15
God ana Bidamanina Maragasina Abram yabata
1 Nikona murinai Bada wonana abakinakinana kamonai i botu ba Abram kurina i wona, “Kega kuna nagara Abram, yauku wai am beyana. Ba am maisa kaikapo sakina ana berim.”
2 Saba Abram i kaobeyei i wona, “Au Bada Maragata Sakim, awaika kuna beriku ba yauku kega ere natuku, ba Eliezer Damascus biyina au mariya tupana ini karinai.”
3 Ba Abram i wona, “Yauku kega natunatuku ku beriku, wai au saibisaibirina kesana au buderi ba au sawara ina yauna.”
4 Damanina ba God kurina i wona, “Kega, am saibisaibirina kega wasam ina yauni, saba natum damana wasam ina yauni.”
5 Ba Bada i urabai i kasibauwei ku matara ba i wona, “Ke gagawa ku kaidamo ba gwamegwame ke baiyawa rubai. Natunatum muri yai sina tupuwa wai, sina pesara bage nikosi gwamegwame rutainisi.”
6 Ba Abram Bada i geruwei wai, Bada i damaninei kata Abram wai, kona pipiya totorina ba gaire sakina ana bitumagana kairavina.
12 Maranai kao i gaigakira wai Abram i kenouwapa i dauwa rabobo ba baidibara aba naganagarina i sowo potai.
13 Kata Bada kurina i wona, “Am rakaraka muri yai te botubotu wai, kupura tumanai sina bogoyoisi ba sini kamyosukusuku, ba sina bosaibira bodu 400 rubana.
14 Saba kona kupurinai sina bosaibira wai, ana kasibigoyoni ba am rakaraka sini bisumarei wai, asi mariya kaikapona sina yauni.
15 Ba kom wai, kuna morapa saki, ba nuwanuba kamonai kuna rabobo ba sina doguim.
16 Ba am rakaraka kimta 4 murinai wai, sina veramaga mena niko ku kupura. Kairavina Amori biyisi asi piraga goyo kega i rakata saki ba ana kasibigoyonisi.”