13
Abram ba Lot si Buburana
5 Ba Lot, Abram yabata si bowagawaga neubuwa wai yebo i mariya saki ere ana sheep ba cow ba ana yove kara si pesara saki.
6 Saba tano wai kega rubana kata Abram ba Lot sita ma yabata basuna asi aba payapayaya ba asi sawara wai si pesara saki.
7 Ba Abram ana aba payapaya kasi aba potapota ba Lot ana aba payapaya kasi aba potapotasi basusi yai wai bikawapata i tupuwa. Kona maranai Canaan biyisi ba Perizzi biyisi wai yebo tanonai si mamana.
8 Damanina Abram, Lot kurina i wona, “Kom wai abuku ba kota wai rakaraka ba kega bai kaogegeyana basuti yai ina mana, kona ata aba payapaya kasi aba potapota kamosi yai ina tupuwa.
9 Tano i rakata saki naomi yai, nina tani buburana, am waina meo tano wai ke binei. Abisiri yai kuna nae ku geduta wai yauku ana nae ku kasuta ba kuna nae ku kasuta wai yauku ana nae ku geduta.”
10 Lot i gagawa Jordan kupurina kasigaoworina oko okowina i kinani, kinanina nanakasike bage Bada ana masawa, kona Egypt tanona, rutainina ba e nenae ku Zoar mena. Nikona wai muri yai Bada Sodom ba Gomorrah ita kasibigoyonisi.
11 Ba Lot Jordan kupurina kasigaoworina ereonowana i kesina kairavina i binei, ba asi ruwamo si buburana kata Lot i nae ku maramatana mena.
12 Abram Canaan kupurinai i mana. Ba Lot i nae Sodom gwabinai, Jordan kupurina kasigaoworina meyagisi kaikaposi, kamosi yai i kwanatu.
13 Saba Sodom biyisi wai si kawakasekase saki ba Bada kurina asi piragagoyo i rakata saki.
14 Ba Lot i nae murinai Bada, Abram kurina i wona, “Memei ke bimsisi wai ke gagawa ku yabarata, ku yawara, ku maramatana mena ba ku enaga sipuna.
15 Niko kupura ereonowana ke kinakinani wai, kom ba am rakaraka ana bere damanimi.
16 Ba am rakaraka ana wosei sina pesara, bage tano momokarina rutainina, kega rubana sina baiyavisi.
17 Ke nae kupurina ana veoroma ba ana nabanaba kuna utu nanagi kairavina kupurina ereonowana a bereberimi.”
18 Damanina Abram ana gwedagweda i kukuwana ku Hebron, keyama kaikaposi Mamre gwabinai ba namai i kwanatu, ba Bada ana raunabonabo i kemai.