4
Txa²wã¹sũ̱³na² wãn³txa² nũ³kxũ³nha²kxai³ txa²wã¹nũ²ai²na² nũ³kxũ³nxa³ha²kxai³ nxe³jau³su²
Jãx1nha¹jut3su² Txa²wã¹sũ̱³na² wi¹lhin¹sxã³ thãi³ti³la² sa²hau³kot3sa²sĩ¹nha²kxai³ wa³ka³li³yu³tai²li² Sũ̱³na² wãn³txa² ĩ³hen³txain¹sĩ¹na¹ju³tai²li² nxe³ti³hit1sa²sĩn¹na²hẽ³la². Nxe³ti³hit1sa²sĩn¹ju³tan¹te²kxa³ya̱³lhu² nxũ²kwa̱i³lxũ¹sa²tẽ³nha¹wa². Nxe³sa²sĩ¹nha²kxai³ hãi³a² ko̱³nxe³ti³ kãi³sĩn¹te²txã³wa². Ãu²li²thin¹nha¹ju³ta² kãi³sĩn¹te²txã³wa². A²nũ²a² ã̱³xa² ã³ke³tũ¹sĩn¹te²txã³wa². Txa²wã¹sũ̱³na² wãn³txa² ko̱³nxe³ti³ yau³xã̱³lxi³ ĩ³yat3sĩn¹te²txã³wa². Nxe³ha²kxai³ hãi¹nxe³sxã³ ya²la³tu̱³ju³ta² so¹lxi³ o²la³kxi²sĩn¹te²sa¹wa². Nxe³nha¹jut3su² Txa²wã¹sũ̱³na² yen³nãu³a¹ wi¹kãi³nha¹ju³ta² a²nũ²a² yxo²ha³kxa¹ a³la³kxain¹jau³su² ĩ²sain¹sĩn¹na³la². 3-4 Kris²tu³jah¹lai²na² a²wxi²kin³ti³ton³ju³tain²txi³ Txa²wã¹sũ̱³na² a²wxi²kin³ti³ton³ju³tain²txi³ nxe²na³la². Nxe³ju³tai²na² Kris²tu³jah¹lai²na² wãn³txa² wã³nxĩn¹jau³xai²na² ĩ³hen³txi³ki̱³kxai²nãn²tu̱³ txa²wã¹ẽ¹na² sa²hau³ko³tũ¹nhẽ³jau³xa² ĩ³hen³txi³ki̱³tã³la². Ha³lo²a² ĩ³ha²te¹kxi²nẽ³jut3sũ̱³nxe² Kris²tu³jah¹lai²na² wãn³txa²kxai³lu² txa²wã¹ẽ¹nãu³ai²na² ĩ³la³kxi²ti³hi¹tẽ³na³la². Nxe³yãn¹ta¹ Kris²tu³jah¹lai²na² wãn³txa² ĩ³hen³txi³ki̱³sxa³kxai²nãn²tu̱³ a²nũ²a² ko̱³nxe³ti³ ĩ³yĩ¹li²ju³ta³nũ³a² yũ³te²nũ̱³ka̱³txai²na² so¹lxi³ wãn³txai²na² Kris²tu³jah¹lai²na² wãn³txa² yũ³ai¹nxa³lho³la². A²nxe³tũ̱¹ka̱³txai²na² sa²kxai³lu² Sa³ta³na²jah¹la² yuh³xan¹ko̱³xai²na² a²sũ̱³nu²su² ki³lxo³nha²jah¹lai²na² hi²sen³su² wã²la² ã³ye³tĩ¹jut3sũ³nxe² wãn³txai²na² sa²no¹te²ju²hẽ³la², yxo²ĩ²ain¹kxa²ya̱n³txi³sa³. Jã¹nxa¹jut3su² wãn³txa² ĩ³yau¹ũ¹nx2ti³sĩ¹na¹jau³xai³tã² hai³txi³ txa²wãn³txi³khai³xa² sa²wxi²ka¹txa²lxi³sĩ¹nxa³tai¹ti²tu³wa². Yxãn¹ta¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹lai²na² wãn³txa² so¹lxi³ sa²wxi²kat1txa²lxi³sĩ¹na¹tai¹ti²tu³wa². Hai³txi³ wxa²hxi²kan¹jah¹lo²su² sĩ¹nxa³wa². Kwa² wa³kon³kxi¹nx2ti³sĩ¹na¹wa², Je³su² Kris²tu³jah¹la² a²nũ²kxi²sxã³ yxau³nha¹ha²kxai³la². A²kxã³nxu¹tai²na² Txa²wã¹sũ̱³na² wãn³txi³kxai³lu¹ e³kxi²te³nah¹lxi¹:
— Ka³nxah³ju³ta² ĩ³ha²te¹tu¹wi¹. Nxe³ta¹hxai²ti³ai¹ti²tu³wa². A²nxe³jah¹lain²txi³ txa²wã¹ẽ¹nãu³ai²na² ĩ³ha²te¹tũ¹nhẽ³jah¹lain²txi²na³la². Txa²wã¹sũ̱³na² wxi²kin³ti³ton³ju³ta² a³la³kxi²nũh¹nhẽ³te³lhxã³ txa²wã¹ẽ¹na² ĩ³ha²te¹tẽ³na³la². Txa²wã¹sũ̱³na² wxi²kin³ti³ton³ju³tai²na² Kris²tu³jah¹la² wxi²kin³ti³ton³ju³tain²txi²na³la². Nxe³sxã³ Kris²tu³jah¹lai²na² wxi²kin³ti³ton³ju³ta² ĩ²ki̱³kxai²nãn²tu̱³ Txa²wã¹sũ̱³na² wxi²kin³ti³ton³ju³ta² ĩ²nũn³ki̱³tã³la².
