11
Babylon Yovena Kiuduna
Ba kona maranai dobu tompipinina kamonai pipiya asi gamo ba pepesi wai kesana. Ba si bowagawaga ku maramatana mena wai Babylon kupurinai kwapu si panani ba nai si kwanatu.
Damanina turaturasi koi si kaoboneyana, si wona, “Ko botu brick tana wose ba keyamai tana kapuna kabitam.” Brick wai akima wasana ba tar wai kana bobotawana. Damanina ba si wona, “Ko botu, kairavita meyaga kaikapona ba tower tana bowai, kata ina gae ku sapama. Kata waba ina wosei ina rakata kairavina, ba niko dobu ai kega tani buburanita.”
Saba Bada i gakira i botu meyagina kaikapona ba nao tower si bowabowai wai kinanina kairavina. Ba Bada i wona, “Nikosi dam wai gamo kesanai te bisisiya wai nikona si dagui. Maranai awaika wosena sina waini wai kega kotoi ina guduisi. Ko botu tana gakira asi gamo tana rubotabitabiri, kata kamosiyai sina bubuwa ba kega sina kuiri awaika te bisisiyei.”
Nanakasike Bada, i kasibuburanisi dobu tompipinina si bonuvi ba meyaga kaikapona si bowabowai wai si boterei. Kona kairavina meyagina kaikapona si yorei Babylon, basuna Bada namai asi gamo i rubotabitabiri ba i bubuvisi. Ba nikasike Bada i kasibuburanisi dobu tompipinina si bonuvi.