10
Cornelius ba Peter
Ba namai Caesare meyaginai sebare kana waba Cornelius, kona Gentile biyina i mamana, ba kona wai Rome abiabiyisi asi bada, saba kona wai Italy abiabiyisi i binaovisi. Kona ba ana rakaraka yabata God si kumakumarei ba si bokuwayei. Ba moyamoyakisi kurisi si bereberena ba mamanina God kurina si rupari. Ba rabisi kesana 3:00 nanakasike aba kinakinanai debai mom i kitai, kata God ana aneya i botu kurina, ba i wona, “Cornelius!”
Ba Cornelius ere naganagarina i kita damanei ba i toiruba, “Abi awaika Bada?”
Ba aneya i kaobeyei i wona, “Am pari ba am berena moyamoyakisi kurisi, ereonowana puyo rutainina God kurina i gae, ba e nosinosim. Ba karaku wai pipiya kuni poraisi ku Joppa sebare kana waba Simon Peter sina urabai sina veramaga. Kona wai Simon aba payapayaya kwapirisi yai sawara e wosewose ba ana yove nisa wai parinai yabata te mamana.”
Ba aneya i sisiya i kakaba wai i nesaira, ba Cornelius ana saibisaibirisi ruwamo i yorisi ba kana aba potapota kesana, kona abiabiyina saba God i bokuwayei. Ba kosi awaika i tupuwa wai ereonowana i wonisi, ba i poraisi ku Joppa.
Peter aba Kinakinana Kitai
Mara i tom rabisi pompom ai matapa si veraverakasibau ku kupurina, ba Peter i gae ku wadakupuna rupari kairavina. 10 Ba soya i rabobo wai ana waina awaika kesana ita kani, saba kam karaku wata kamonai, si bobunagi kamonai kiyakiyaya i kinani. 11 Kata sapama i tamotatara ba sawara kesana sowo rutainina i kitai i gaigakira ku dobu. 12 Ba sowona kamona wai aba payapaya bubausi yai ereonowasi tano ai te botete wai, ba manu kaidamona roborobosi. 13 Damanina ba gamo i nonori i wona, “Peter, ke bomsiri ki kasibunuwana ba kuna kam.”
14 Ba i kaobeyei, “Kega rubana Bada! Au yawasa kamonai kega meyana, ama dudura awaika goyogoyosi ba pudapudasi ebi taraparanikai wai ana kani.”
15 Ba gamona i wona mena, “Maranai God, awaika i wosei gairena wai, kom kega kuna wona goyona.” 16 Ba wosena kesanina i tupuwa mara tonu ba sowona si taina geyena meyei ku sapama.
17 Ba Peter niko aba kinakinana i kinani wai nuwanuwana i kairagaraga, kata basuna wai awaika, ba Cornelius pipiya i poraisi wai si verakasibau Simon ana ku yove. 18 Ba si toiruba kata namai Simon Peter i mamana kona kega.
19 Ba Peter ibi nuwanotanota mana, ba Kanuma Kaobaisiyena i sisiya kurina, i wona, “Simon, pipiya asi tonu te nuvenuvenim. 20 Ke bomsiri kuna gakira ba yabata kona nae, kega kuna kumara kosi wai yauku ai poraisi.”
21 Damanina Peter i gakira kurisi ba i wona, “Pipiyina ko nuwenuweni wai yauku nina. Ba awaika kairavina ko botu?”
22 Ba si kaobeyei si wona, “Yakai wai Cornelius, Rome biyisi asi bada kaikapona i poraikai ka botu. Ba kona wai God e kumakumarei, ba ana yawasa i gaire saki, ba Jew biyisi te bokuwayei. Ba Aneya kaobaisiyena i wonei kata kom kuta botu kurina ana ku yove, ba awaika warana kuti sisiyei wai ita nonori.” 23 Ba Peter kana wagawaga i urabaisi ku yove ba namai si dauwa.
Kanuma Kaobaisiyena i Gakira Gentile kurisi
Ba mara i tom wai, kona yabata si tauya si nenae wai Joppa bigeruwana biyisi mutusi si kibisi. 24 Ba mara i tom mena wai, si verakasibau ku Caesarea. Ba Cornelius memena ibi potapota wai ana rakaraka ba turaturana i yorisi si botu. 25 Maranai Peter i verakasibau ku yove wai Cornelius, Peter i kaikaivi, ba i bopepeta i gakira ku kaena mena ere bokuwayina. 26 Saba Peter Cornelius i taina bimsiriyei, ba i wonei, “Ke bomsiri, yauku kona pipiya mom kom rutainim.”
