17
Kaꞌan Jesús xiꞌin Ndioxi xaꞌa ndia itaꞌan xiꞌin ra
1 Ra te ndiꞌi ndikaꞌan Jesús tuꞌun yoꞌo, ra saa ndoniꞌi ra nuu ra chi ndivi, ra ndikaꞌan ra xiꞌin Ndioxi kachi ra saa:
―Tata, vichin ke ndixaa kii ña na ndañaꞌa kun yuꞌu, ra kuu seꞌe kun nuu yuvi ra na kundaa ini na ña kaꞌnu ni yu, ra ndañaꞌa tu yuꞌu va yoꞌo nuu na, ra kundaa ini na ña kaꞌnu ni kun.
2 Saa chi yoꞌo kuvi ra taxi takundiꞌi ndiayu ndaꞌa yu, ña kaꞌndia chiñu yu nuu takundiꞌi na yuuvi, ra taxi yu ña kutiaku takundiꞌi na taxi kun ndaꞌa yu ndia ndikaa ndikuꞌun.
3 Ra ña vaꞌa na niꞌi na ña kutiaku na ndia ndikaa ndikuꞌun, kuvi ña xiniñuꞌu kuni taꞌan vaꞌa na xiꞌin indaa mituꞌun yoꞌo va Tata Ndioxi, ra ndaa, ra saa tu yuꞌu, ra kuu Jesucristo ra tiꞌvi kun xaa ña yuuvi yoꞌo va.
4 ’Ra xa ndañaꞌa va yu yoꞌo nuu na yuuvi ña kaꞌnu ni kun, xaꞌa ña xa saxinu yu takundiꞌi chiñu ña xaꞌndia kun nuu yu sa yu.
5 Ra vichin ke na ndataxi tuku kun ndiee ña xa xikuu mii yu ndaꞌa yu, Tata, xa ta kuꞌva ndixiyo ndiee yu xiꞌin kun ta kumani ka kukava xaꞌa ña yuuvi yoꞌo.
6 ’Ra xa ndañaꞌa va yu yoꞌo, nuu na ndakaxin kun tiañu na yuuvi yoꞌo, ra kuenda yoꞌo va kuvi na, ra taxi kun na ndaꞌa yu, ra ^kandixa va na tuꞌun kun.
7 Ra vichin, ra takundiꞌi ñaꞌa ña ^taxi kun ndaꞌa yu, ra ^kundaa va ini na xaꞌa ña ña kuu ña kuenda kun.
8 Ra tuꞌun ña taxi kun ndaꞌa yu ke sañaꞌa va yu na; ra xiin va na kandixa na ña, ra kundaa kaxi va ini na ña kee yu nuu iyoo kun, ra ^kandixa tu na ña tiꞌvi kun yuꞌu xaa va yu.
9 ’Ra xaku ndaꞌvi yu nuu kun xaꞌa takua na itaꞌan xiꞌin va yu, ndi su xäku ndaꞌvi vi yu xaꞌa na yuuvi yoꞌo, saa chi takua na taxi kun ndaꞌa va yu kuvi na kaꞌan yu xaꞌa xiꞌin kun; saa chi kuenda yoꞌo va kuvi na.
10 Ra takundiꞌi na itaꞌan xiꞌin yu kuvi na kuu kuenda va kun, ra takundiꞌi na kuu kuenda yoꞌo, kuvi tu na itaꞌan xiꞌin yuꞌu va; ra xaꞌa ña xa na yoꞌo ke ndukaꞌnu ni tu yuꞌu va.
11 ’Yuꞌu, ra köo ka yu nuu ña yuuvi yoꞌo, ndi su na yoꞌo, ra kundee va na, ra yuꞌu tu xa xaa koo xiꞌin yoꞌo va Tata Ndioxi, ra yii. Ra na taxi kun ndaꞌa yu, ra na kondiaa kun na xiꞌin kivi kun, ña kuu mii ndiee, ra iin tuꞌun na kuu na xiꞌin taꞌan na, ta kuꞌva iyoo yoꞌo xiꞌin yuꞌu.
12 Ra te ndixiyo yu xiꞌin na taxi kun ndaꞌa yu nuu ña yuuvi yoꞌo, ra xiꞌin ndiee va kun ke xindiaa yu na; ra ndia nii na nindoñüꞌu sa yu, chi takua ra xa iyoo tuꞌun xaꞌa ndoñuꞌu va kuvi ra nindoñuꞌu, ra saa ke kuu va ña vaꞌa na xinu nuu tuꞌun kun ña kaꞌan xaꞌa ra.
