22
Abraham i Rurubai
1 Nikosi murisi yai God Abraham i rurubai, ba kurina i wona, “Abraham!”
Ba i kaobeyei i wona, “Awaika yauku nina a bitainabaenega.”
2 Damanina ba i wona, “Natum Isaac, natum nekesana kui nuwayauyauna sakiyei wai, yabata ko nae ku Moriah. Koya kesana ani beyim wai namai kuna kasibunui ba tupuwina kuna puyobunuwa am suwara kapukapunina kuriku.”
3 Maratom didibarinai, Abraham i bomsiri ba ana donkey i bobunagi. Ba ana saibisaibirisi asi ruwamo ba natuna i urabaisi ba puyobunuwa, suwara kapukapunina kairavina kana keyama i bobunagi rubana wai si tauya, God i wonei wai ku kupurina.
4 Kao bitonuina i tarakata ba rabarabai naki kupurina i kitai.
5 Ana saibisaibirisi kurisi i wona, “Nina donkey yabata ko mana, ba pipiyaikei ba yauku ka nanae noko mena ba kana bopepeta ba yebo kana veramaga kurimi.”
6 Abraham keyama gedowina i bokabari ba Isaac ku tepana i terei ba kona wai, keyama karakarasina ba yarewa i yauna.
7 Ba si nenae wai, Isaac tamana Abraham i wonei, “Tama keyama karakarasina ba suwara kapunina kairavina wai keyamina nina, ba aba payapaya puyobunuwa kairavina wai memena?”
8 Abraham Isaac i kaobeyei i wona, “God ikesina aba payapaya suwara kapunina kairavina ina berita.” Ba si yewo si gae God i wonei wai, ku koyana.
9 Si verakasibau wai, Abraham gwagwara i bobunagi ba raunabonabo tepanai keyama i kemai ba natuna Isaac i kausi ba tepanai i dauwei.
10 Ba nimana i kotoi ba yarewa i yauni ba, i bokabari Isaac ita gwari,
11 ba God ana aneya sapamai i parara, “Abraham! Abraham!”
Ba i kaobeyei i wona, “Awaika, yauku nina.”
12 “Pipiyaikei kega ke kasibigoyoni. Karaku mosi a kuiri kata, kom God ke naganagarei ba ke bokuwayei, kairavina natum nekesana kega ku gegenuwei.”
13 Abraham i tarakata ba ram kaikairuku kamonai tonana i kirai wai, i kitai. Ba i nae i yauni ba suwara kapukapunina kairavina natuna Isaac wasana i puyobunuwa.
14 Ba Abraham kona kupurina i yorei, “Bada ina Berena.” Ba karaku patana pipiya niko maranai te yoreyorei, “Bada ana koya tepanai ina berena.”
15 Ba Bada ana aneya sapamai mara bairuwaina Abraham i yorei,
16 ba i wona, “Yauku ikesiku mom kau wabai a kaobiyoyobanim, kata, niko wose ku wosei ba kega natum nekesana ku gegenuwei,
17 wai, a bisuwonim ani gairenim ba am rakaraka ana wosei sina pesara nanakasike bage gwamegwame sapamai ba sega toreyai rutainisi. Am rakaraka kasi abiya sina getawanisi ba asi meyaga ba asi sawara sini karisi yai,
18 ba kom am rakaraka kamosi yai wai dam ereonowasi dobu ai ani gairenisi, kairavina ku bosisiriku.”
19 Damanina ba Abraham i veramaga mena ana saibisaibirisi kurisi, ba kosi yabata si nae ku Beersheba. Abraham namai Beershebai i kwanatu ba i mana.