziba nɨ gasiba, da uaghan na gire.”
4 Godɨn mɨgɨrɨgɨar me fomɨra Godɨn Akɨnafarimɨn osiriziba, da bar en sure damuasa me ada osiri. Mɨgɨrɨgɨar kam e damutɨ, e nɨmɨra ikɨ, osɨmtɨziba aterɨva tugh gavgavigh God e danɨngamin bizir aghuiba bagh mɨzuamam.
5 Datɨrɨghɨn kɨ ia bagha God ko mɨgɨa ghaze, God uabɨ e gamima, e nɨmɨra ikia osɨmtɨziba atera tugha gavgafi. Egh a ia damutɨ, ia Krais Iesus amizir arazibar gɨn mangɨ, egh tuavir kamɨn ia igharaz darazi ko navir vamɨra ikiam.
6 Kamaghɨn amizɨ kɨ ia bagh Godɨn azangsɨghtɨ, ia navir vamɨra ikɨva bar moghɨra uari inigh Godɨn ziam fam, an en Ekiam Krais Iesusɨn Afeziam.
Krais, Judaba ko Kantrin Igharazibar Gumazamiziba uaghan, bar men akura
7 Kamaghɨn amizɨ, gumazamiziba Godɨn ziam fɨsɨ, ia Kraisɨn adarazi ia uarira uari inigh bar akongegh. Krais ia inigha aven izezɨ moghɨn, ia igharaz darazi inigh aven izɨ bar akongegh.
8 Kɨ ia mɨgei, Krais Judabar ingangarir gumazimɨn oto. An arazir kam kamaghɨn aka, God mɨkemezir akaba da bar guizbangɨra. Da kamakɨn, God en ovaviba ko amizir akar dɨkɨrɨziba, da guizbangɨra otivigham.
9 Krais uaghan kamaghsua, a Kantrin Igharazibar Gumazamizibar amightɨ, me Godɨn apangkuvim bagh an ziam fam. Godɨn Akɨnafarim bizir kam kamaghɨn a mɨgei:
“Kamaghɨn amizɨ, kɨ Kantrin Igharazibar Gumazamizibar tongɨn ikɨva nɨ mɨnamam.
Egh kɨ nɨn ziam fɨva ighiabar amuam.”
10 Egha Godɨn Akɨnafarim mɨgɨrɨgɨar igharazim uaghan iti:
“Ia Kantrin Igharazibar Gumazamiziba,
ia Godɨn gumazamiziba Israelia,
ia me ko ikɨ bar akongegh.”
11 Ezɨ mɨgɨrɨgɨar mam uaghan kamaghɨn mɨgei:
“Ia Kantrin Igharazibar Gumazamiziba bar,
ia Ekiamɨn ziam fɨ!
Egh nguazimɨn itir anababa,
ia bar an ighiabar amu!”
12 Ezɨ Aisaia uaghan kamaghɨn mɨkeme:
“Atrivir igiam, Jesin ovavir boribar tongɨn otogh,
mati temer ghuzir igiam, temer dakar kamɨn oto.
God gumazir kam amɨseveghtɨ,
an atrivimɨn otogh izɨva
Kantrin Igharazibar Gumazamizibar ganam.
Egh a me damutɨ,
me bizir aghuir a me danɨngamiba bagh mɨzuam ikiam.”
13 Kɨ ia bagha God ko mɨgei, Godra, a ian akuraghtɨ, ia bizir aghuir gɨn izamiba bagh mɨzuamam. God kamaghsua, an Duamɨn gavgavimɨn, a ia damutɨ, ian arazir gɨn izamin bizir aghuiba bagha mɨzuaim, an aghung mangɨ bar ekevegham. Kamaghɨn amizɨ, God ian nɨghnɨzir gavgavir an itimɨn tuavimɨn, a ia damutɨ, navir amɨrizim ko bar akongezir arazim, bar ia gizɨvagham.
Pol uabɨ uan ingangarim geghara, uan akam isa
uan namakaba bagha anemadi
(Sapta 15:14--16:27)
Pol uan ingangarim bagha bar akonge
14 Nan adarasi, kɨ uan navimɨn aven kɨ nɨghnɨzir gavgavim ikia kamaghɨn fo, ia zurara arazir aghuibagh ami. Egha fofozir guar avɨriba iti. Kamaghɨn ia vaghvagh nɨghnɨzir aghuiba uarira uari danɨngam.
15-16 Ezɨ kɨ akɨnafarir kamɨn aven akar mabagh nɨghnigha, kamaghɨn ian nɨghnɨziba dɨkavasa ia bagha mong akar gavgaviba osiri. Kɨ fo, God nan apangkuvigha na mɨsevezɨ, kɨ Krais Iesusɨn ingangarir gumazimɨn ikiava, Kantrin Igharazibar Gumazamiziba bagha ingari. God kamaghɨn ifonge, Kantrin Igharazibar Gumazamiziba, me ofan mɨn ikɨ a damutɨ a me bagh bar akongegham. Eghtɨ Godɨn Duam me damightɨ, me God baghvɨra ikiam. Kamaghɨn amizɨ, nan ingangarim kamaghɨn iti, kɨ ofa gamir gumazimɨn mɨn ingara Godɨn Akar Aghuim me mɨkɨri.
