10
God uan gumazamiziba ua me iniasa akam akɨri
1 Dagheba aghungamin dughiamɨn, ia amozim bagh Ikiavɨra Itir Godɨn azangsɨgh.
Ikiavɨra Itir God overiar pɨzim ko, ghuariam akuvima, amozim izi,
ezɨ dagheba ko, biziba aghui.
2 Gumazamiziba, me gɨn otivamin bizibagh foghasa, aseba ko kukunir gumazibar azangsɨsi.
Ezɨ me ifavarir akabar me gami.
Gumazir maba irebabar mɨngaribar gun mɨgei, me uaghan ia gifari.
Me ghaze ia navir amɨrizim iniam, ezɨ puvatɨ, ian navir osɨmtɨzim ikɨvɨra ikiam.
Gumazamiziba mati sipsipba tintiniba arua ovegha gɨfa.
Me geghuvir gumaziba puvatɨzɨ, kamaghɨn amizɨ me osɨmtɨziba ateri.
3 Ezɨ Ikiavɨra Itir God kamaghɨn mɨgei,
“Kantrin Igharazibar Gumazamizibar gumazir dapanir nan gumazamiziba gativaziba,
nan navim men atara me bagha nan isi.
Kɨ ivezir kuram me danɨngam.
Judan gumazamiziba, me nan gumazamizibara.
Kɨ Ikiavɨra Itir Godɨn Gavgaviba Bar Itim, kɨ deraghvɨra men ganam,
mati sipsipbagh eghuvir gumazim uan sipsipbar gari.
Egh kɨ Judan anababa bar dar amutɨ,
me mɨdorozir hoziar bar gavgavimɨn mɨn ikiam.
4 Eghtɨ Judan anababar tongɨn, gumazir dapanir gavgavir maba otivam,
egh me mati dɨpenim aterir dagɨaba ko,
dɨpenim aterir guariba ko,
mɨdorozir barir pibar mɨn ikiam.
5 Me mɨdorozir gumazir gavgavibar mɨn uari inigh, uan apaniba abɨntɨ,
mati mɨdorozir gumaziba nguibar ekiamɨn zuir tuavimɨn uan apaniba, nguazir beghneazibar me dɨkabɨri.
Kɨ Ikiavɨra Itir God me ko ikiam.
Kamaghɨn amizɨ, me bar pamtemɨn mɨsogh mangɨ,
hoziabagh apiazir mɨdorozir gumazibav sogh me abɨnigham.
6 “Kɨ Judan gumazamizibar amightɨ, me bar gavgavigham.
Egh kɨ Israelian gumazamiziba ua me iniam.
Kɨ men apangkufi,
kamaghɨn amizɨ, kɨ bar me inigh uamategh men nguazimra izam.
Eghtɨ me deravɨra ikiam, mati kɨ me batoghezir puvatɨ.
Kɨ Ikiavɨra Itir God, kɨ men God,
kamaghɨn amizɨ, kɨ men mɨgɨrɨgɨar me na mɨgeiba kɨ da baragham.
7 Israelian gumazamiziba me mɨdorozir gumazir gavgavibar mɨn otivigh
bar akuegham,
me mati gumaziba wainɨn dɨpaba ame.
Eghtɨ men ovavir boriba gɨn otivigh,
kɨ Ikiavɨra Itir God, me gamizir bizir aghuir kabagh nɨghnɨgh
bar akuegham.
8 “Kɨ uan gumazamiziba bar men dɨmɨva,
me akumakum me inigh izam.
Kɨ ua me inigh me damutɨ,
me fomɨra ikezɨ moghɨn bar avɨrasemegham.
9 Kɨ guizbangɨra me batuegha me aghamsɨki,
ezɨ me pura tintinibar kantrin igharazibar iti.
Egh me nguibar saghuiabar ikɨva,
me na gɨnɨghnɨghvɨra ikiam.
Ikɨzir kaba uan boriba ko, me ikɨvɨra ikɨva,
bar moghɨra uari akuvagh, uamategh
uan nguazimra izam.
10 Nan gumazamizir Isip ko, Asirian kantrin itiba,
kɨ ua me inigh izɨtɨma,
me uan nguazimra dapiagham.
Kɨ nguazimɨn mɨtaghniam gɨsɨvaghtɨma,
me Gileatɨn Distrik ko, Lebanonɨn nguazim sara iniam.
Eghtɨ gumazamiziba nguazir kam bar a gizɨvagham.
11 Kɨ me inightɨ me uamategh uan nguibamɨn izam,
eghtɨ Isipia ko, Asiriaba ongarir ekiamɨn mɨn men tuavim apɨrightɨ, kɨ me abɨnigham.
Kamaghɨra, kɨ Isipian gavgavim agɨvagh,
egh uaghan Nailɨn Fanem damightɨ a mɨsigham.
Eghtɨ Asirian gavgavim uaghan gɨvagham.
12 Kɨ uan gumazamizibar amightɨ me gavgavigham.
Eghtɨ me nan apengan ikɨ nan ziam fɨva, nan akabar gɨn mangam.
Kɨ Ikiavɨra Itir God, kɨ mɨkemegha gɨfa.”