17
Paul Thessalonica Kamonai
1 Maranai Paul ba Silas, Philippi meyagina si sumarei wai si botu ku Amphipolis ba Apollonia kamosi yai wata ba si nae ku Thessalonica, Jew biyisi asi dugu yovena i mamana wai nakai.
2 Paul mamanina i wosewose wai nanakasike, i riu Jew biyisi asi ku dugu yovena ba Sabath tonu kamosi yai pipiya yabata God warana gairena si sisiyei.
3 Ba i baibaiyavi ba basuna i kaoberisi kata Bibigairenina Kaobaisiyena wai ina paiwara ba rabobowai ina bomsiri. I wona, “Niko Iesu a biyoneyonei kurimi wai kona Bibigairenina Kobaisiyena.”
4 Jew biyisi mutusi si nonora wai Paul ba Silas si sununurisi ba Greek biyisi God si bo pepetei ba bibaine babadisi mutusi si geruwana.
5 Saba Jew biyisi mutusi si nuwarauwa, wai pipiya botabira bitasi bigimona gawarinai si runotuwanisi ba si kokona si gweagwea ba si dadaura. Si riu Jason ana ku yove wai Paul ba Silas si nuwenuwenisi sita taina seserisi sita kasibau pipiya kurisi.
6 Ba maranai kega si pananisi wai Jason ba bigeruwana biyisi mutusi si taina seserisi si kasibau baibuibuiya biyisi kurisi. Ba si parapara, “Paul ba Silas dobu ereonowana te resoresoi. Ba yebo karaku niko meyagai te resoresoi.
7 Ba Jason yebo i enoenovisi ana ku yove. Nikosi pipiya Caesar ana kairuwana te bikasikotobi, te wonawona kata kosi taupauma bauna te bigeruwei, kana waba Iesu.”
8 Maranai nikosi si nonori wai pipiya ba bibuibuiya biyisi yabata si negenegeisi.
9 Damanina Jason ba bigeruwana biyisi mutusi si gwabisiya mane si yauni ba si wonisi kega sita wose meyei ba si boterisi si nae.
Berea Kamonai
10 Kona pomnai bigeruwana biyisi Paul ba Silas si poraisi ku Berea. Si verakasibau wai si vera damana Jew biyisi asi ku dugu yovena.
11 Berea biyisi nuwanuwasi bobotaveyisi kega bage Thessalonica biyisi ba Paul Wara Gairena i sisiyei wai si nonora kabikabitamni. God wonana mara patepatena si baibaiyavi wai si kita bikuikuiri kata Paul asi bibeyebeyena wai wona damana kona kega.
12 Kona kairavina Jew biyisi pesarisi ba Greek babadisi sebasebare pesarisi ba bibaine yebo pesarisi si geruwana.
13 Saba maranai Jew biyisi mutusi Thessalonica kamonai si bopanani kata Paul Wara Gairena Berea kamonai i raumamarei wai, si nae ba namai si dagui si bikupura resoreso Berea biyisi kamosiyai.
14 Bigeruwana biyisi si bokwayo yagina Paul si porai ku tore ba Silas ba Timothy Berea kamonai si mana.
15 Pipiya Paul si urabai si nae ku Athens, wai si veramaga ku Berea ba Silas ba Timothy si wara berisi kata yagiyagina sita nae Paul kurina.
Athens Kamonai
16 Maranai Paul Athens yai i potapotaisi, wai meyaga kamonai tarabibisaka i bonuwa i kinana wai nuwanuwana i yara.
17 I nae Jew biyisi asi ku dugu yovena ba Jew ba Greek biyisi God te bo pepetei wai pipiyisi yabata si bisisiya, ba kao patepatena yebo gimona gawarinai pipiya namai si mamana wai kurisi i bisisiya.
18 Ba yebo Epicurean ba Stoic biyisi kuikuirisi yabata si kawapata, mutusi si wona, “Kinanina bage god tumana e raumamarei.” Kairavina Iesu ana rabobo ba ana bomsiri mena kairavina i wonisi wai, ikesisi si wona, “Niko neganega awaika i dagui e bisisiyei.”
19 Ba si yauni si gae meyaga babadisi kasi waba Areopagus kurisi. Ba si wona, “Ko botu, ba niko bibeyebeyena wauna kairavina kona wonikai.
20 Kom awaika kega meyana ka nonori wai ke bisisiyei, ba ama waina basuna damana kana kuira kabitamni.”
21 Athens biyisi ba pipiya tumana nina te mamana wai, kapokapoyanisi asi waina saki wose wausi sini sisiyana, ba sini tainabaenegana.
22 Damanina ba Paul Areopagus naosi yai i msiri, ba i wona, “Athens biyimi, a kinanimi kata keta pesarinai komi bitaparoro bitami,
23 Kairavina a yewo neubuwa wai, ami bo pepeta sawarisi pesarisi a kinana. Ba taparoro gawarina kesana tepanai nikona si kirumi, God kega aba kuikuirina kurina. Niko God kega aba kuikuirina, ko bopepetei wai kona ana rumamarei kurimi.
24 Kona nao God dobu ba sawara ereonowana kamonai i wosei, kona sapama ba dobu asi Bada ba kega pipiya yarosi yai God ana Yove si bowa wai kamosi yai e mamana.
25 Ba pipiya nimasi yai kega sina bosaibirei kairavina kega kesana ana waina e mamana. Kona ikesina mom yawasa, ba yasibe, ba sawara ereonowasi pipiya tupasi e bereberisi.
26 God pipiya kesanaikei i wosei ba konai dam ereonowasi si botu, ba kona mara i berisi, ba ana wainai gawara memena sita mana wai i berisi.
27 Basuna wai, dam ereonowana God sina nuveni ba sina panani ba kurina sina nae. Saba kota God gwabitiyai.
28 ‘Konai ta mamana, ta bokwayokwayo, ba tai pipiya.’ Komi yebo ami muwamuwarina e wonawona wai nanakasike, ‘Kota wai God natunatuna.’
29 Kona kairavina kota God natunatuna, kega tana nosi kata God kona tarabibisaka rutainina gold, kona silver ba akimai si tarabibisakei.
30 Rorowa marasi yai pipiya God kega si kuiri wai i kita bigaruisi, saba karaku e kaotuneisi asi piragagoyo ai, sina tombubaunisi ba sina veramaga kurina.
31 Kairavina dobu bibuibuiyina kana mara i terei, ba sebarena i binei ba rabobo ai i bomsiri mena wai pipiya ereonowasi, i beyisi kata kona wai kotoi.”
32 Ba maranai si nonori kata Paul raoboraobosi asi bomsiri mena i bisisiyei wai si bomanibei, saba mutusi si wona, “Ama waina niko sisiya kana nonora meyei.”
33 Damanina ba Paul i kasibau taveyisi,
34 saba mutusi si kibi ba si geruwana. Kamosi yai wai Dionysius, Areopagus asi pipiya kesana, ba wasike kana waba Damaris, ba pipiya mutusi yabata.