5
Xa xatiaa va yo nuu ña yuuvi yoꞌo
1 Ra takundiꞌi yuvi na kandixa Tata yo Jesús ña kuu ra Cristo, ra ndikaxin Tata yo Ndioxi kixi ndixiꞌi xaꞌa yo, ra na kan kuvi na kuu seꞌe Tata yo Ndioxi va; ra yuvi na kuꞌvi ini xini Tata yo Ndioxi, ra kuꞌvi tu ini na xini na yuvi na kuu seꞌe va ra.
2 Ra tu kuꞌvi ini yo xini yo Tata yo Ndioxi, ra kandixa tu yo ndiayu ña xaꞌndia ra nuu va yo, saa ra kuni kachi ña saa, ña kuꞌvi tu ini yo xini yo yuvi na kuu seꞌe va ra.
3 Ra xaꞌa ña kandixa yo ndiayu ña xaꞌndia Tata yo Ndioxi nuu va yo kuvi ña ndañaꞌa yo ña ndinuni ni kuꞌvi ini yo xini yo ra, ra ndiayu ña xaꞌndia ra nuu yo, ra kuëe uꞌvi ña kandixa yo ña.
4 Saa chi suꞌva va ke iyoo ña, takundiꞌi yuvi na xa nduu seꞌe Tata yo Ndioxi, ra xa ^xatiaa va na nuu ña väꞌa iyoo nuu ña yuuvi yoꞌo. Ra xaꞌa ña ndiaa ini yo Tata yo Jesucristo va kuvi ña ^kuchuun yo ^xatiaa yo nuu ña väꞌa kan.
5 Ra takua yuvi na ndinuni ni kandixa ña kuu Tata yo Jesús seꞌe Tata yo Ndioxi va kuvi na ^kuchuun ^xa tiaa nuu ña väꞌa, ña iyoo nuu ña yuuvi yoꞌo.
6 Ra ña vaꞌa kundaa ini yo ña kuu Tata yo Jesucristo seꞌe Tata yo Ndioxi, ra xaꞌa ña chichi ra tiakuii, xiꞌin xaꞌa ña ndixiꞌi ra ndika cruz ña ndixitia nii va ra kuvi ña; ra süvi takua tiakuii kuvi ra ndichichi ra, chi ndixitia tu nii va ra ndika cruz; ra mii Tachi Yii ke ndakuiin va xaꞌa Tata yo Jesucristo ña kuu ra seꞌe Tata yo Ndioxi, ra ña ndaa va ke kaꞌan ña.
7 Ra uni kuvi na ndakuiin xaꞌa ña yoꞌo ndivi ña kuu ña ña ndaa: Tata yo Ndioxi, xiꞌin Tuꞌun ra, xiꞌin Tachi Yii ra; ra iin tuꞌun uni saa va na.
8 Ra uni kuvi tu ña ndakuiin xaꞌa ña nuu ña yuuvi yoꞌo va: Tachi Yii, xiꞌin tiakuii, xiꞌin nii; ra iin kuvi tu ña yoꞌo va.
9 Yoo, ra kandixa va yo yuvi taꞌan yo te ndatuꞌun na xaꞌa ndia ndia ka ñaꞌa xiꞌin yo, ra xaꞌa ña kan ke xiniñuꞌu ni ka va na kandixa yo tuꞌun ña ndatuꞌun Tata yo Ndioxi xiꞌin yo, saa chi ndiaa yaꞌvi ni ka va ña kan; saa chi xaꞌa seꞌe va ra kuvi ña ndakani ra nuu yo.
10 Ra yuvi na kandixa ña kuu Tata yo Jesucristo seꞌe Tata yo Ndioxi, ra kundaa kaxi va ini na xaꞌa tuꞌun ña vaꞌa ña ndiñaꞌa Tata yo Ndioxi ña kuu ña ña ndaa. Ndi su yuvi na kuëe kandixa tuꞌun vaꞌa ña ndiñaꞌa ra nuu na, ra ña xa na kan ke kaꞌan na ña kuu ra ra chiꞌña tuꞌun va, saa chi xïin na kandixa na tuꞌun ña ndakani ra nuu na xaꞌa seꞌe ra.