Txa²wã¹sũ̱³na² wãn³txa² ĩ³yau¹ũ³sĩ¹na¹jau³su² Txa²wã¹sũ̱³na² hi²sen³kxai³lu² ĩ³hxi²kat1sa²sĩn¹na²hẽ³la². Nũ³kxũn³sa²sĩn¹nxa³kxan²ti³ Sũ̱³na² wãn³txa² ĩ³yau¹ũ³sĩn¹to³ha¹wa². Nxe³sxã³ Txa²wã¹sũ̱³na² nũ³kxũn³ju³ta² a²nũ²a²nãu³xa² ĩ³yau¹ũ³si¹hai¹na¹jau³su² nũ³kxũ³nxa³ju³ta² yũ³sĩ¹na¹wa². Kwa³ta³lẽ³na² kxĩh³nxẽ¹nhũ̱³sĩ¹na¹wa². Txa²wã¹sũ̱³na² so¹lxi³ nũ³kxũn³jah¹lai²la¹wa². Nxe³sxã³ Sũ̱³na² wãn³txa² ĩ³yau¹ũ³si¹sĩ¹na¹jau³su² wxi²kan¹txi³ ĩ³ye³ti³hit1sa²sĩn¹na³la². A²nũ²a² ã̱³xa² ye³ka³lxa¹txi³ ã³sa²ki³wa³ti³kxi²sxã³ khãuh³lxa³ti³sain¹kxan²ti³ hai³txi³ ã³nhxi²kat1sai¹nxa³hẽ³la². Wã̱³wã̱³ta³kxi²nha¹to³ha¹kxan²ti³ hai³txi³ yxo²ĩ²a¹ju³ta² ã³na¹la³kxi²nha²nxa³hẽ³la². Ko¹ko¹sain¹tũ̱³ka̱³txa² ka³lxa¹khai¹xain¹kxan²ti³ hai³txi³ txa²ya̱³lxa² hxan³kxi²sa²nxa³hẽ³la². Ĩ³yĩx1tot3sxã³ ã³na¹sain¹to³kxan²ti³ hai³txi³ ya³lu²sa²nxa³hẽ³la². 10 Je³su²jah³la² ya³lu²kxi²nẽ³ju³ta² ĩ³yau¹ũ³ai¹na¹ha²kxai³ a³lan²ta² hãi¹nxe³ti³xa¹ su²lhã³te³lhxã³ sain¹to³nha²hẽ³la². Yxãn¹ta¹ Kris²tu³jah¹la² ka³te̱n³su² ĩ³sa²yxau³si¹jah¹lai²nãn²tu̱³ ĩ³hxi²kat1sa²ju³ta² ĩ²sai¹nha²kxai³ hai³txi³ hxi²kan¹txi³ su²lhã³sai¹nxa³hẽ³la². 11 Je³su²jah³la² yxo²ĩ²ai¹nxa³tũ̱³ka̱³txai²na² sa²kxai³lu² Je³su²jah³lai²na² wãn³txa² ĩ³yau¹ũ³ai¹na¹ju³ta² te³nai¹nxa³wa². Nxai¹nxa³ha²kxai³ su²lhã³sain¹ju³ta² so¹lxi³ o²la³kxi²sain¹na³la². Nxe³yãn¹ta¹ Kris²tu³jah¹la² ĩ³hxi²kat1sa²ju³ta² ĩ²sain¹na³la². Nxe³sxã³ Txa²wã¹sũ̱³na² ĩ³ye³kxi²sa²te³nah¹lxi¹:
— Khãuh³lxa³txi³nxain¹tu¹wi¹. Nxain¹tãu³ãn²tu̱³ta¹ ĩ³nxũ²kwa̱i³lxũ¹txi³nxa²ha¹tu¹wi¹. Nxe³nxa²ha¹kxai²nãn²tu̱³ nxe³na¹ju³ta² ĩ²ain¹tu¹wi¹. Jã¹nxe³nxa²ha¹ju³tai²li² wain³na³li¹. Txa²wã¹sũ̱³na² nxe³sa²to³nha³la². 12 Nxe³ha²kxai³ Je³su² Kris²tu³jah¹lai²na² wãn³txa² ĩ³yau¹ũ³nx2ta¹ha²kxai³ khãuh³lxa³txi³nha²sxã³ ya³lu²na¹ju³ta³nũ³a² yũ³khai¹nx2na³la². Nxe³nha¹ju³tai²nãn¹ta¹kxa²ya̱³lhu² khãuh³lxa³txi³nha¹ha²kxai³ wxa²ẽ¹nãu³ai²na² ka³te̱³na² wi¹tãu³la³ yũ³sxã³ yxau³yah³lxi¹lxa².
