9
9:1-29 Pulu Yili-ni Yunu Piliipa ‘Teambu.’ Nilimú Mele Telemú Ung Te
9:1-5 Poll-ni Isrel-Yambuma Kamele Buni Kolupa Kondu Kulurum Ung Te
1 Na Krais-nga yambu te moliáliinga ung sikale niker. Gólu naa tokur. Numanale-ni piliipu kene, Mini Kake Tiliele-ni nanga numanuna ‘Sika nikinu.’ nikem na piliikerko.
2-3 Nanga angmene, anda-kolepalima-ni na kene wasie kalku liiring Isrel-yambu akuma, ⸤enini telemeláliinga Pulu Yili-ni enini tepa kis-simba, kolea-kísina molku kis-siku mindi pungéliinga piliipu kene,⸥ ‘Nanga numanuna aima kondu kolupu taki-taki mundu-mong buni kolupu mindili aima nombu moliu.’ ⸤akili sika niker⸥. Akiliinga ‘Wendu liambu.’ nimbu na-ni ‘Nanga Isrel-yambuma tepu liambu.’ nimbu Pulu Yili-ni ‘Enini molku kis-singí kupulanum-na naa pangi.’ nimba na Poll ‘Krais-kene wasie molumbulú kupulanum puliuna naa pambu.’ nimba pipi sipa, ‘Eninga alko topu molupu kis-simbu kupulanum-na pambu, enini nanga alko toku molku kunjingí kupulanum-na pangi.’ nimbá kupulanum te lelkanje na-ni Pulu Yili-ndu “Aku-sikunu ni.” nilka, akiliinga-pe aku-sipa nimbá kupulanum te naa lelemú.
4 Uinga Pulu Yili-ni Isrel-yambuma makó topa ‘nanga kangambulama molangi.’ nimba tepa liirim ulele kene
Pulu Yili-nga talang puliele kene tondulu puli-sele kene,
ung anju-yandu nimba panjipa mi lirim ungma kene,
Moses-ni ung-mani sirim ung-manima kene,
Pulu Yili popu toku kape ningí kupulanumele kene,
‘Enini-kene i-sipu i-sipu tembu.’ nimba, nimba panjurum ungma kepe,
ima pali eninga.
5 Kumbi-lepa anda-kolepa yi-aulima Isrel-yambuma eningako.
Pulu Yili-ni ‘Enini molupa konjumba yi te liipu mundumbu.’ nimba makó turum yi-nuim Kraisele mana-yi molumbandu anda-kolepalima-ni yandupa kalku liiring yambu te-ni yi-nuim Kraisele yu mirim kilia yunu eninga talapena suku mulurumko.
Yu mélema pali nokupa molemú Pulu Yili.
Yu taki-taki kape nimbu enembu naa kolupu bi paka tunjamili.
Aku-sipa tipili.
6 ⸤Anda-kolepa yi⸥ Isrele-ni kalupa liirim yambu nanga anginipili mare pulele Pulu Yili liiku bulu silimeláliinga sika Isrel-yambuma naa molemeláliinga ⸤na enini kanupu kondu telemáliinga-pe⸥ aku-sipu nikerale ‘Pulu Yili-ni Isrel-yambuma-kene “Tembu.” nimba, nimba panjurum ungele kamu mania pumu.’ nimbu naa niker. ⸤Pulu Yili-ni “Tembu.” nimba, nimba panjurum ung akili Isrel-yambu sikamanga ungele⸥ akiliinga yunga ungele sika kamu mania naa pumu. We pelemú.