17 Kɨ Krais Iesus ko porogha ingangarim gami, kamaghɨn amizɨ ingangarir kɨ God bagha amir kam, kɨ a bagha bar akonge.
18-19 Kɨ bizir igharazibar gun mɨkɨman kogham, bizir vamɨran kam kɨ an gun mɨkɨmasa: Kɨ Krais ko ingarima Krais na bagha tuaviba arɨzima, kɨ Kantrin Igharazibar Gumazamiziba an gɨn mangasa men sure gami. A nan aven ingarima, mɨgɨrɨgɨar kɨ me mɨgeiba ko arazir kɨ amiziba, ko mirakelɨn gavgaviba ko arazarazir kɨ amiziba, me dar garima da me gamima me Godɨn gɨn zui. Bizir otozir kaba, Godɨn Duamɨn gavgavimɨn kɨ a dagh amima da otifi. Kamaghɨn amizɨ, kɨ Jerusalemɨn ikegha Kraisɨn Akar Aghuim bar anekura ghua Ilirikumɨn Provinsɨn oto.
20 Nan ifongiam kamakɨn: kɨ Kraisɨn Akar Aghuim danganir gumaziba oraghizir puvatɨzibar anekunasa bar ifonge. Kɨ kamaghɨn aghua, me suam, Pol gumazir igharazim kunizir dɨpenir akɨnibagh isɨn dɨpenimɨn ingari.
21 Godɨn Akɨnafarim mɨkemezɨ moghɨn kɨ damuasa:
“Gumazamizir an eghaghaniba faragha da baraghizir puvatɨziba,
datɨrɨghɨn da baragham.
Gumazamizir faragha an mɨgɨrɨgɨaba baraghizir puvatɨziba,
datɨrɨghɨn dagh fogham.”
Pol Romɨn itir Kraisɨn adarazir ganigh, Spenɨn Kantrin mangam
22 Dughiar avɨriba, kɨ ia bagha izasava amima, ingangarir kam nan suirazɨ, kamaghɨn kɨ izezir puvatɨ.
23 Egha datɨrɨghɨn kɨ nguibar kabar ingangariba puvatɨ. Kɨ azenir avɨribar ian ganasa ifonge,
24 kamaghɨn amizɨ, kɨ datɨrɨghɨn izasa. Kɨ ghaze, kɨ kagh dɨkavigh Spenɨn Kantrin mangɨsɨ mangɨ, Spenɨn darorim ategh ia ko tong ikeghɨva, gɨn Spenɨn mangam. Kɨ ian gan, egh tong ia ko ikɨsɨ bar akuegham. Eghtɨ ia tuavimɨn ivezim nan akuraghtɨ, kɨ Spenɨn mangam.
25 Kɨ datɨrɨghɨn Godɨn adarazi bagh akurvazitam inigh Jerusalem Nguibar Ekiamɨn mangam.
26 Ia fo, Jerusalemɨn itir Godɨn adarasi, men tongɨn itir gumazamizir maba biziba bar puvatɨ. Kamaghɨn amizɨ, Masedonia ko Akaian Provinsɨn itir siosba me bagha dagɨaba arɨghasa bar ifuegha akam mɨsoke.
27 Me uan ifongiamra an gɨn ghua kamaghɨn ami. Kar guizbangɨra, Kantrin Igharazibar Gumazamiziba, me Israelɨn gumazamizir onganarazibar akurvaghamin ingangarim iti. Guizbangɨra, Israelia fomɨra Godɨn bizir aghuir avɨriba isa Kantrin Igharazibar Gumazamizibagh anigha men duabar akura. Kamaghɨn amizɨ, Kantrin Igharazibar Gumazamiziba ikarvaghamin bizim iti, me nguazir kamɨn bizir aghuiba isɨ Israelia danɨngɨva me ikarvagham.
28 Kɨ faragh dagɨar kaba bar a da inigh Jerusalemɨn mangamin ingangarim agɨvaghɨva, gɨn Spenɨn mangɨsɨ izɨ ian ganigh, mangam.
29 Kɨ fo, kɨ izɨ ia bativamin dughiam, Krais bizir aghuir bar avɨribar en tongɨn dar amuam.
30 Nan adarasi, en nɨghnɨzir gavgavir Ekiam Krais Iesusɨn itim ko, Godɨn Duam e ganɨdir igharaz darazigh ifongezir arazim, kɨ bizir kamning gɨnɨghnɨgha kamaghɨn ia gakaghori, ia na ko porogh pamtem God ko mɨkɨm na bagh an azangsɨgh.
31 Egh kamaghɨn mɨkɨm, Judian itir nɨghnɨzir gavgavim puvatɨziba na gasɨghasighan kogham. Eghtɨ Jerusalemɨn itir Kraisɨn adarazi nan ingangarir kɨ me bagha amim bagh bar akuegham.
32 Kamaghɨn God ifueghtɨma, kɨ ia bagh izɨsɨ nan navir averiam bar akuegham. Egh ia ko avughsɨ ua uan gavgavim inisɨ, egh bar akuegham.
33 Kɨ kamaghɨn Godɨn azai, Godɨn navir amɨrizim ko dabirabir aghuim anɨdim, bar moghɨra ia ko ikɨ. Guizbangɨra.