5
Iin tutu ña isuvi xiꞌin iin ndikachi loꞌo
1 Ra xini yu, ra ra ^nduꞌu nuu tiayu kaꞌnu kan, ra chi ndaꞌa kuaꞌa ra ke ^niꞌi ra iin tutu ña isuvi, ra uvi saa xiyo nuu ña ke ndikaꞌyu tuꞌun, ra nuꞌni ndoso toko ña, ra iyoo uxa kuꞌva ña kuu tuni ña, ña nani sello.
2 Ra xini yu iin ra tatun Ndioxi, ra ndaku ni, ra ndiee ka vi ndikaꞌan ra kachi ra saa:
―¿Yoo kuvi na yii, na niniꞌi taꞌvi, ña ndaxí na tuni ña nuꞌni toko tutu yoꞌo, ra ndakani na ña? ―^kachi ra.
3 Ndi su ndia nii na köo, nii ndivi, ra nii nuu ñuꞌu, ra nii chi tixi ñuꞌu köo na kuchuun ndakani tutu kan, ña kaꞌvi na ña.
4 Ra ^xaku ni yu, saa chi ndia nii na köo nindakoyo ña ndakani na tutu kan ña kaꞌvi na ña.
5 Ra saa ndikaꞌan iin ra xikuaꞌa kan xiꞌin yu kachi ra saa:
―Xäku ni kun chi ra kuu iin ndikaꞌa ra ku kuenda ra Judá, ra kuu ndiseꞌe ra Rey David, ra kan kuvi ra xakanaa, ra iyoo ichi ra ña ndakani ra tutu yoꞌo, ra ndaxí ra uxa saa tuni ña kuu sello ña ―*kachi ra xiꞌin yu.
6 Ra saa ndakotoꞌni yu ra xini yu tiañu tiayu kaꞌnu kan, xiꞌin tiañu kumi saa ña tiaku kan, xiꞌin tiañu na xikuaꞌa kan, ra xini yu ndichi iin ndikachi loꞌo, ra takaa ri xaꞌni na ndisoko na, saa kaa ri; ra iyoo uxa ndiki ri, ra iyoo tu uxa tinuu va ri; ra uxa saa tinuu ri yoꞌo kuvi uxa tachi ña kuu kuenda Ndioxi ña tiꞌvi ra vaxi iinii saa kuvi ña yuuvi yoꞌo.
7 Ra saa ndixaa ra kuu ndikachi loꞌo kan nuu ra ^nduꞌu tiayu kaꞌnu kan, ra kiꞌin ra tutu ña ^tiin ra chi ndaꞌa kuaꞌa ra.
8 Ra te ndakiꞌin ra tutu kan, saa ra ndikun ndakusiti kumi saa ña tiaku kan xiꞌin oko kumi saa na xikuaꞌa kan nuu ra kuu ndikachi loꞌo kan, ra ^niꞌi takundiꞌi na arpa xiꞌin xikoo vali ña oro, ra iin chitu ndaa ña xiꞌin xuxa vaꞌa; ra xuxa vaꞌa kan ke kuu tuꞌun ña kaꞌan na yii na ndikun ichi Ndioxi xiꞌin ra.
9 Ra ^xita na iin yaa yii, ña xaa, nuu ra kuu ndikachi loꞌo kan, ^kachi na saa:
Yoꞌo kuvi ra iyoo ichi ña ndakiꞌin kun tutu yoꞌo,
ra ndaxi kun tuni ña kuu sello ña nuꞌni ña;
chi yoꞌo kuvi ra xaꞌni na, ña ndisoko na yoꞌo,
ra xiꞌin ni̱i̱ kun ke sakaku kun
takundiꞌi nuu yuvi,
xiꞌin na kaꞌan ndia ndia ka nuu tuꞌun,
xiꞌin takundiꞌi ñuu vali,
xiꞌin takundiꞌi ñuu naꞌnu ña iyoo nuu ña yuuvi yoꞌo.
10 Ra ndasa kun na rey xiꞌin sutu nuu Iva yo Ndioxi
ra kaꞌndia na chiñu nuu ña yuuvi yoꞌo kii ña vaxi
^kachi na ^xita na.
11 Ra saa ndakotoꞌni yu ra xini soꞌo yu tachi na tatun Ndioxi, ra kuaa ka vi kuvi na, ra nii köo kundiee kaꞌvi ñaꞌa, ra iin xinunduu na nuu íin tiayu kaꞌnu, nuu xa ^ndita kumi ña tiaku kan xiꞌin na xikuaꞌa na oko kumi kan.
12 Ra ndiee ka vi kaꞌan na ^kachi na saa:
Ra kuu ndikachi loꞌo, ra ndoꞌo ni, ra ndisoko na ra
Ra ra kan kuvi ra ku mii ndiayu niniꞌi taꞌvi ña ndakiꞌin ra ndiee
xiꞌin ña kuika, xiꞌin ña ndichi, xiꞌin ña ndaku,
xiꞌin ña toꞌo, xiꞌin ña kaꞌnu, xiꞌin ña kañuꞌu na ra,
^kachi na.
13 Ra xini tu soꞌo yu ña kaꞌan takundiꞌi ñaꞌa ña xavaꞌa Ndioxi ña ndee ndivi, xiꞌin ña ndee nuu ñuꞌu, xiꞌin ña iyoo chi tixi ñuꞌu, xiꞌin ña ñuꞌu ini tiañuꞌu, ra ^kachi ña saa:
Na ndasakaꞌnu yo ra ^nduꞌu nuu tiayu kaꞌnu
xiꞌin ra kuu ndikachi loꞌo
saa chin kuenda ndia kan va kuvi ña toꞌo,
ña kaꞌnu, xiꞌin ña ku ndiee
ndia ndikaa ndikuꞌun,
^kachi ña.
14 Ra saa ndikaꞌan kumi saa ña tiaku kan ^kachi ña saa:
―¡Ndixa, saa ke iyoo va ña! ―kachi ña.
Ra ndakusiti tu oko kumi saa ndia xikuaꞌa kan va, ra ^ndasakaꞌnu ni na ra tiaku ndiaa ndikaa ndikuꞌun.