9
Ndioxi kuvi ra ndikaxin na ñuu Israel
1 Ra na kundaa ini ndo, chi ña ndaa va ke kaꞌan yu xiꞌin ndo, chi Cristo va kuvi ra ndakuiin xaꞌa yu; saa chi mii va Tachi Yii kuvi ña taxi ña xini tuni yu, ra kaꞌan tu ña xiꞌin yu, ña ^kaꞌan yu ña ndaa va.
2 Ra tiaa ni kusuchi ini yu, ra iin takundiꞌi va kii ke taꞌvi nima yu xaꞌa na ñuu yu Israel,
3 ra xaꞌa ña kan ke ^xiin va yu ña ndataxi yu mii yu, ña na tavi chiꞌña yuꞌu, ra ^xiin tu yu kuxika yu nuu Tata yu Cristo va tu kuvi chindiee taꞌan yu xiꞌin na xaꞌa ña sa yu ña yoꞌo. Saa chi na ñuu yu,
4 na kuu ndiseꞌe ra Israel, ra ndakiꞌin mani va Ndioxi na ña nduu na seꞌe ra. Ra ndiñaꞌa tu ra ndiee kaꞌnu ña kuu mii ra nuu va na, ra kindoo tu ra xiꞌin ra Abraham ña kuu ra xii xikua va na, ra taxi tu ra ndiayu ra ndaꞌa va na, ra sañaꞌa tu ra na ña ndasakaꞌnu na ra xiꞌin ndinuni nima va na, ra kindoo tu ra xiꞌin na ña taxi ra kuaꞌa ni ñaꞌa vaꞌa ndaꞌa va na.
5 Ra ndiseꞌe na xii xikua na kuvi tu Cristo va xaꞌa ña nduu ra iki kuñu ña kixi ra nuu ña yuuvi yoꞌo, ra ra kan kuvi Ndioxi ra xaꞌndia chiñu nuu takundiꞌi va ñaꞌa, ra ra kaꞌnu ni va kuvi ra ndia ndikaa ndikuꞌun. Saa iyoo va ña.
6 Ra vichin na kundaa ini yo, ¿a ndisaxïnu Ndioxi nuu ña kindoo ra xiꞌin na ñuu Israel? Saxinu va ra. Saa chi süvi takundiꞌi na kuu ndiseꞌe ra Israel kuvi na ndixa kuu na ñuu Israel.
7 Ra nii na kuu tu ndiseꞌe ra Abraham, ra küni kachi ña saa, ña kuu iin takundiꞌi na seꞌe ra, chi suꞌva va ke kachi Ndioxi xiꞌin ra: “Seꞌe ra Isaac va kuvi na kuu ndiseꞌe kun”, kachi ra.
8 Ra xiꞌin ña kaꞌan yu xiꞌin ndo yoꞌo kuvi ña kundaa ini yo, chi kuëe nduu yuvi seꞌe Ndioxi xaꞌa ña kuu na seꞌe iin yuvi, chi na kindoo mii ra kaku, va kuvi na kuu seꞌe ra, ra ta xa kaku na, saa ra xinu va nuu tuꞌun ña ^kindoo ra.
9 Saa chi suꞌva va ke iyoo ña kindoo Ndioxi xiꞌin ra Abraham, ta kachi ra suꞌva xiꞌin ra: “Nuu ña iin kuiya nandiko yu, ra xa kaku va seꞌe ña Sara yasiꞌi kun”, kachi ra.
10 Ra süvi takua ña yoꞌo kuvi takundiꞌi ña, saa chi saa ndoꞌo tu ña Rebeca va, saa chi vaꞌa ni uvi kuvi va tiaa vali seꞌe ña kaku, ndi su indaa ra Isaac, xii xikua yo, kuvi iva uvi saa va ndia.
11 Ra nii chiñu vaꞌa, ra nii chiñu kiꞌvi ke täan sa vi ndia, ta ndikaxin Ndioxi ndia, saa chi ta ñuꞌù ndia tixi siꞌi vi ndia ke ndikaxin ra ndia, ra xiꞌin ña yoꞌo ke kundaa ini yo, chi süvi xaꞌa ña ^xa mii yuvi ke kana Ndioxi na, chi na kuni mii ra kana va ra, kuvi na kana ra.