13 ’Ra vichin, ke nandiko yu xaa yu nuu iyoo kun, ra ña íin ka yu xiꞌin na nuu ña yuuvi yoꞌo vichin, ke kaꞌan ka yu tuꞌun yoꞌo xiꞌin va na, ña vaꞌa na kusii ini na ta kuꞌva kusii ini yuꞌu.
14 Ra xa ndatuꞌun va yu tuꞌun kun xiꞌin na itaꞌan xiꞌin yu, ndi su na yuuvi yoꞌo ra kundasi va na na, saa chi süvi ka kuenda na yuuvi yoꞌo kuvi na, ra saa tu yuꞌu va chi süvi kuenda na yuuvi yoꞌo kuvi yu.
15 Ra käꞌan yu xiꞌin kun, ña tava kun na itaꞌan xiꞌin yu tiañu na yuuvi yoꞌo, chi ña nduku yu nuu kun ke na kondiaa kun na nuu timaꞌa va.
16 Saa chi süvi ka kuenda na yuuvi yoꞌo kuvi na, ra saa tu yuꞌu va chi süvi kuenda na yuuvi yoꞌo kuvi yu.
17 Ra xiꞌin ña ndaa ña kuu mii kun ke, na ndakaxin kun na, ña sachiñu na nuu kun, saa chi tuꞌun kun ra ña ndaa va kuvi ña.
18 Ra ta kuꞌva xa kun ña tiꞌvi kun yuꞌu xaa yu nuu ña yuuvi yoꞌo, ra saa ke sa tu yuꞌu va, ña tiꞌvi yu na yoꞌo kuꞌun na nuu na yuuvi yoꞌo.
19 Ra xaꞌa na yoꞌo ke ^ndataxi yu mii yu ndaꞌa kun, ña vaꞌa na ndasayii ña ndaa ña kuu mii kun na.
20 ’Ndi su süvi takua xaꞌa na yoꞌo ke kaꞌan yu xiꞌin kun, chi ^kaꞌan tu yu xiꞌin kun xaꞌa takundiꞌi na kandixa yuꞌu, na kaꞌan ndoso na itaꞌan xiꞌin yu nuu, kii ña vaxi va.
21 Ra saa ke, iin tuꞌun na nduu takundiꞌi va na, ta kuꞌva iyoo yoꞌo xiꞌin yuꞌu, Tata, ña kuu yo iin va, ra saa ke na koo tu na yoꞌo va, ña iin va na nduu na xiꞌin yo. Ra saa ke vaꞌa na kandixa na yuuvi yoꞌo, ña tiꞌvi kun yuꞌu xaa yu.
22 Ra ña kaꞌnu, ña taxi kun ndaꞌa yu kuvi ña ndataxi tu yuꞌu va ndaꞌa na yoꞌo, ña vaꞌa iin tuꞌun na nduu na, ta kuꞌva iyoo yoꞌo xiꞌin yuꞌu, ña kuu yo iin va.
23 Ra yuꞌu kuvi ra íin xiꞌin na yoꞌo, ra yoꞌo kuvi tu ra íin xiꞌin yuꞌu va, saa chi saa ke vaꞌa ndinuni ni kutaꞌan na xiꞌin taꞌan na, ña vaꞌa na kundaa ini na yuuvi yoꞌo, ña tiꞌvi kun yuꞌu, xaa yu nuu ña yuuvi yoꞌo, saa chi ^kuꞌvi ni ini kun xini kun na, ta kuꞌva ^kuꞌvi ini kun xini kun yuꞌu.
24 ’Ra na taxi kun ndaꞌa yu yo̱ꞌo̱, Tata, ra kuni yu ña na kundee na xiꞌin yu nuu koo yu, ra saa ke vaꞌa na kuni na ña kaꞌnu, ña taxi kun ndaꞌa yu; saa chi yoꞌo kuvi ra xa kuꞌvi ni ini xini yuꞌu te täan kukava xaꞌa ña yuuvi yoꞌo vi.
25 Tata, yoꞌo kuvi ra ^xa ña ndaku, ra na ndee nuu ña yuuvi yoꞌo, ra xïni vi na yoꞌo, ndi su yuꞌu, ra xini va yu yoꞌo, ra na itaꞌan xiꞌin yu, ra kundaa va ini na ña tiꞌvi kun yuꞌu xaa yu.
26 Ra xa ndikaꞌan va yu xiꞌin na itaꞌan xiꞌin yu, yoo kuvi kun, ra kaꞌan ka tuku va yu xiꞌin na, yoo kuvi kun, ra saa ke vaꞌa na kuꞌvi ini na kuni taꞌan na ta kuꞌva kuꞌvi ini kun xini kun yuꞌu, ra kuiin tu mii yu xiꞌin va na ―kachi Jesús xiꞌin Tata ra Ndioxi.