7 “Eprayam-ni kalupa liirim yambuma pali Pulu Yili-nga kangambulama molemele.” kapula naa-ko nimulú. Ui Pulu Yili-ni Eprayam-ndu aku-sipa nimba kene nimba mele:
“Aisak-ni kalupa liimba yambuma mindi bi leku
‘Eprayam-ni kalupa liirim yambuma.’ ningí.”
nirim. Ui-Pulu-Pulu 21:12
8 Ung akiliinga pulele i-sipa mele: “Oliu Eprayam-ni kalupa liirim-ma Pulu Yili-nga kangambulama molemulu.” kapula naa ningí. Pulu Yili-ni Eprayam-ndu ‘Yambuma-kene tembu.’ nimba, nimba panjurum ungele ⸤‘Sika’ niku tondulu munduku piliilimili yambuma mindi⸥ Pulu Yili-ni ‘Eprayam-nga kangambulama.’ nimba kanolemú.
9 Pulu Yili-ni “Tembu.” nimba, nimba panjurum ungele i-sipa mele: “Ena ‘wendu ombá.’ nikerale wendu ombá kene kelepu yandu ombú kene ⸤nunga emena⸥ Sera-ni kang te memba.” nirim.
10 Akili mindi mólu. Ulu te wasieko i-sipa mele: ⸤Eprayam-nga málu Aisak-nga min⸥ Repeka-ni mirim kangselenga lapa tiluele mindi, akili oliunga anda-kolepa Aisak kanili.
11-12 Akili sika akiliinga-pe kang olu-pakilem-sele ui naa mipili, ui ulu kis kaíma naa piliikulu teangli kepe Pulu Yili-ni Repeka-ndu nimba mele: “Kang komale-ni kang akelealiinga kongun kendemande tenjimba.” nirim. Pulu Yili-ni yunu taki-taki piliipa ‘wendu upili.’ nimba makó tolemú mele piliipa kene aku nirim. Kangsele-ni ulu tiringli mele kanupa naa apurupa, yunu yunga numanale-ni mindi piliipa makó topa kene aku-sipa nirim.
13 Aku-sipa Pulu Yili-nga bukna ung te molemú, akili
i-sipa mele:
‘⸤Pulu Yili-ni nimba mele:⸥
“Jekop numanu monjupu ⸤‘Nanga yili mulupili.’ niliu⸥
akiliinga-pe Iso kanupu kis piliipu
⸤‘Tiluna naa molambili.’⸥ niliu.” nirim.’ Mellekai 1:2-3
nimba bukna molemú.
14 Pulu Yili-ni aku-sipa tirim ulelenga oliu-ni nambulka nimulúye? “Pulu Yili-ni aku-sipa tirim mele lawa tepa, tepa kis-sirim.” nimulúye? Akili aima kapula mólu. Yu-ni tepa kis naa sirim.
15 Ulu akiliinga Pulu Yili-ni Moses-ndu nimba mele:
“Nani nanu
yambu te ⸤tepa kis-simba kene kanupuliinga⸥
‘Kondu kolupu ‘Mindili naa nupili.’ nimbú.’
nimbu piliimbu yambale
kondu kolupu ‘Mindili naa nupili.’ nimbú.
Nani nanu
yambu te ⸤buni pemba kene kanupuliinga⸥
‘Kondu kolupu liipu tapunjumbu.’
nimbu piliimbu yambale
kondu kolupu liipu tapunjumbu.” Wendu Uring 33:19
nirim.
16 Akiliinga, yambu te-ni ‘Pulu Yili-ni na ‘yunga yambale’ nimba makó topili.’ nimbu piliilimáliinga Pulu Yili-ni ‘yunga’ nimba makó naa tolemú. Mola yambu te-ni ‘Na makó topili.’ nimba kene mindili sipa ulu telemú akuma kanupa makó naako tolemú. Pulu Yili-ni yununu, yunga kondu kolemú akili-ni mindi aku telemú.
17 Ulu akiliinga Pulu Yili-ni ⸤Moses-nga kerina⸥ Isip yi nuim kingelendu nirim ungele Pulu Yili-nga bukna molemú akili
i-sipa mele:
“ ‘Nu-kene tembu mele yambuma-ni kanukuliinga
nanga tondulale kanangi.
