18
Jethro i Bowagawaga Moses Kurina
1 Moses rawana sebarena Jethro, Midia biyisi asi priest, awaika ereonowana Moses ba Israel biyisi God kurisi i wosei ba, Egypt kamonai i uraba kaibuvisi wai, warana i nonori.
5 Kata Jethro, Moses natunatuna ruwamo ba sinasi yabata si nae ku kupura momna, God ana ku koya memena Moses i mamana wai nakai.
6 Karaku wata i botubotu ba wara i porai Moses kurina, “Yauku rawam Jethro, natunatum ruwamo ba kaowam yabata ka botubotu kana kinanim.”
7 Damanina ba Moses iverabeyisi ba rawana i pepetei ba i yaoni. Ba kosi si toiruba bibirana kata kosi damanina wata kona? Ba si riu Moses ana ku tent mena.
8 Ba abi awaika ereonowana Bada Egypt biyisi ba asi kaiwabo Pharaoh yabata kurisi i wosei wai, ba yebo Israel biyisi mekabage si bokwarakwara si botu, ba Bada i yawasisi wai Moses rawana i tupana mamatarei.
9 Awaika gairena ereonowana Israel biyisy kurisi i tupuwa ba Jethro i nonori wai i nuwagaire, kata Bada Egypt biyisi asi maragata i bobinubai.
10 Ba Jethro i wona, “Bokabakabara Bada kurina, kairavina Egypt biyisi yarosiyai ba asi teupauma Pharaoh yaronai i yawasimi, ba Israel biyisi Egypt yarosiyai i yawasisi.
11 Karaku yona a kuiri kata Bada i maragata saki, kega bage god ereonowasi pipiya te bopepetisi wai rutainisi. Kairavina Egypt biyisi si bimaragata saivira ba si kaotawatawanisi wai i yauna taveyisi.”
12 Damanina ba Moses rawana Jethro suwara kapukapunina ba puyo bunuwa mutusi i kabara i botu God kurina. Ba Aaron ba Israel babadisi si botu si kesanisi ba Moses rawana yabata puyobunuwa kamna God matanai si kani.
Jethro Moses i Kaobitotori
13 Mara i tom wai Moses ana bibuibuiya gawarinai i makira, ba pipiya asi bimagoyowana i nonora ba i teretere bitotora, didibarai i dagui ba i nenae yepo i rabisi.
14 Moses pipiya kairavisi niko wose i wosewosei wai rawana sebarena i kitai wai i wona, “Kata awaika kairavina nikosi wose pipiya kairavisi ke wosewosei? Ba awaika kairavina kom ikesimi ke bi buibuiya? Ba nikosi pipiya nina didibarai si msiri yepo i pom.”
15 Moses i kaobeya i wona, “Yauku nikona a wosewosei basuna pipiya tebotubotu kuiriku God ana waina sina kuiri.
16 Maranai pipiya ruwamo sini bi magoyowana ba sina botu kuriku wai yauku ana nonori ba ana wonisi kata kotoi e bisuwona, ba yauku God ana kaotunetune ba kaobibeyebeyena ana wonisi.”
17 Saba Moses, rawana i wona, “Nikasike ke wosewosei wai kega i gaire.
18 Niko saibira ikesim damana ke wosewosei wai i bita saki. Kom ba nikosi pipiya yabata wai sinimi sina kariari.
19 Ke nonora kabitam ba ana kaobibeyebeyim, ba God kaurim ina mana. I gaire saki kata nikosi pipiya asi bimagoyowana kom kuna yauna kuna nae God kurina. Damanina pipiya kairavisi God kurina kuni sisiya ba asi bita kuna berei.
20 Kom God ana kaotunetune, ba ana kairuwana kuni beyebeyisi, ba kuna wonisi kata yawasa gairena ketanai sina mana.
21 Ba yebo pipiya kabitam, kamosi yai kuna bineisi, kotoi God e kumakumarei ba iyabosi maisa kwarukwarumina kega te yuyauni wai, ke bineisi sini bada kesana pipiya 1,000 rubana ba kesana, 100 rubana kesana, 50 rubana, ba kesana, 10 rubana sini naovisi.
22 Kosi pipiya sini buibuiyisi ba asi bimagoyowana sina tere bitotorisi. Ba awaika ina padapada saki wai, sina botuwei kurim, ba awaika kega padapadana wai, kosi yebo sina bobitotori. Sini baisim bita sina kabari wai kom kurim ina tapeyana.
23 Nikona kuna wosei wai God ini naovim, ba kega sinim ina kai, ba nikosi pipiya nuwagaireai ba nuwanubai sina nae asi ku yove.”
24 Kata Moses rawana gamona i nonori.
25 Damanina ba pipiya kabitam i bineisi Israel kamonai ba i terisi kata pipiya siti naovisi kesana 1,000 rubana, kesana 100 rubana, kesana 50 rubana ba kesana 10 rubana.
26 Nikosi babada wai kosi mamanina pipiya asi bi magoyowana sina tere bitotorisi. Ba bi magoyowana piropirosi wai Moses kurina sina nae, ba tapeyanisi wai, kosi yebo sina bobitotora.
27 Ba kona murinai Moses rawana i kiuruwei ba i veramaga ana ku kupura.