11 Ra ña ^ndakani Tata yo Ndioxi nuu yo, ra xaꞌa ña taxi ra ña kutiaku yo ndia ndikaa ndikuꞌun va kuvi ña, ra ña kuvi ndaniꞌi yo ña kutiaku yo kan, ra xaꞌa ña xa Tata yo Jesucristo, ra kuu seꞌe va ra kuvi ña.
12 Ra xaꞌa ña kan ke yuvi na itaꞌan xiꞌin seꞌe Tata yo Ndioxi, ra niꞌi va na kan ña kutiaku na ndia ndikaa ndikuꞌun; ndi su yuvi na kuëe itaꞌan xiꞌin seꞌe ra, ra nïꞌi vi na kan ña kutiaku na ndia ndikaa ndikuꞌun.
Sandiꞌi ra Juan kaꞌan ra xiꞌin na veꞌe ñuꞌu
13 Ra tutu yoꞌo kuvi ña tiaa yu ña kuxaa ña nuu ndoꞌo na ñani yo, na xa kandixa ña kuu Tata yo Jesucristo seꞌe Tata yo Ndioxi, ña vaꞌa na kundaa kaxi ini ndo ña niꞌi va ndo ña kutiaku ndo ndia ndikaa ndikuꞌun.
14 Ra xa kundaa kaxi va ini yo, chi te nduku yo ña vaꞌa ña kuni mii Tata yo Ndioxi nuu ra, ra xini va soꞌo ra ña kaꞌan yo xiꞌin ra.
15 Ra ña xa kundaa kaxi ini yo ña xini va soꞌo Tata yo Ndioxi te nduku yo ndia ndia ka ñaꞌa nuu ra, saa ra kundaa kaxi tu ini yo ña ndakiꞌin yo takundiꞌi va ñaꞌa ña ^nduku yo nuu ra.
16 Ra tu ndia ndo kundaa ini xaꞌa iin na ñani yo ña xa na iin kuachi ña kuëe kuchuun sandiꞌi vaꞌa xaꞌa na, saa ra na kaꞌan ndo xiꞌin Tata yo Ndioxi xaꞌa va na, ra sakaku va ra na. Ndi su tu kuachi ña kuvi sandiꞌi vaꞌa xaꞌa va na kuvi tu ña xa na, ra käꞌan vi yu xiꞌin ndo ña na kaꞌan ndo xiꞌin Tata yo Ndioxi ña sakaku ra na.
17 Ra takundiꞌi chiñu kiꞌvi ña xa yuvi nuu Tata yo Ndioxi, ra kuachi va kuvi ña; ndi su süvi takundiꞌi ña ke sandiꞌi vaꞌa xaꞌa na.
18 Ra xa kundaa ini yo, chi yuvi na xa ndakundikun Tata yo Ndioxi ña nduu ra Iva na, ra kuëe xa ka na chiñu kiꞌvi; saa chi Tata yo Jesucristo, ra kuu seꞌe Tata yo Ndioxi va kuvi ra ndiaa na, ña kan ke ^kuchüun ka timiaꞌa sa ri ndia nii ñaꞌa xiꞌin na.
19 Ra xa kundaa va ini yo, chi yoo, ra kuenda Tata yo Ndioxi va kuvi yo, ra takundiꞌi ka yuvi na ndee nuu ña yuuvi yoꞌo, ra timiaꞌa va kuvi ri xaꞌndia chiñu nuu na.
20 Ra xa kundaa tu ini yo ña kixi ra kuu Seꞌe Tata yo Ndioxi va, ra ra kan kuvi ra taxi ña xini tuni yo ña vaꞌa na tandiaa yo kutaꞌan yo xiꞌin Tata yo Ndioxi, ra ndaa. Ra vichin, ra itaꞌan va yo xiꞌin Tata yo Ndioxi, ra ndaa, saa chi itaꞌan tu yo xiꞌin Tata yo Jesucristo ra kuu seꞌe va ra. Ra Tata yo Jesucristo kuvi ra kuu Tata yo Ndioxi, ra ndaa va, ra ra kan kuvi tu ra taxi ña kutiaku yo ndia ndikaa ndikuꞌun va.
21 Ñani yo, na iyoo ta kuꞌva iyoo seꞌe yu, na kundïkun ndo naꞌna ña kuu ndioxi ndii. Saa koo.