Nanga bili ola mulupili temanele
ma-koleamanga pali toku molangi.’ nimbu
‘Nu Isip-yambumanga yi nuim kingele
molani.’ nirindu.” Wendu Uring 9:16
nirim.
18 Akiliinga, ⸤ekupu oliu piliilimulu:⸥ ‘Pulu Yili-ni ‘Yambu te kondu kolumbu.’ nimba piliilimú yambale sika kondu kolemú. ‘ ‘Nanga ungele naa piliipa kara pupa mulupili.’ nimbú.’ nimba piliilimú yambale sika aku-sipa molemú.’ ⸤nimbu piliilimulu⸥.
19 Akiliinga, ekupu eni yambumanga te-ni na walsipa piliipa kene nimba mele: “⸤Pulu Yili-ni aku telemú⸥ lem oliu ulu-kisma telemulu mele kanupa kene oliu nambimuna ‘Teku kis-silimele.’ nilimúye? Pulu Yili-ni numanale-ni piliipa ‘Tembu.’ nimba piliilimú mele nae-ni manda “Mólu.” nimbáye?” nilka.
20 ⸤Aku nilkako⸥ akiliinga-pe mana-yambu nae-ni Pulu Yili-ni ulu telemúmanga “Teku kis-sikenu.” nimba ung-mura simbaye? Yambu te-ni méle te tepa mimi temba kene méle kanili-ni yambalendu “Na nambimuna aku-sikunu tekunu mimi tekenuye?” nimbá kene kapulaye?
21 Ma-ni mingi tepa mimi telemú yi te-ni mingi tale tepa mimi tepa kene ulu auli te wendu ombá kene kongun simbandu mingi kaí te tepa mimi tepa, we-enamanga kongun-mingi te tepa, aku telemále kapula naa telemúye? ⸤Akili yunga numanale-ni piliipa telemú.⸥
22 Aku lem Pulu Yili-ni aku-sipa kapula naa tembaye? Pulu Yili-ni ‘Nanga arerembi koliu mele mokeringa wendu upili. Nanga tondulale kanangi.’ nimba, méle ‘Tepu kis-simbu.’ nimba piliilimú mélema tepa kis-simba enale wendu ombá kene tembandu ena pulele we lipili mundupa kelelemú akili kapula móluye?
23 ⸤Aku temba nikerale⸥ ‘Yunga talang puliele kene tondulale kene kanuku, yunga molupa kunjuli ulele kanangi.’ nimba mélema penga lepa konjupa yunga talang púlina lembama kórunga-ui tepa mimi tepa nusunjurum méle akuma yu kondu kolumba mélema temba kene kapula móluye?
24 ‘Mélema kondu kolumbandu temba mélema.’ niker akuma oliu mana-yambu Pulu Yili-ni makó turum yambuma. Oliu Juda-yambumanga mare mendepulu mólu. We-yambu-lupamanga mare wasie.
25 Akilindu Pulu Yili-ni ui nirim mele Osia-ni bukna turum molemú akili i-sipa mele:
“Nanga yambu naa muluring yambuma
‘Enini nanga yambuma.’ nimbú.
Yambu na numanu naa munjurunduma
‘Na numanu monjuliu yambuma.’ nimbú.” Osia 2:23
nirim.
26 “Kolea tenga ‘Enini nanga yambuma mólu.’
nirindu kolea akuna
‘Kona molupa mindi puli ulu-pulele
pelemú Pulu Yili-nga kangambulama.’
nimbú.” Osia 1:10
nirimko.
27 Asaya-ni Isrel-yambuma muluring mele piliipa kene nimba mele:
‘Isrel-yambuma ⸤sika pulele molemeláliinga-pe⸥
numú-kusa kéluna okea mele kapula molkemelanje ⸤kepe
wema pali kulungí kene⸥
Pulu Yili-ni aima koltale mindi tepa liimba kene
eninga koleana alsuku puku ⸤kapula⸥ mulungí.
