13
Ña kuꞌvi ini ña taxi Ndioxi ndaꞌa yo kuvi ña chee va
1 Ra vaꞌa ni na kaꞌan va yu ndia ndia ka nuu tuꞌun ña xïni yo, xiꞌin tuꞌun ña kaꞌan na tatun Ndioxi, ndi su tu köo ña kuꞌvi ini ña taxi Ndioxi iyoo nima yu, saa ra ta kuꞌva iyoo iin kaa ña kaxan mii sana yuꞌu va iyoo yu, a ta iyoo iin kaa xiyo ña kaꞌa mii sana yuꞌu va tu iyoo yu.
2 Ra vaꞌa ni na ^kaꞌan tu yu tuꞌun ña ^taxi Ndioxi va, ra nii na kundaa ini tu yu xiꞌin takundiꞌi va ña iyoo seꞌé, ra nii na koo kuaꞌa ni tu ña xinituni va nuu yu, ra nii na kondiaa ni va ini yu Ndioxi ña kuvi kaꞌan yu xiꞌin iku ña ndasama ña nuu iin ña, ndi su tu köo ña kuꞌvi ini ña taxi Ndioxi iyoo nima yu, saa ra ^köo vaꞌa yaꞌvi ndiaa vi yu.
3 Ra vaꞌa nii na ndataꞌvi tu yu takundiꞌi va ñaꞌa ña iyoo nuu yu xiꞌin na ndaꞌvi, ra nii na ndataxi tu yu mii yu ña koko yu xaꞌa va na, ndi su tu köo ña kuꞌvi ini ña taxi Ndioxi iyoo nima yu, saa ra ^köo yaꞌvi ndiaa vi ña sa yu saa.
4 Yuvi na iyoo ña kuꞌvi ini ña taxi Ndioxi nima, ra xa ndiee va ini na, ra tiayu ni tu ini va na, ra kuëe ndukuini tu ini va na; ra nii kuëe kutiaa va tu na, ra nii kuëe xa xini ni va tu na.
5 Ra nii kuëe xa iku va tu na, ra nii kuëe kutiayu tu na xiꞌin mii va na; ra nii kuëe saa kama va tu na, ra nii kuëe tuku tuku tu ndakaꞌan na xaꞌa ña väꞌa ña xa inka yuvi xiꞌin va na.
6 Ra nii kuëe kusii tu ini na xiꞌin yuvi na xa kuachi va, chi ña ndaku va kuvi ña kusii ini na xiꞌin.
7 Ra nii kuëe xikutuvi tu na ña kuꞌvi ini na inka va na, ra nii kuëe xikutuvi tu na ña kondiaa ini va na na, ra nii kuëe ndakoo ndaꞌa va tu na na, ra xa ndiee va ini na xiꞌin na xaꞌa ña ^xa na xiꞌin na.
8 Ra ña kuꞌvi ini ña taxi Ndioxi, ra ndia ndixaa kii ndia ndixaa tiempo va ke koo ña. Ndi su vaxi kii, ra küvi ka vi kaꞌan ndoso na tuꞌun ña ^taxi Ndioxi, ra nii käꞌan ka tu na ndia ndia ka tu nuu tuꞌun ña xïni va yo, ra nii ña xinituni kumäni ka tu nuu va na.
9 Ra na kundaa ini ndo, chi vichin ra loꞌo ni va ke xíní yo, ra saa tu ña káꞌán yo tuꞌun ña taxi Ndioxi va, saa chi iin ñaꞌñu loꞌo va kuvi ña ^kundaa ini yo xiꞌin.
10 Ndi su ta xa na xaa kii ña koo takundiꞌi ñaꞌa ta kuꞌva kuni mii Ndioxi, saa ra ndiꞌi va xaꞌa ña xinituni ña yii ña taxi Ndioxi ndaꞌa yo.
11 Ra na kaꞌan yu iin ña xiꞌin ndo ra kundaa ini ndo, ta ndixiyo loꞌo yu, ra ta ^ndatuꞌun na kuachi va ndatuꞌun yu, ra ta ^ndakani ini na kuachi tu ndakani ini va yu, ra ta ^kiꞌin xini na kuachi tu kiꞌin xini va yu; ndi su ta xa ndixinu tiaa yu, saa ra ndakoo va yu takundiꞌi chiñu ña xa yu ta ndixiyo loꞌo yu.
12 Ra kuꞌva saa va ke ndoꞌo yo vichin, saa chi ta kuꞌva ndoꞌo yuvi na xitoꞌni nuu yuu tata, ra iin xaña xaña va xini na mii na, ra saa va ke ^ndoꞌo yo xiꞌin takundiꞌi ñaꞌa vichin; ndi su vaxi kii ra iin kaxi kaxi va kundaa ini yo xaꞌa takundiꞌi ñaꞌa. Vichin, ra loꞌo va ñaꞌa kundaa ini yo xaꞌa, ndi su vaxi kii, ra iin ta kuꞌva kundaa kaxi ini mii Ndioxi xaꞌa va yo, saa kundaa kaxi ini yo xaꞌa takundiꞌi va ñaꞌa sa ra.
13 Ra xa ta kachi yu ke iyoo va ña, chi ña ndiꞌi xaꞌa va kuvi sava ñaꞌa, ndi su ndïꞌi vi xaꞌa ña ndiaa ini yo Ndioxi, xiꞌin ña ndiatu yo ndakiꞌin yo ña taxi ra, xiꞌin ña kuꞌvi ini ña taxi ra ndaꞌa yo, ra ña chee vaꞌa nuu ña yoꞌo kuvi ña kuꞌvi ini ña taxi Ndioxi ndaꞌa va yo.