3
God i Sisiya Moses kurina
1 Kao kesana Moses rawana Jethro, Midia biyisi asi priest, ana sheep i potapotaisi, ba sheep i naovisi si nae ku kupura momna sepina ba si botu ku Horeb, God ana ku koya mena.
2 Ba namai Bada ana aneya kaikairuku karakarasina kamonai i rerematara kurina. Moses i kinani kata kaikairukuna i karakarasi saba kega i karakara roboi.
3 Kata Moses nota i yauni, “Ana nae ba niko wose bauna naki ana kitai. Awaika kairavina kaikairuku kega e karakara roboi?”
4 Maranai Bada i kinani kata kona i nae ita kinani wai, God kaikairuku kamonai kurina i yoreyana, “Moses! Moses!”
Ba Moses i wona, “Awaika, yauku nina.”
5 Ba God i wona, “Kega kuna botu saki, ba kam kae sumasuma ke botavetaveyana, kairavina kom tano kaobaisiyena tepanai ke bimsiri.” Damanina ba i wona,
6 “Yauku wai tamam ana God, Abraham ana God, Isaac ana God ba Jacob ana God.” Maranai, Moses nikona i nonori wai naona i sowoi kairavina i nagara kega rubana God ita kitai.
7 Damanina ba Bada i wona, “Yauku au pipiya Egypt kamonai si bogoyoisi wai a kinani. Yauku pipiya Egypt kamonai asi tou rasarasa a nonori, basuna babada te potapota goyoisi ba, yauku asi siniyara a nomonomosei.
8 Kona kairavina a gakira kosi Egypt biyisi yarosi yai ani yawasisi, ba kona kupurinai ana uraba kasibauwisi ku kupura gairena ba kupura kaikapona, mariya bonabonana. Kosi Canaan, Hitti, Amori, Perizzi, Hivi ba Jebusi biyisi asi kupura.
9 Ba karaku Israel biyisi asi tou i borubaiku, ba Egypt biyisi mekabage tebo bisipuvisi wai a kinani.
10 Kata karaku ke nae, yauku a biporaim Pharaoh kurina, au pipiya Israel biyisi, Egypt kamonai kuna uraba kasibauwisi.”
11 Saba Moses God kurina i wona, “Yauku kotoi, ba ana nae Pharaoh kurina ba Israel biyisi Egypt kamonai ana uraba kasibauwisi?”
12 Ba God i wona, “Yauku wai kom gwabimiyai. Ba nikona wai am matakira kata, kuna kuiri Yauku mom ai poraim. Maranai pipiya Egypt kamonai kuna uraba kasibauwisi wai, niko koyai God kona bopepetei.”
13 Ba Moses, God kurina i wona, “Maranai ana nae ba Israel biyisi kurisi ana wona, ‘Komi tamatamami asi God i poraiku kurimi.’ Ba kosi sina toirubaiku, ‘Ba kona kana waba kotoi?’ Kata mekabage ana wona?”
14 God Moses kurina i wona, “YAUKU kona YAUKU. Nikasike Israel biyisi kurisi ke wona, ‘God e yoreyore meyei, YAUKU, kona i poraiku kurimi.’ ”
15 God yebo Moses kurina i wona, “Israel biyisi kurisi ke wona, ‘Bada, tamatamami asi God, Abraham ana God, Isaac ana God, ba Jacob ana God, kona i poraiku kurimi.’ Nikona wai kau waba mama damanina ina mana. Niko waba YAUKU, ba kimta ba kimta nunusi yai kona nosiku.”
Kona murinai Moses i veramaga ana ku yove ba i nae ku Egypt, waresina Aaron ba Israel babadisi awaika ereonowana i wonisi. Damanina ba Moses ba waresina Aaron si nae Pharaoh kurina ba si wona, “Bada i poraikai kata wonim kata ana dam Israel biyisi kuni poraisi ku kupura mama wapana mena Bada kurina sina puyobunuwa.”
Pharaoh kurisi i wona, “Kega rubarubana! Kosi sina bobagibagi mana.”
Kona kairavina Bada Egypt biyisi kurisi wose goyogoyosi pesarisi i wosewose, saba Pharaoh kega i boterisi si nae. Bagunai Nile okowina i wosei i botaratara, Pharaoh Israel biyisi kega i boterisi si nae. Egypt biyisi asi aba payapaya pesarisi si rabobo ba kapukapura sinisi yai si yauna saba kega i boterisi si nae.