28 Yawe-ni mana-yambumanga kotele
we-we sipa piliipaliinga
eninga ulu telemelemanga sumbi-sipa
kamu pundu topa mindili simba ⸤akiliinga⸥
aku-sipa Isrel-yambuma koltale mindi
tepa liimba.’ Asaya 10:22-23
nirim.
29 Ui Asaya-ni nirim mele aku-sipa wendu urum kanili:
‘⸤Pulu Yi⸥ Aima Tonduluma Pali Pelemú Auliele-ni
oliu pali topa konjupa
oliunga yambu mare ‘we kona molku
yandupa yambuma kalku liangi.’ naa nilkanje
kolea-auli Sodom kene Gomora-selenga
yambuma turum pali kuluring
te kona naa muluring mele
oliu aku-sipu te kona aima naa molkumula.’ Asaya 1:9
nirim.
9:30-10:21 Isrel-Yambuma-ni ‘Yesos Oliu Tepa Liimba Urum.’ Niku Tondulu Munduku Naa Piliiring Ung Te
9:30-33 Isrel-Yambuma-ni ‘Pulu Yili-ni Oliu We Tepa Liimba.’ Niku Tondulu Munduku Naa Piliiringeliinga Pulu Yili-ni Enini ‘Yambu Sumbi-Nílima’ Nimba Naa Kanurum Ung Te
30 Aku lem ekupu oliu-ni nambulka nimulúye? ⸤I-sipu nimulú:⸥ Isrel-yambu naa molemele yambu-lupama-ni ‘yambu sumbi-nílima molamili.’ niku mindili siku uluma naa teku muluring yambu akuma Pulu Yili-ni ‘yambu sumbi-nílima’ nimba kanurum. Pulu Yili-nga ungele ‘Sika’ niku tondulu munduku piliiringeliinga mindi Pulu Yili-ni ‘enini yambu sumbi-nílima.’ nimba kanurum.
31 Akiliinga-pe ⸤Pulu Yili-ni ‘nanga’ nimba makó turum⸥ Isrel-yambuma-ni ‘Oliu Pulu Yili-ni ‘yambu sumbi-nílima’ nimba kanomba ung-mani te kanupu teamili.’ niku molku kene ⸤te naa lirim-na⸥ koruku kiliring.
32 Nambimuna yambu sumbi-nílima naa muluringiye? Enini Pulu Yili-nga ungma ‘Sika’ niku tondulu munduku naa piliiring akiliinga enini yambu sumbi-nílima naa muluring. Eni-enini “mindili sipu ulu-kaíma temulú kene Pulu Yili-ni oliu ‘yambu sumbi-nílima’ nimba kanomba.” niku piliiringeliinga ⸤Pulu Yili-ni ‘enini yambu sumbi-nílima’ nimba naa kanurum⸥. ‘Yambu singa tonjulemú ku’ akili-ni enini topa mania mundurum.
33 ⸤Ku akilindu⸥ Pulu Yili-nga bukna ⸤Asaya-ni turum⸥ ung te molemú, akili i-sipa mele:
‘Piliai. Yambuma singa tonjulemú ku te,
akili-ni yambuma topa mania mundumba kuli,
na-ni Mulú-Sayon olakundu lipili nusurundu.
Ku kanili molemú yili
‘Yu sika ⸤Pulu Yili-ni ‘Oliu nokupa kunjupili.’ nimba
liipa mundurum yi-nuim Kraisele⸥.’ niku
tondulu munduku piliingí yambuma-ni
⸤yu-ni sika liipa tapunjumbaliinga⸥
penga ‘Yu gólu tokum.’ niku
numanu kis panjingí kupulanum te naa lemba.’
nimba bukna molemú. ekendu Asaya 8:14, ekendu Asaya 28:16