12 Ra suꞌva va ke kachi Ndioxi xiꞌin ña Rebeca siꞌi ndia: “Seꞌe kun ra loꞌo kuvi ra, kaꞌndia chiñu nuu seꞌe kun ra chee va.”
13 Ta kuꞌva kachi tuꞌun Ndioxi ña tiaa na xinaꞌa, ña kachi suꞌva: “^Kuꞌvi ni va ini yu xini yu ra Jacob, ra kundasi va yu, ra Esaú”, kachi Ndioxi.
14 ¿Ra ni ke ^kachi yo vichin? ¿A ra väꞌa kuvi Ndioxi ña xa ra saa? ¡Süvi saa iyoo ña!
15 Saa chi suꞌva va ke kachi Ndioxi xiꞌin ra Moisés xinaꞌa: “Takua yuvi na kuni mii va yu kuvi na, kundaꞌvi ini yu kuni yu, ra takua yuvi na kuni mii yu kuvi tu kuꞌvi ini va yu”, kachi ra.
16 Ña kan ke na kundaa ini yo, chi süvi ña kuni mii yuvi ke ^ndakiꞌin mani Ndioxi na, ra nii süvi tu xaꞌa ndiee va na ke ndakiꞌin ra na, chi takua na kundaꞌvi ini mii ra xini va ra, kuvi na ndakiꞌin mani ra.
17 Ra xa kundaa va ini yo, chi mii saa ke kachi tu Ndioxi xiꞌin ra rey ñuu Egipto va, ta ndikaꞌan ra xiꞌin ra kachi ra suꞌva: “Ña taxi yu ndiayu ndaꞌa kun ña kuu kun rey, ra ña vaꞌa na ndañaꞌa yu takundiꞌi ndiee yu ña sandoꞌo yu yoꞌo va kuvi ña, saa chi saa kuvi tu ña kuvi kundaa ini takundiꞌi yuvi xaꞌa va yu”, kachi ra xiꞌin ra, ^kachi tuꞌun Ndioxi.
18 Ra xiꞌin ña yoꞌo ke kundaa ini yo, chi Ndioxi, ra na kuni mii va ra kuvi na kundaꞌvi ini ra xini ra, ra na kuni ra ndasandaku ra ini, ra ^ndasandaku ra ini va na.
19 Ra tu sava tu ndo, na kaꞌan xiꞌin yu, kachi ndo saa: “Tu saa va iyoo ña, ¿ra nichuun ke kaꞌan Ndioxi ña iyoo kuachi yuvi tu mii va tu ra kuvi ra ndasandaku ini na, ña xïin na nandiko ini na nuu ra? ¿Ra yoo kuvi na kuchuun kasi nuu chiñu ña kuni Ndioxi?”, na kachi ndo.
20 Ra na kundaa ini ndo, chi küvi kachi yo saa, saa chi ndia nii yuvi kuchüun ^sakuachi xiꞌin Ndioxi. Saa chi iin kisi ñuꞌú, ra küvi vi kaꞌan kuachi ña nuu tiaa ra xavaꞌa ñaꞌa, ña kachi ña saa: “Väꞌa ndixa kun, saa chi kusïi ini yu kuꞌva ña xavaꞌa kun yuꞌu”, kachi ña.
21 Ra na kundaa ini ndo, chi mii va tiaa ra ^xavaꞌa kisi kuvi ra iyoo ndiayu ndaꞌa, ra ta kuꞌva kuni mii va ra ke xavaꞌa ra kisi xiꞌin ndiaꞌyu ña tiin ra; ra suvi xiꞌin mii ndiaꞌyu kan ke kuvi savaꞌa ra iin kisi ña savi, ra kuvi tu savaꞌa ra iin kisi, ña núu va.
22 Ra kuꞌva saa ke iyoo tu Ndioxi va xiꞌin na yuuvi yoꞌo, saa chi vaꞌa ni ndixiyo va ndiayu ra ña ndañaꞌa ra, ña sáa̱̱ ra xiꞌin ndiee ra, nuu yuvi na kuni ra sandoꞌo ra, na iyoo ta kuꞌva iyoo kisi ñuꞌu ña núu, ndi su ^xa kaꞌnu ni va tu ini ra xaꞌa na.
