5
Txa²wã¹hxi²kan¹ta² Si³yxau³jah¹la² wa̱³li²ju³ta³nũ³a² ĩ³yau¹ũ³nẽ³jau³su²
1 Txa²wã³tã̱³nãu³xãi³. Txa²wã¹hxi²kan¹ta² Si³yxau³jah¹la² wxã³ju³ta²nũ³su² jau³su² ã²la² ĩ³ye³kxi¹nx2ti³sĩ¹na¹ten¹tu³wa². Nxe³ha²kxai³ ĩ³ka³la³ki³txi³wa³ka² ũ³wha²li¹la³kxi¹nx2ti³sĩn¹nxa³lho³la². Wa³su¹txi³ wxã³ha²kxai³ ũ³wha²li¹la³kxi¹nx2ti³sĩn¹nxa³lho³la².
2 Nxe³jut3su² a²nũ²ai²li² yen³kxa² kãi³kxi²te²la³ wxã³kxai²nãn²tu̱³ wa³su¹txi³ wxã³te²ju²hẽ³la². Nxe³kxa² yã¹nxe³te²hũ̱³nxe² Txa²wã¹hxi²kan¹ta² Si³yxau³jah¹la² wa³su³txi³ wxã³tu¹wa². Ka³nxah³ti³na² ta̱³nxa² a³lan²tãu³ai²la² ta̱³nxa² wa³su³txi³ wxã³tu¹wa². Nxe³jut3su² ha²kxai³ wi¹lĩ²jah¹lxi³hẽ¹la². A²nxe³jau³xai²na² ha³kxa¹ ã²la² ĩ²yah³lxin¹jau³su² te²jai¹ti²tu³wa². Ne³wãn²yah³lxi³txa³hẽ¹la².
3 Nxe³ha²kxai³ a²nũ²a² yxo²ĩ²xa³te²a² e³ain¹jau³nũ³a² e³ain¹te³nah¹lxi¹:
— Yen³kxa² ha³kxa¹ wa²su¹wa²su¹nain¹na³li¹. Ha³lo²a² wi¹lhãu²non³na³li¹. Ai¹nhĩ¹na¹ ha³lo²a² ko̱³ju³ta³la³ wxã³yain¹tu¹wa². Txa²wã¹sũ̱³na² wa³su³txi³ wxã³tãu³a² ko̱³nxe³ti³ ĩ³yĩ¹lain¹tu¹wa². Nxain¹kxai²nãn²tu̱³ hxi²kan¹txi³ ĩ³hãi³ai¹nxa³lho³la². Txu¹ha² wẽh³ni³khaix1te²a² yã¹nxe³nũ³nhĩ̱³nx2na³la². Ta¹ka³lxai²na² nxe² e³te³nah¹lxi¹:
— Txai²na² wẽh³nĩn²nxa³xĩ¹. Ain¹kxan²ti³ ye³jen¹nãu³a² wẽ³sai²na² ya²la³tu̱³ a³li³lah¹hĩ̱³nx2na³la². Nxe³kxa² yã¹nxe³ti³hũ̱³nxe³ ya²la³tu̱³ a³ka³nxi²tu¹wa².
4 Txa²wã³tã̱³nãu³xãi³. Ju¹tai²li² wi¹ko̱³nyhah¹lxi¹lxa². Wxa²ẽ¹nãu³ai²na² ĩ³ye³ka²nah¹nẽ³jut3sũ̱³ju³ta² yũ³yah²lxan³tho³la². Yah²lxa³nha²kxai³ Txa²wã¹hxi²kan¹ta² Si³yxau³jah¹la² wxã³ju³ta²nũ³a² ĩ³wã̱³wã̱³jah²lxan³tho³la². A²nũ²a² yen³kxa² kãi³kxi²sxã³ sa²no¹kxi²nẽ³jah¹la² wa³su³txi³ wxã³ti³hũ̱³nxe² Txa²wã¹hxi²kan¹ta² Si³yxau³jah¹la² wa³su³txi³ wxã³tu¹wa².
5 Nxe³yãn¹ta¹ Je³su²jah³lai²na² wãn³txa² yxo²ĩ²yah³lxi¹nha²kxai³ a³lan²ta² wẽ³ha³lxi³hũ̱³yah³lxi¹lxa². Ka³nxah³ta² wẽ³ha³lxi³hũ̱³yah³lxa³lxa².
6 Nxe³ki̱³jut3su² Txa²wã¹hxi²kan¹ta² Si³yxau³jah¹la² a³ka³nxi²ju³ta³nũ³a² ye³ten³ki̱³jut3sũ̱³nxe² wahx3yah³sah¹lxi³hẽ¹la². Ãu³xi²ya³sah¹lxi³txa³hẽ¹la². Wi¹lĩ²sxã³ yxau³ya³sah¹lxi³hẽ¹la².