13 A²kxã³nxa² Txa²wã¹sũ̱³na² wãn³txa² ũ³wha³li¹ta¹hxai²hẽ¹la². Ũ3wha³li¹te³nah¹lxi¹:
— Txa²wã¹sũ̱³na² wãn³txa² yxo²ĩ²a¹wi¹. Nxa¹ha²kxai³ jau³jau¹xai²na² ĩ³yau¹ũ³jah¹lo²sa¹wi¹. Nxe³ta¹hxai²hẽ¹la². Te²u¹jã¹nxũ³na¹ha²kxai³ Txa²wã¹sũ̱³na² wãn³txa² yxo²ĩ²a¹ha²kxai³ jau¹xain²txi³ ĩ³yau¹ũ¹jah¹lo²su²nũ³na¹wa². 14 Nxe³na¹ha²kxai³ Txa²wã¹sũ̱³na² hi²sen³kxai³lu² Je³su²jah³la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² sa²kxai³lu² a²kxã³nxa² ka³te̱n³su² ĩ³sa²yxau³xi²si¹ta¹hxai²ti³ai¹ti²tu³wa². Nxe³kxa² yã¹nxe³sxã³ kã³nãu³a¹ Je³su²jah³la² ka³te̱n³su² ĩ³sa²yxau³xi²ti³hit1sxai²kxai³ jã¹nxe² ka³te̱n³su² ĩ³sa²yxau³xi²ti³hit1sa²nũn³tu¹wa². Nxe³sa³kxai²nãn²tu̱³ txai²na² wxa²nũ̱³ka̱³txai²na² nxe³sxã³ ã³sa²so¹xi²nẽ³lhxã³ a²yxau³ju³khai³xa² ũh³wxe²xai³nẽ³tu¹wa². 15 Jã¹nxa¹jut3su² khãuh³lxa³ti³hit1sa²ju³tai³tã² ĩ³yau¹ũ¹nx2ti³jau³xai²la¹wa², nũ³kxũn³sxã³ yxo²ĩ²si¹nx3ti³jau³sa³. Nxe³kxai²nãn²tu̱³ Txa²wã¹sũ̱³na² thãi³ti³la² a³lxi²nẽ³kxe³su² txa²wã¹nũ̱³ka̱³txi³ki̱³na¹xai²na² ã³ka³lxa¹ton³sxã³ thãi³ti³la² a³lxi²nẽ³tu¹wa². Nxe³nẽ³kxai²nãn²tu̱³ Txa²wã¹sũ̱³na² sa²nẽn¹kxi²yah³lxin¹ju³tai²li² ã³kãi²non³khai¹tu¹wa². Nxe³kxai²nãn²tu̱³ta¹ Txa²wã¹sũ̱³na² wxi²kin³ti³ton³ju³tai²li² ã³kãi²non³nũn³tu¹wa².
Yxo²ĩ²nha¹kxe³su² ka³te̱n³ti³ yxau²xai³ki̱³jau³su²
16 Jã¹nxe³jut3su² yxo²ĩ²ki̱³ju³ta² hxi²tha²on³ki̱³sxa³lho³la². Txa²wã¹sĩ̱³na² ko̱³nxe³ton³nẽ³kxan²ti³ txa²wã¹wi¹tãu³a² a³lan²ta² hãi¹nxe³ti³xa¹ ã³ta²ho³tẽ³na³la². 17 Jã¹nxe³ju³kxai³lu¹ khãuh³lxa³tẽ³nha²ki̱³ju³ta² kãi²nxa³wa². Kxãn³nãu³a¹ ne³ki³son³tu¹wa². Nxe³tãu³a¹ Txa²wã¹sũ̱³na² a²wxi²kin³ti³ton³ju³ta² nxe³ti³hi¹tẽ³ju³tai²li² yxau²sa²tẽ³si¹nhẽ³tu¹wa². 18 Nxe³ki̱³sa²kxai³ yen³kxa² txa²wã¹yen³na² ĩ²ki̱³kxa² ten³sa²tã³sxã³ ĩ²sxã³ yxo²kwa̱in³ki̱³sxa³wa². Yxãn¹ta¹ hxi²kan¹txi³ ĩ²ki̱³sxa³kxa² yxo²kwa̱in³ki̱³tã³la². Nxe³sxã³ ĩ²ki̱³ki³ai²na² kxãn³su² yxau²xai³te²sxa³yu²hẽ³la². Yxãn¹ta¹ hxi²kan¹txi³ ĩ²ki̱³sxa³kxa² ã²la² kãn³su² yxau²sa²tẽ³tu¹wa².