22
Devit Ikiavɨra Itir God bagha
ighiam bange
(Onger Akaba 18)
1 Dughiar kamɨn, Ikiavɨra Itir God, Devitɨn apanim Sol ko apanir igharaziba da uam a ini. Ezɨ a bizir kam gɨnɨghnɨgha Ikiavɨra Itir God bagha ighiar kam bange.
2 Ighiar kamɨn mɨgɨrɨgɨaba kamakɨn:
Ikiavɨra Itir God, a nan dɨvazir bar gavgavimɨn mɨn iti.
A nan dagɨar kɨ an aven uabɨ modimɨn mɨn ikia,
nan akuragha nan apaniba da ua na ini.
Nan God, a dagɨar ekiamɨn mɨn iti,
ezɨ kɨ uan apanibar ara ghua an modi.
A nan oramɨn mɨn ikia na avara,
ezɨ kɨ an uabɨ modi.
A nan akuragh deragh nan ganamin gavgavim iti,
egha nan dɨvazir bar gavgavimɨn mɨn iti.
3 Nan God mati dagɨar ekiam,
ezɨ kɨ an ghuava an uan apanibar modi.
A nan oramɨn mɨn ikia na avara,
ezɨ kɨ an uabɨ modi.
A ua na isir gavgavim ikia
egha na geghufi.
Kɨ an deima, an nan akurazɨma,
apaniba na gasɨghasɨghizir puvatɨ.
A nan akuragh deragh nan ganamin gavgavim iti,
egha nan dɨvazir bar gavgavimɨn mɨn iti.
O Ikiavɨra Itir God, nɨ nan Akurvazir Gumazim.
Kɨ an deima, a nan akurazɨma, apaniba na gasɨghasɨghizir puvatɨ.
4 E Ikiavɨra Itir Godɨn ziam feka!
Kɨ an deima, a nan akurazɨma,
apaniba na gasɨghasɨghizir puvatɨ.
5 Guizbangɨra, kɨ atam areme.
Ovevem benir gavgavimɨn mɨn na ikiagharigha gɨfa,
mati ongarim dɨkava dɨpɨraghira, na avasava ami.
6 Ovevem bar na inizɨ, kɨ Gumazamizir Oveaghuezibar Nguibamɨn magɨrasava ami.
Mati me nan suighasa azuazim agurazɨ, a nan suighasa iti.
7 Kɨ osɨmtɨzir ekiamɨn ikia, egha pamten Ikiavɨra Itir Godɨn dei.
Kɨ uabɨn akurvaghasa uan Godɨn arai.
Ezɨ a uan Dɨpenimɨn ikia nan ararem barazima,
an an kuarir torim giraghu.
8 Kamaghɨn amizɨ, a nan apanibar atari.
Egha mɨkɨmkɨzim gamizɨ an otogha,
overiabagh inobaghnobasi.
9 Ikiavɨra Itir God, mɨgharim an atinimɨn otivaghiri,
ezɨ avim an akamɨn otivaghira bizir avɨribar isi.
Egha mɨzariaba ira tintinibar zui.
10 God overiam kuigha izaghiri,
ezɨ mɨgharir pɨziba an dagarimningɨn apengan iti.
11 A iza mati, a enselɨn bar gavgavim gaperazɨ, an a inigha izi.
Mati amɨnim avɨzimning ikia,
God inigha bar atamra izi.
12 An amɨnirbɨrim gamizɨ an anevara.
Mati a purirpenimɨn aven modoghav iti,
amozimɨn mɨturir pɨziba anevara.
13 A ghuariar pɨzibagh amizɨ, an angazangarim bar da avarazɨ,
onɨmarim ghuariar pɨzir kam abɨgha azenim giri.
14 Ikiavɨra Itir God uan Nguibamɨn ikia, tiarim akara pamten dagarvasi.
Godɨn Bar Pɨn Itim uan akam akara pamtem mɨgei.
15 An onɨmaribagh amizɨ, da mati an barir aviba
an apanibagh asavamadi, ezɨ me tintinibar ara zui.
