11
Pe²jah³la² wãn³txa² yxo²ĩ²sxã³ hxi²kan¹te²nãu³xa² ĩ³hen³txi³jau³su²
Jã¹nxe³jau³su² u²lxi³ ha³ta̱³nxe³ha²kxai³ yxo²ĩ²tũ̱³ka̱³txa² Ju³te²a²ko³xa² yxau²xai³tũ̱³ka̱³txan²tu̱³ nxe³jau³jau¹xai²na² ain³kxi² a³pos²to³lo² nũ̱³ka̱³txa² ain³kxi² nxe³ain¹ta¹hxai²hẽ¹la². Nxe³te³nah¹lxi¹:
— Ju³te²a² nũ̱³ka̱³txi³sxa³te²a² Txa²wã¹sũ̱³na² wãn³txa² ain³kxi²sxã³ sa²yxo²we¹tain¹nũ²nhai¹. Ain¹ta¹hxai²hẽ¹la². 2-3 Nxa²ha¹te¹ Pe²jah³lai²na² sa²kxai³lu² Je³ru³sa³lẽ²thĩ³na² ã³wih¹ta¹hxai²hẽ¹la². ówih¹nxa²ha¹te¹ Ju³te²a² nũ̱³ka̱³txa² yxo²ĩ²te²an²tu̱³ ĩ³ye³kxain¹te³nah¹lxi¹:
— Pe²jah³lãi³. Ju³te²a² nũ̱³ka̱³txi³sxa³te²na² sxi²ha² ã³wih¹ta¹hĩ¹nhẽ¹li¹. Nxe³kxa²yu³su² ĩ³yain³ya¹hain¹ta¹hĩ¹nhẽ¹li¹. Nxe³ju³tai²li² txa²wã¹nũ̱³ka̱³txi³sxa³ha²kxai³ wai³nxa³wi¹. Ain¹ta¹hxai²hẽ¹la².
Nxai¹nha²kxai³ Pe²jah³lo²nu¹ta²kxai³ wãn³txai²na² yxo²ha³kxa¹ nxe² ĩ³yau¹ũ³ta¹hxai²hẽ¹la².
Ĩ³yau¹ũ³te³nah¹lxi¹:
— Nxe³jah³lxi³sa²lxi¹. Ju¹tai²na² ĩ³yau¹ũ¹nx2ta¹tu¹wi¹. ówi¹lhĩ¹na² Jo³pe²thĩ³na² ha³la³ka³lxa³lo³na¹hĩ¹nai³tã² Txa²wã¹sũ̱³na² ĩ³ye³kxi²na¹tãu³a² hxi²sxã³nhot3sa²jut3sũ̱³ju³ta² ĩ²a¹hẽ³li¹. Ĩ²a¹ka³tu̱³ta¹ wã²la²ka³lo³hũ̱³ka³lo³a² kãin²ka³lo³a² oh³sĩ̱³na² a³ka³nxi²sxã³ ã³yu³lho¹je²na²hẽ³li¹. óyu³lho¹je²nũ²la² wã²lẽ¹nãu³ai²na² ka³yxuh³xa² ka³lxa¹txi³ wi²sxa³ye²na²hẽ³li¹. Ka³yxuh³xa² wi¹te²su² wi²sxa² ka³yxuh³xa² ko̱³te³su² wi²sxa² txih³xa² wi²sxa² a̱i³ka² wi²sxa² nxa²hẽ³li¹. A²nxe³hĩ¹na² oh³xan¹ta² e³jau³xai²na² ain³kxai¹na¹te³nah¹lxi¹: “Pe²jah³lãi³. Ĩ³sa²yxau³txu¹li¹. ónan³txa²sxã³ nũ̱¹hi̱³lhĩ¹txu¹li¹.” Sain¹na²hẽ³li¹. Nxe³sain¹nxa²ha¹te¹: “Ti³hex1sa²nxa³nhai¹. Ka³yxuh³xa² wi¹lxa³te²a² hai³txi³ hi̱³lhĩ²te²txã³wi¹.” Nxe³ai¹na¹hẽ³li¹. Nxa²ha¹te¹ oh³xan¹jau³xa² ãh¹ain³kxi²na¹te³nah¹lxi¹: “Ka³yxuh³xai²li² Txa²wã¹sũ̱³na² wi¹te²lo³jau³su² nxe³nxain¹kxai²nãn²tu̱³ ĩ³so¹jĩ²sẽ¹li¹. Ka³yxuh³xai²li² ko̱³nxe³te²lo³jau³su² ĩ³ye³txa³hẽ¹li¹.” Nxe³sain¹na²hẽ³li¹. 10 Te²yã¹nxe³jut3su² ye³ha¹li¹ ka³na³ki¹ ĩ³ye³kxi²xi²sain¹ka³tu̱³ sa²ka³la³so¹xi²na²hẽ³li¹. 11 Nxe³na¹tãu³a² in³txa² ha¹li¹ ka³na³ki¹ nxe³sxã³ Se²sa³re²a²thĩ³na² a³li³ain¹ka³tu̱³ sxi²ha² yxau³na¹thĩ³nai³tã² ã³si³tẽ³kxi²si¹hai¹na¹jau³su² ĩ³ye³kxi²sain¹na²hẽ³li¹. Nxe³sxã³ ye³jen¹nãu³a² ãn³si³tẽ³kxai¹na¹hẽ³li¹. 12 Nxe³ti̱³kxai³lu² Txa²wã¹sũ̱³na² A²yãu³ka³txa² ĩ³ye³kxi²sain¹te³nah¹lxi¹: “Ãn³si³tẽ³kxai¹nĩn¹ju³ta³nũ³a² hxi²waun³txi³txa³hẽ¹li¹. Hãi¹sxã³ ã³si³tẽ³kxi¹tain¹yah¹lxi³hẽ¹li¹.” Nxe³sain¹na²hẽ³li¹. Nxe³sain¹ju³tan¹te²kxa³ya̱³lhu² Se²sa³re²a²thĩ³na² ai³sĩ¹na¹hẽ³li¹. In³txa² yxo²ĩ²te²a² ha¹li¹ ha¹li¹ ha¹li¹ txai²na² nxe³sxã³ ã³si³tẽ³kxain¹sĩ¹na¹hẽ³li¹. Nxe³te³na¹ Ko³ne²lah³lai²na² sxi²ha² ã³tĩ̱³sxã³ ã³wih¹sĩ¹na¹hẽ³li¹. 13 Ã³wih¹sĩ¹na¹nxa²ha¹te¹ Ko³ne²lah³la² ĩ³ye³kxi²sain¹sĩn¹te³nah¹lxi¹: “A²wi¹lhĩ¹na² oh³xan¹jah¹lai²na² wxã³sxã³ txa²sxi²ha² ã³wih¹sxã³ ĩ³ye³kxi²sain¹te³nah¹lxi¹: ‘Nxex3sa²lxi¹. Jo³pe²thĩ³na² sa²si¹hã³txai¹nhẽ³li¹. A²nũ²a² Si³mãu² Pe²jah³la² ã³wxã³si¹hai¹nĩn¹jau³su² ĩ³ye³kxi¹txai¹nhẽ³li¹. 14 Nxe³jah¹lai²li² ĩ³ye³kxi¹nx2tain¹tu¹wi¹. Wãn³txa² wi¹jau³xa² ko̱³nxe³ti³ kãi³sxã³ yxau²xai³lyah³lxin¹kxa² yo³su² sa²wa²su¹kxi¹nx2ti³jau³nũ³xa² ĩ³yau¹ũ¹nx2tain¹tu¹wi¹. A²nxe³jau³xai²na² wxa²sxi²ha² yxau²xai³te²a² yxo²ha³kxa¹ ain³kxah¹lxin¹jau³nũ³ai²la¹wi¹.’ Nxe³sain¹na²hẽ³li¹.” Ko³ne²lah³la²kxai³lu² nxe³sa³na²hẽ³li¹. 15 Nxa²ha¹te¹ ã³wxã³na¹nũ²la² ĩ³yau¹ũ³ai¹na¹tãu³a² Txa²wã¹sũ̱³na² Yãu³ka³txa² ã³nxũ²kwa̱i³wi¹hain¹na²hẽ³li¹. ówih¹nẽ³lain¹ju³taix3 jã¹xain¹na²hẽ³li¹. 16 Nxe³kxe³su² Je³su²jah³lai²na² wãn³txa² ne³wãn²sa²jau³xai³tã² hĩ¹na² ain³kxi²xi²nha¹hẽ³li¹. Nxe³jau³xa²sa¹: “Jo³ãu² Ba³tis²jah³lai¹tã² ĩ̱³yau³xa² ũ³hũ¹kxi²sa²sai¹ain¹tai¹ti²tu³wi¹. Yxãn¹ta¹ ye³jen¹na² Txa²wã¹sũ̱³na² A²yãu³ka³txa² ĩ³hxi²kat1sa²sai¹nx2ti³tu¹wi¹.” Nxe³nẽ³lain¹tai¹ti²tu³wi¹. 17 Nxe³ha²kxai³ Ju³te²a² nũ̱³ka̱³txi³sxa³te²na² sa²kxai³lu² Txa²wã¹sũ̱³na² hi²sen³kxai³lu² A²yãu³ka³txa² ũ³hũ¹nẽ³kaix3 jã¹xain¹na³li¹, Txa²wã¹hxi²kan¹ta² Si³yxau³jah¹la² Je³su² Kris²tu³jah¹la² yxo²ĩ²ai¹nha²kxai³lu¹. Ai¹nha²kxai³ Txa²wã¹sũ̱³na² sa²yxo²ã³a¹jau³su² ten³sa²nxa³hẽ¹li¹. Nxe³na¹jau³su² tai²li² nxe³ye¹nx2ta¹wi¹. Pe²jah³lo²nu¹tai²na² nxe³ta¹hxai²hẽ¹la².
18 Nxa²ha¹te¹ a³pos²to³lo² nũ̱³ka̱³txa² nxe³jau³xai²na² ain³kxain¹nũ²la² hãi¹nxa¹sxã³ ĩ³kwa̱i²kxain¹ta¹hxai²nxa³hẽ¹la². Hãi¹nxe³sxã³ Sũ̱³na² sa²nẽn¹kxain¹te³nah¹lxi¹:
— Txa²wã¹sũ̱³na² wi¹lhin¹khai¹nx2na³li¹. Ju³te²a² nũ̱³ka̱³txi³sxa³te²nãu³xa² ko̱³nxe³ti³ kãi³sxã³ yxau²xai³lain¹ju³ta² ã³na¹la³kxi²nh²sãn²nũ²la² Je³su²jah³la² yxo²ĩ²ain¹kxai²nãn²tu̱³ Txa²wã¹sũ̱³na² hi²sen³kxai³lu² ko̱³nxe³ti³ kãi³sxã³ yxau²xai³lain¹kxa² yo³ha² sa²wa²su¹kxain¹ju³ta³nũ³a² yũ³tu¹wi¹. Nxe³ju³tan¹te²kxa³ya̱³lhu² ka³te̱³na² wi¹tãu³a² kan²txi³ yxau³ain¹ju³ta³nũ³a² yũ³ye¹nxain¹na³li¹. Nxe³nyhain¹ta¹hxai²hẽ¹la².