23 Ra suꞌva ke xa Ndioxi ña ndañaꞌa ra, ña kaꞌnu ni ña kuu mii ra nuu yuvi, na iyoo ta kuꞌva iyoo kisi ñuꞌu, ra ndia kii xaꞌa vi kuvi ña kundaꞌvi ini ra xini ra na, ra ndikaxin ra na, ña koo na xiꞌin ra nuu iyoo ra.
24 Ra yuvi na ndakaxin Ndioxi, ndia ta kii xaꞌa kan kuvi yoo va, ra süvi takua yoo na judío kuvi na nindakaxin ra, chi ndakaxin tu ra na küu judío va.
25 Ta kuꞌva kachi tuꞌun Ndioxi ña tiaa ra Oseas, ra ndikaꞌan ndoso tuꞌun yuꞌu Ndioxi xinaꞌa, ña kachi suꞌva:
Na ñuu, na ndixiküu kuenda yu, ra na ñuu mii va yu nduu na,
ra na ñuu, na küꞌvi ini yu xini yu, ra ndakuꞌvi va ini yu kuni yu na.
26 Ra ñuu nuu ndikaꞌan yu xiꞌin yuvi, kachi yu suꞌva: “Süvi na ñuu yu kuvi ndoꞌo”, kachi yu
ra na kan kuvi na nduu seꞌe Ndioxi ra tiaku va,
^kachi ña, tiaa ra Oseas.
27 Ra ndikaꞌan tu ra Isaías, ra ndikaꞌan ndoso tuꞌun yuꞌu Ndioxi va xaꞌa na Israel, kachi ra suꞌva: “Vaꞌa ni iin ta kuaꞌa yuti yuꞌu tiañuꞌu va, saa kuaꞌa na ndiseꞌe na Israel, ndi su loꞌo va kuvi na kuchuun kaku.
28 Saa chi kama ni va sandaku Ndioxi kuachi xiꞌin na yuuvi yoꞌo, ra iin ta iyoo mii chiñu ña ^xa na ke ndakiꞌin na yaꞌvi na xaꞌa, sa va ra”, kachi ra Isaías.
29 Ra xa suvi mii xaꞌa ña yoꞌo ke, ndikaꞌan ra Isaías ta yachi, ta kachi ra suꞌva va:
Tu kuëe ndisakaku tata yo Ndioxi ra kaꞌnu, sava na taꞌan yo,
saa ra xa ta ndoꞌo na ñuu Sodoma,
xiꞌin na ñuu Gomorra ña ndiꞌi xaꞌa va na ke ndoꞌo yo,
kachi ra.
Na judío ra ndixïndiaa vi ini na Ndioxi
30 Ra na kundaa ini ndo, chi suꞌva va ke iyoo ña kaꞌan yo xaꞌa yoꞌo, saa chi yuvi na küu judío, ra ni ndiätu ini na, ña nduu na ta kuꞌva iyoo yuvi na köo kuachi, ra na kan va kuvi na ndakiꞌin mani Ndioxi, ra nduu na ta kuꞌva iyoo yuvi na köo kuachi va, xaꞌa ña ndiaa ini na ra.
31 Ndi su mii na Israel, na xindiaa ni ini, ña nduu na ta kuꞌva iyoo yuvi na köo kuachi nuu Ndioxi, xaꞌa ña xindikun na ndiayu Ndioxi ña ndakoo ra Moisés, ra nindakïꞌin mani vi tu ra na kan.
32 ¿Ra nichuun ke ndoꞌo na saa tuvi ndo? Saa ndoꞌo na, saa chi ña xa na ke kuni na nduu na ta kuꞌva iyoo yuvi na köo kuachi nuu Ndioxi xaꞌa ña saxinu na ña kaꞌan ndiayu Ndioxi ña ndakoo ra Moisés va, ndi su ndixïndiaa ini vi na mii Ndioxi. Ra xaꞌa ña kan ke kakiꞌi va na xa “yuu ña ^sakakiꞌi yuvi”.
33 Ta kuꞌva kachi mii tuꞌun Ndioxi ña tiaa na ta yachi, ña ^kachi suꞌva:
Na kundaa ini ndo, chi ^tiꞌvi yu iin tiaa, ra xaa ra ñuu Jerusalén,
ra ta kuꞌva iyoo yuu ña sakakiꞌi yuvi, a ña sanduva yuvi va ke koo ra,
Ra yuvi na kandixa tiaa kan, ra ndakäva vi ini na kan, saa chi ndaköo ndaꞌa ra na, ^kachi ña.