16 O Ikiavɨra Itir God, nɨ men atarir adarir kam,
mati amɨnir ekiam nɨn atinimɨn otogha me gɨva me munamadi.
Nɨn adarir kam ongarim gamizɨ, a bar mɨsɨngi,
ezɨ bizir nguazir mɨngarimɨn suiraziba, bar azenim gire.
17 Ikiavɨra Itir God pɨn ikia, uan agharim amadazɨ, a izaghira nan suiragha ua na gekui.
An ongarir bar konimɨn uam na inigha azenim gatɨ.
18 Dughiar kamɨn nan apaniba bar gavgavigha na abɨnasava ami.
Ezɨ Ikiavɨra Itir God, men dafariba da ua na ini.
19 Kɨ dughiar kuramɨn itima, nan apaniba iza na ko mɨsosi.
Ezɨ Ikiavɨra Itir God, na geghuva nan gari.
20 A deravɨra nan gara nan akurazɨ, kɨ danganir aghuimɨn ikia deravɨra iti.
A bar guizbangɨra na gifonge, egha kamaghɨn a ua na ini.
21 Kɨ arazir aghuimɨn gɨn zui.
Ezɨ bizir kam bagha, Ikiavɨra Itir God bizir bar aghuir avɨribar na gami.
Kɨ Godɨn damazimɨn zue,
ezɨ a ivezir aghuim isa na ganɨdi.
22 Ikiavɨra Itir God, a nan God.
Kɨ akɨrim ragha a gasarazir puvatɨ.
Kɨ guizbangɨra an Akar Gavgavibar gɨn zui.
23 Kɨ zurara bizir God damuasa e mɨkemezibagh nɨghnɨsi.
Egha kɨ an arazir a ifongeziba batoghezir puvatɨ.
24 A fo, kɨ an damazimɨn osɨmtɨziba puvatɨ.
Kɨ guizbangɨra arazir kurabar uabɨra uabɨ geghuva ua bagha gari.
25 Kɨ Ikiavɨra Itir Godɨn damazimɨn zuegha iti.
Kamaghɨn amizɨ a nan arazir aghuir kamɨn ganigha,
a ikaragha arazir aghuimɨn na gami.
26 Ikiavɨra Itir God, gumazir nɨ ataghɨrazir puvatɨzim,
nɨ uaghan an ataghɨrazir puvatɨ.
Gumazir nɨn damazimɨn derazim,
nɨ uaghan arazir aghuim an akakasi.
27 Gumazir nɨn damazimɨn zuezir arazibagh amim,
nɨ uaghan uan arazir zueziba an akakasi.
Eghtɨ gumazir arazir kuramɨn gɨn zuim,
nɨ uaghan arazir kuramɨn a ikarvasi.
28 Gumazamizir uari abɨriba, nɨ men akurvasi.
Gumazamizir uari pɨrafiba, nɨ me abɨri.
29 O Ikiavɨra Itir God, nɨ angazangarim na ganɨdi.
Egha mɨtarmem na dama a batosi.
30 Nɨn gavgavimɨn, kɨ uan apanibav sogham.
Kɨ uan Godɨn akurvazimɨn, apanibar dɨvazim ikiavkɨnigh me abɨragham.
31 Godra, an araziba da bar guizbangɨra egha bar aghungi.
A bizitam damusɨ akam akɨrigh, egh an a damuam.
An oramɨn mɨn iti,
eghtɨ gumazitam a bagh izɨ an aven modogh nɨghnɨzir gavgavim an ikɨ, deraghvɨra ikiam.
32 Ikiavɨra Itir God, a bar uabɨra guizbangɨra God.
A bar uabɨra dagɨar ekiamɨn mɨn ikia e apasa.
33 Godra nan daroribar na akumakui,
egha gavgavim na ganɨga deragha nan garima, kɨ zui.
34 A nan suemning gamizɨ, kɨ asɨzir atiabar mɨn,
mɨghsɨabar pɨn mar deravɨram arui.
