39
Joseph ba Potipar Kaowana
Maranai Joseph si yauni si gakira ku Egypt, wai Pharaoh ana babada kesana, ba yebo ana yove kana aba potapota kasi bada, Potipar, kona Egypt biyina, Ishmael biyisi gwabisi yai Joseph i gimoni.
Ba Bada wai Joseph gwabina wai awaika ereonowanai i wosewosei wai gairena wata, ba ana bada Egypt biyina ana yove yai i mamana. Ba ana bada i kitapanani Bada wai Joseph gwabinai, kata awaika ereonowana i wosewosei wai birana gairena i tuputupuwa. Potipar i nuwagaire saki Joseph kurina wai i wosei ikesina kana bosaibisaibira, ba yebo ana yove ba sawara ereonowana ku yarona i terei i potapota. Joseph ana bagibagi i dagui maranai wai, Egypt badana ana yove kamonai, ba ana sawara ereonowana, ba ana kwapu ba ana aba payapayaya manamisi ereonowasi, kona notanai wai Bada i gaireni. Kata Potipar ana yove kamona ba ana kwapu ereonowana yebo i gaireni. Kata Potipar ana sawara tupana Joseph i berei i badei wai, kega kesana awaika i nuwapoyei ba kam kanina wata.
Ba Joseph wai komeruwanina ba kana tupuwa kinanina gairena. Kega rabarabana murinai, ana bada kaowana Joseph i kita kirorowei ba i wonei, “Ke botu yabata tana dauwa!”
Saba i totoyana ba kurina i wona, “Ke kinani, au bada i tumaganiku wai ana sawara ereonowana, ku yaroku i terei a potapotai wai kega e binuwapoya. I teriku ana sawara tupana a bibadei. Niko yove a bibadei wai kona rutainina ba kega kesana awaika i taraparanei ba ikesim wata, basuna kom wai kona kaowana. Ba mekabage wose goyona mom kurina ana wosei ba God matanai piragoyo ana wosei?” 10 Kao patepatena wasikena Joseph i kwaikwairi yabata sita dauwa saba, Joseph i totoyana wai i sisairei.
11 Ba kao kesana bagibagi biyisi mutusi kega nai wai, Joseph i riu ku yove bagibagi kairavina. 12 Ba wasikena Joseph kana kwama i taina tawani ba i wona, “Ke botu yabata tana dauwa!” Saba i rukasitaveyei ba i vera i kasibau ku matara ba kana kwama wai wasikena yaronai i sumarei.
13 Ba maranai wasikena i kinani kata kwama wai, i sumarei yaronai i botawani ba Joseph i vera i kasibau ku matara wai, 14 i yoereyana aba saibisaibirisi mutusi kurisi ba i wona, “Ko kinani! Niko Hebrew sebare kaowaku i urabai i botu wai bigigimita kairavina! I riu ita dauwiku, saba gamoku kaikaponai a rasa. 15 Ba i nonoriku bibaita kairavina a rasarasa wai kana gara pariku ai i sumarei ba i vera i kasibau.”
16 Ba wasikena kwamana i botawani yepo kaowana i verakasibau. 17 Damanina ba wasikena i rurutuwa kaowana kurina. “Niko Hebrew patupatumina ku urabai ku botuwei wai, bigigimiku kairavina i riu beyebeyiku. 18 Ba bibaita kairavina a rasarasa wai kana kwama pariku ai i vera bigarui ba yove kamonai i vera i kasibau ku matara.”
Joseph Patuma Yovenai
19 Maranai ana bada kaowana ana rurutuwa i nonori i wona, “Am patupatumina nikasike kuriku i wosei,” wai Potipar i yagisi saki. 20 Kata Potipar, Joseph i patumi ba taupauma ana patupatumisi si terisi wai namai i terei.
21 Saba Bada wai Joseph gwabinai* ba i gaireni kata patupatumisi kasi aba potapota badana Joseph kurina wai ibi nuwagaire. 22 Kata patupatumisi asi bada, Joseph i terei patupatumisi ibi badisi ba, awaika ereonowasi nai si tuputupuwa wai i bibadei. 23 Joseph awaika ereonowana i potapotai wai patupatumisi asi bada nuwapotai i mamana. Kairavina Bada wai Joseph gwabinai ba awaika ereonowana i wosewosei wai Bada birana gairena wata i bereberei.
* 39:21 Acts 7:9