27 Ba yabata si sisiya si riuriu ku yove kamona wai Peter pipiya pesarisi si gaenisi si mamana wai i kinanisi. 28 Ba kurisi i wona, “Ko kuiri kata Jew biyisi wai kega rubarubana Gentile biyisi yabata sini kapuisi. Saba God i beyiku kata kosi kega ana kaobigoyonisi kona ana wonisi pudapudasi. 29 Kona kairavina maranai wasaga si nae sita urabaiku wai, kega a potai ba a tauya yagiyagina a botu. Kuta woniku, awaika kairavina ku wona wai a botu?”
30 Damanina Cornelius, Peter i kaobeyei, “Mara bai bataina murinai, kao nikasike rubana 3:00 au yove kamonai a rupari, ba sebare kesana kana gara poepoena ba mata kamokamosina, yagiyagina wata naoku ai i msiri. 31 Ba i woniku, ‘Cornelius, am pari God i nonori ba am berena, moyamoyakisi kurisi wai i kinani. 32 Kata karaku nina wasaga ki poraisi, si nanae ku Joppa ba sebare kana waba Peter sina urabai. Kona wai Simon ana yove yai e mamana. Ba Simon wai aba payapaya kwapirisi yai sawara e wosewose ba ana yove wai tore yai.’ 33 Kona kairavina ai pora yagiyaginisi si nae kurim, ba i gaire saki kata karaku God gwabiti yai ba awaika ereonowana Bada i wonim wai kuna wonikai.”
Peter ana Sisiya
34 Damanina Peter sisiya i dagui, i wona, “Karaku mosi a kuira kabitamni kata God kurina wai ereonowata kesanita. 35 Saba dobu tompipinina iyabosi wata God te naganagarei, ba wose totorisi te wosewose wai kosi ereonowasi karinai. 36 Niko sisiya God i porai Israel biyisi kurisi wai ku kuiri, nuwanuba warana gairena Iesu Keriso i botuwei. Ba kona wai ereonowata ata Bada. 37 Ba awaika Judeai i tupuwa wai ko kuira, Galilee yai i dagui, John babataito warana i raumamarei murinai? 38 Ba God ana Kanuma Kaobaisiyena ana maragata, Iesu Nazareth biyina i bonuwei ba i yewo neubuwa wose gaigairesi i wosewose, ba kanuma goyogoyosi pipiya kamosi yai si mamana wai, ibi yawasisi kairavina God mamanina ibi baisi.
39 Ba Iesu awaika ereonowana i wosei Jew biyisi asi kupurai, ba Jerusalem kamonai wai, yakai ereonowana matakiyai ka kinani, ba namai si kasibunui ba si tuparatui. 40 Ba kao bitonuina murinai God ibo bimsiri meyei, ba i wosei i rerematara kata sita kinani. 41 Ba i rerematara wai kega pipiya ereonowasi kurisi. Ba yakai ka kinani, rabobo ai i bomsiri ba ka kam yabata. 42 Ba i kaotuneikai, pipiya kurisi kata rumamara. Ba God maragata i berei kata raoboraobosi ba yawayawasi ini buibuiyisi. 43 Ba peroperoveta ereonowasi sini mamatara pipiya ereonowasi kurisi kata, iyabosi wata kana wabai sini geruwana wai asi piragagoyosi ina notataveyisi.”
Kanuma Kaobaisiyena Pipiya mom i Bonuvisi
44 Ba Peter ana sisiya karakuwata ibi sisiyei, ba Kanuma Kaobaisiyena i gakira, iyabosi niko wara si nonori wai kurisi. 45 Damanina Jew bigeruwana biyisi Peter yabata si botu wai, si sikwana kata God ana puyo, Kanuma Kaobaisiyena, yebo i utusewai Gentile biyisi kurisi. 46 Si nonorisi ba gamo bubausi yai sibi sisiya ba God sibo kabakabari.
47 Ba Peter, i wona, “Nikosi Gentile biyisi karaku kega rubana tani gesisi, saba okowai sina babataito. Basuna kosi yebo Kanuma Kaobaisiyena si yauni kota ta yauni wai rutainina.” 48 Damanina i kaotuneisi wai Iesu Keriso kana wabai sita babataito. Kona murinai, Peter si babai kata gwabisi yai ita mana mara yogina.