Ãn³ti³o³ki²a²thĩ³na² yxo²ĩ²tũ̱³ka̱³txi³su² ĩ³yau¹ũ³jau³su²
19 Nxe³jut3su² Es³te³vãu²ah³la² su²lhã³ai¹nhĩ¹nãn¹te²tu̱³ yxo²ĩ²tũ̱³ka̱³txa² kãin² ye³khãuh³lxa³thi¹nain¹ta¹hxai²hẽ¹la². Nxe³ju³tan¹te²kxa³ya̱³kxai³lu² u²lxi³ ha³ten¹txa³nũ¹lhain¹ta¹hxai²hẽ¹la². Fe³ni²si²a²ko³xa² aun³txi² Syi²pri²ko³xa² aun³txi² Ãn³ti³o³ki²a²thĩ³na² aun³txi² nxain¹kxan²ti³nũ¹ Ju²te²a² nũ̱³ka̱³txa² so¹lxi¹ Txa²wã¹sũ̱³na² wãn³txa² wi¹jau³xa² ĩ³hen³txi³nyhain¹ta¹hxai²hẽ¹la². 20 Ain¹tah¹lxa¹ Syi²pri² nũ̱³ka̱³txa² Si³re²na² nũ̱³ka̱³txa² nxe³sxã³ yxo²ĩ²tũ̱³ka̱³txan²tu̱³ aun³txain¹nũ²la² Ãn³ti³o³ki²a²thĩ³na² ã³tĩ̱³ain¹nũ²la² Ju³te²a² nũ̱³ka̱³txi³sxa³te²nãu³xa² ĩ³hen³txi³nyhain¹nũn³ta¹hxai²hẽ¹la². Je³su²jah³lai¹tã² Txa²wã¹hxi²kan¹ta² Si³yxau³jah¹lai¹tã² ĩ³hen³txi³nyhain¹ta¹hxai²hẽ¹la². 21 Ai¹nha²kxai³ Txa²wã¹sũ̱³na² ĩ³hxi²ka¹ta²so¹ain¹ta¹hxai²hẽ¹la². Nxe³ju³tan¹te²kxa³ya̱³lhu² a²nũ²a² yxau²xai³te²a² ĩ³hen³txi³nyhain¹nũ²la² a²nũ²a² ka³lxa¹txi³ yxo²ĩ² ã³si³wxe³ain¹ta¹hxai²hẽ¹la².
22-24 Nxe³jut3su² Je³ru³sa³lẽ² nũ̱³ka̱³txa² nxe³jau³jau¹xai²na² ain³kxain¹ka³tu̱³ Bar³na³be²ah³la² sa²si¹hã³ain¹ta¹hxai²hẽ¹la². A²nxe³jah¹la² wi¹lhin¹khai¹nxe³ha²kxai³ Txa²wã¹sũ̱³na² Yãu³ka³txa² ã²nxũ²kwa̱i³wi¹ha²kxai³ kãin² yxo²ĩ²ta¹hxai²hẽ¹la². Sa²si¹hã³ain¹ka³tu̱³ Ãn³ti³o³ki²a²thĩ³na² ã³wih¹tãu³a² yxo²ĩ²tũ̱³ka̱³txa² ĩ³ha¹txi²nyhain¹ta¹hxai²hẽ¹la². Ĩ³ha¹txi²nyhain¹te³nah¹lxi¹:
— Txa²wã¹sũ̱³na² wi¹lhin¹sxã³ ĩ²nx2ti³na³li¹. Nxe³ha²kxai³ ka³lih³khaix1sa³nhai¹. Nxe³ha²kxai³ Txa²wã¹sũ̱³na² wãn³txa² sa²yxo²ã³ah³lxi³txa³hẽ¹li¹. Yxãn¹ta¹ nxũ²kwa̱i³lxũ¹sxã³ sa²yxo²we¹jah¹lxi³hẽ¹li¹. Ain¹jau³xa² yxo²ha³kxa¹ a²nũ²a² ka³lxa¹txi³ yxo²ĩ² ãn³si³wxe³ain¹ta¹hxai²hẽ¹la².
