48
Manasseh ba Ephraim
1 Kona murinai Joseph si wonei, “Tamam wai i gubaga.” Kata natunatuna ruwamo Manasseh ba Ephraim i urabaisi ba yabata si nae.
2 Maranai Jacob si wonei, “Natum Joseph i botu ina kinanim.” Kata Jacob i bo kwarakwara i maragata, ba ana gawarai i msiri, i makira.
3 Ba Jacob, Joseph kurina i wona, “God Maragata Sakina, Luz meyagina Canaan kupurinai i rerematara kuriku ba i gaireniku.
4 Ba kuriku i wona, ‘Yauku ana wosim kuna uwa ba am rakaraka, ana wosei ina pesara saki. Ba dam korotosi bubausi yai saba sini kesani, ba Canaan kupurinai am rakaraka muri yai ana bere damanisi ini karisi yai.’
5 Ba karaku nikasike, natunatum sebasebare ruwamo Ephraim ba Manasseh, Egypt kamonai si tupuwa ba muri yai a botu kurimi wai, kosi yauku ani natunatunisi, nanakasike bage Reuben ba Simeon rutainisi.
6 Murisi yai natunatum mutusi sina tupuwa wai kom karimi yai, ba meo kupura tuwatuwasi Ephraim ba Manasseh sina kwanatu wai parisi yai sina mana.”
13 Joseph natunatuna ruwamo i yaunisi i botu, kata Ephraim wai Joseph kasaunai ba Jacob gedunai i terei ba Manasseh wai gedunai, ba Jacob kasaunai i tere, ba i botuwisi Jacob ku, gwabina damana.
14 Saba Jacob kasauna i bokotoi ba murimurina, Ephraim gayaminai i terei ba geduna i kasibonei kata iyarokona, Manasseh gayaminai i terei, saba kona wai iyarokona.
15 Damanina ba Joseph i gaireni ba i wona,
“God, wawaku Abraham ba tamaku Isaac
kona yabata si yewo,
ba God wai kau aba potapota au yawasa ereonowanai
yepo karaku nina,
16 ba goyona ereonowanai aneya i taraparaniku wai,
nikosi sebasebare gunaguna ini gairenisi.
Ba yauku kau wabai sina yorisi
ba yebo tamatamaku Abraham ba Isaac kasi wabai.
Ba sini tuwa pesara wai niko dobu sini bonuwei.”
17 Ba maranai Joseph tamana kasauna Ephraim ku gayamina i terei wai kega i nuwagaire, wai tamana yarona Ephraim gayaminai i yauni Manasseh ku gayamina ita terei.
18 Ba Joseph kurina i wona, “Kega tama, yaro kasaum nikona gayaminai ke terei, kona i tupuwa kainao.”
19 Saba tamana i kaosaira ba i wona, “A kuiri natuku, a kuiri. Kona yebo dam kesana ba yebo ina rakata saki. Saba teina wai ina rakata saburere kega bage kona ba ana rakaraka kamonai dam pesarisi sina tupuwa.”
20 Kata kona kaonai i gairenisi ba i wona,
“Komi kami wabai, Israel ini gairena ba ina wona,
‘God, Ephraim ba Manasseh rutainisi ini gairenimi.’ ”
Kona kairavina Jacob, Ephraim i terei i nao ba Manasseh wai i muri.
21 Damanina ba Jacob, Joseph kurina i wona, “Yauku mara yoginai kei ba ana rabobo saba, God wai komi gwabimi yai, ba ina urabaim kona veramaga tamatamam asi ku kupura.”
Joseph natunatuna mutusi i yorisi ba i gairenisi wose muri yai ana rakaraka kurisi ina tupuwa wai i wonisi. Natuna Judah kurina nikona i wonei.