35 A mɨdorozir arazibar nan sure gamizɨ,
nan agharimning barir pir me ainɨn ingarizim,
gekuamin gavgavim iti.
36 O God, nɨ uan oram na ganɨngizɨma, kɨ an gɨrakɨrangɨn modozɨ, nɨ nan apanibar dafaribar ua na ini.
Nɨ uan gavgavimɨn nan akura.
Nɨ nan dɨmdiam baregha nan akurazɨ, kɨ gumazamizibar damazimɨn ziar ekiam iti.
37 Nɨ bar tuavir aghuim na ganɨngizɨ, kɨ an ghua,
apɨghsigha irɨzir puvatɨ.
38 Kɨ uan apanibar agɨntɨghavɨra ikia ghua,
men suiragha me gasɨghasɨgha bar me agɨfa.
39 Kɨ me gasezɨ, me kuabara ira,
nan dagarimningɨn apengara ira ua dɨkavasava amuava avenge.
40 Nɨrara, mɨdorozim damuasa gavgavim na ganɨngi,
ezɨ kɨ me mɨsogha me abɨnizɨ, me nan dagarimningɨn apengan iti.
41 Nɨ nan apanibagh amizɨ,
me akɨribagh ighegha, na gasegha uam are.
Gumazir na gifongezir puvatɨziba, kɨ bar me gasɨghasɨki.
42 Gumazir kaba, uarir akurvaghasa diava arai, ezɨ men akurvaghamin gumaziba puvatɨ.
Me Ikiavɨra Itir Godɨn diava arai, ezɨ a men dɨmdiaba barazir puvatɨ.
43 Kɨ bar me gasɨghasɨghizɨ,
me mati amɨnim nguazir mɨnemeniam giveragha ghu.
Kɨ me dɨkabɨra me abɨni,
mati kɨ tuavimɨn
nguazir beghneaziba dɨka zui.
44 Nɨ gumazir na gasɨghasɨzibar dafarimɨn uam nan akura.
Nɨ na gamizɨ, kɨ Kantrin Igharazibar Gumazamizibar dapanimɨn oto.
Gumazamizir kɨ fozir puvatɨziba, nɨ men kantriba na ganɨngizɨ, kɨ dagh ativagha men gari.
45 Kantrin Igharazibar Gumazamiziba kamaghɨn na baregha zuamɨra iza,
nan guamɨn uan teviba apɨra nan akam barasi.
46 Men gavgaviba bar gɨvazɨ, me nɨrɨzim ko agorogem sara na bagha izi.
47 Ikiavɨra Itir God, a zurara ikia mamaghɨra iti.
A dagɨar ekiamɨn mɨn na modozɨ kɨ an apazangɨn itima a na geghufi,
kamaghɨn amizɨ, kɨ ziar ekiam a danɨngam.
God nan akurvazimɨn ikia ua na inizɨ,
kamaghɨn, kɨ an ziam fam.
48 Nan apaniba na gamizir arazir kuraba, Godra ua da ikarvasi.
A Kantrin Igharazibar Gumazamiziba isa nan apengan me atɨ.
49 A nan apaniba da ua na ini.
Bar guizbangɨra, Ikiavɨra Itir God,
nɨ nan apanibar damazibar ziar ekiam na ganɨngi.
Nɨ nan akurazɨ, mɨdorozir gumaziba na mɨsoghezɨ kɨ aremezir puvatɨ.
50 Kamaghɨn amizɨ, Ikiavɨra Itir God,
kɨ Kantrin Igharazibar Gumazamizibar tongɨn ikɨ nɨn ziam fɨ, onger akar nɨn ziam feba bangam.
51 Kɨ Devit, Ikiavɨra Itir God atrivimɨn ikiasa na ginabagha na mɨsefe.
A nan akurvazima, kɨ uan apanibav sogha me abɨri.
A zurara nan apangkuva mamaghɨra iti.
A nan gɨn otivamin ovavir boriba, a kamaghɨra me damu mangɨvɨra ikiam.