25 Nxe³ain¹nũ²la² Bar³na³be²ah³lo²nu¹tai²na² Ãn³ti³o³ki²a²thĩ³na² a³li³nũ²la² Tar²so²thĩ³na² ã³wih¹ta¹hxai²hẽ¹la², Sau²lah³lai²na² ĩ³ha¹txi²si¹jau³sa³. 26 Ĩ³ha¹txi²nũ²la² Ãn³ti³o³ki²a²thĩ³na² ãn³sa²so²xai³ta¹hxai²hẽ¹la². Nxe³ka³tu̱³ kwẽ³kxa² ka³na³ka³nat3sxã³ yxau³tãu³a² yxo²ĩ²tũ̱³ka̱³txa² ã³nũ²kxain¹to³tãu³a² Sũ̱³na² wãn³txa² ĩ³tih³nxain¹to³ta¹hxai²hẽ¹la². Nxe³sxã³ a²nũ²a² ka³lxa¹txi³ ĩ³tih³nxain¹ta¹hxai²hẽ¹la². Nxe³tãu³a² a²nũ²a² ã̱³sa²nũn³te²a² wãn³txi³kxai³lu¹:
— Tũ̱¹ka³txai²li² Kris²tu³ tũ̱³ka̱³txi³sin²ta²wi¹. Ain¹jau³su² nxe³sxã³ Ãn³ti³o³ki²a²thĩ³na² nxe² ĩ³yĩ¹lih² ã³si³wxe³eh²nyhain¹ta¹hxai²hẽ¹la².
27 Nxe³ain¹tãu³a² Sũ̱³na² wãn³txa² ĩ³hen³txi³tũ̱³ka̱³txa² hi²sen³kxai³lu² Je³ru³sa³lẽ²thĩ³na² a³li³ain¹nũ²la² Ãn³ti³o³ki²a²thĩ³na² ã³wxã³ain¹ta¹hxai²hẽ¹la². 28 A²nxe³tãu³ai²na² a²nũ²a² A³ka²bah³la² Txa²wã¹sũ̱³na² Yãu³ka³txa² ĩ³yau¹ũ³hain¹jau³su² ĩ³ye³kxi²te³nah¹lxi¹:
— Nxe³jah³lxi³sa²lxi¹. Ye³jen¹na² wẽ³ha²yau³xa² wẽ³hã¹xa³lho³li¹. Nxe²nxa³ha²kxai³ ha³lo²a² yxo²ha³kxa¹ kãin² kwẽ³kon³na²ha³tai¹. Nxe³ha²kxai³ yain³txa² hxan³kxi¹nx2ti³ha³tai¹. Ta¹hxai²hẽ¹la². Nxe³ju³tai²li² ya²la³lxa¹ Klau²jah³lo²nu¹tai²na² Ro³ma²no² a²wa³kxẽn³su² hĩ¹nai³tã² kãin² kwẽ³kon³ta¹hxai²hẽ¹la².
29-30 A²nxe³tãu³a² Ãn³ti³o³ki²a²thĩ³na² yxo²ĩ²tũ̱³ka̱³txa² hi²sen³kxai³lu² ũ³yho³hi²txã³nxa² sa²nũ²kxi²sãn²nũ²la² hã²wxãn³txa³ Ju³te²a²ko³xa² yxo²ĩ²tũ̱³ka̱³txa² ũ³hũ¹te³lhxã³ ta³nxã¹nxu¹ta²kxai³lu² sa²si¹hã³ũ¹nyhain¹ta¹hxai²hẽ¹la². Nxe³te³na¹ Bar³na³be²ah³lo²nu¹tã² Sau²lah³lo²nu¹tã² nxe³sxã³ ai³ya³tãu³a² ũ³hũ¹ain¹ta¹hxai²hẽ¹la². Nxe³yah³nũ²la² Je³ru³sa³lẽ²thĩ³na² yxo²ĩ²tũ̱³ka̱²txai²na² sa²kxai³lu² ũ³hũ¹nyhain¹ta¹hxai²hẽ¹la³, yxo²ĩ²te²a² a²hxi²kan¹ta² he³la³kxa²sa³.