7 Ka³nxa³hi²tãu³a² ãu³xi²ta̱³nxa² ũn³jau³xa² ĩ³na²sxã³ wen¹ta̱³nxa² ain¹te²ju²hẽ³la².
8 Jã¹nxe³sxã³ kwa³jan³ta² so³ta²to²nãu³xa² a²wã²la²ka³lo³a² kwa³thi³la³ka³lo³a² ũ³whi²kxi²nyhain¹te²ju²hẽ³la². Kwa³thi³la² a²ha³la³san¹ka³lo³an²tu̱³ ũ³whi²kxi²nha² kwa³thi³la² ũ³nhe³hẽ¹nha²ka³lo³an²tu̱³ ũ³nhe³hẽ¹nha² nxe³ain¹te²ju²hẽ³la². Nxain¹ju³tan¹te²kxa³ya̱n³tu̱³ ã³nhe¹lain¹kxai²nãn²tu̱³ ũ³hĩx1to³nyhai¹nhĩ̱³nx2nxa³wa². Jã¹nxe³kxe³hũ̱³nxe² nxe³te²ki̱³na¹xai²na² a³lan²ti³hũ̱³ju³ta² yxau³ki̱³te²ki̱³na¹xai²na² Je³su²jah³lai²na² wãn³txa² yxo²ĩ²sxã³ yxau²xai³ki̱³sa²kxai³ a³lxi²waun¹nyhu¹sxã³ yxau²xai³ki̱³sa²kxai³ Je³su²jah³la² txa²wã¹ko̱³nxe³ti³ kãi³ki̱³ju³ta² ã³wa²su¹tẽ³jah¹la² a³ka³nxi²ju³ta³nũ³a² yxo²ĩ²sxã³ yxau²xai³ki̱³sa²kxai³ nxe² yxau²sa²te³a³sah¹lxi³hẽ¹la².
9 Kxã³nxai³tã² txa²wã¹ẽ¹nãu³ai²na² ã³wa²su¹kxi²nẽ³lhĩ¹nai³tã² hai³txi³ ko̱³nxe³ti³ ĩ³yĩ¹li²si¹nhẽ³jau³nũ³su² ũh³wxe³kxi²nẽ³lxa³hẽ³la². Yxãn¹ta¹ Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² ha²kxai³ nxe³jah¹la² ko̱³nxe³ti³ kãi³ki̱³kxa² yo³ha² so¹kxi²nẽ³na²hẽ³la². Nxe³nẽ³lhi¹jau³su² ũ³whxe³kxi²nẽ³na²hẽ³la².
10 Nxe³sxã³ ya³lu²kxi²nũ¹nhẽ³ta¹hxai²ti³ai¹ti²tu³wa². Nxe³ju³tan¹te²kxa³ya̱³kxai³lu² ya³lu²sxã³ sxa³ta̱³nxa² ka³te̱n³su² yxau³ta̱³nxa² ĩ²li³jut3su² kxan²ti³ kxã³nãu³a¹ ka³te̱n³su² yxau²sa²tẽ³ya³hain¹ki̱³tu¹wa².
11 Nxe³jut3su² ã³nxũ²kwa̱i³lxũ¹waun¹nyhu¹ah³lxi¹nha²kxai³ ã³non²ta³kxi²waun¹nyhu¹ah³lxi¹nha²kxai³ nxe³yah³lxin¹tai¹ti²tu³wa². Hĩ¹na² ã²la² kãi²non³jah¹lxi³hẽ¹la².
Pau²lah³lai²na² ã³wa²su¹kxi³jau³su²
12 Txa²wã³tã̱³nãu³xãi³. Yxo²ĩ²yah³lxin¹kxa² a²hxi²kan¹txi³su² te²a² sa²nẽn¹kxi¹jah³lxi³hẽ¹la². A²nxe³te²a² kãin² hxi²nũ¹nu¹nx2ti³ha²kxai³ Txa²wã¹sũ̱³na² wãn³txa² wain³txi³ ĩ³tih³nxe³nx2ti³ha²kxai³ nxe³nx2tain¹to³hxai²na²hẽ³la². Nxe³nha¹jau³su² thãi³ti³la² e³kxi¹nx2ti³sĩ¹na¹wa².
13 A²nxe³te²a² wi¹lhen³txi³tain¹yah³lxi³hẽ¹la². Nũ̱³kxũn³sxã³ ĩ²ũ³nx2tai¹nha²kxai³ a³lxi¹tain¹yah³lxi³hẽ¹la². Hãu²non³sxã³ yxau²waun¹jah¹lxi³hẽ¹la².
14 Txa²wã³tã̱³nãu³xãi³. Wxa²yu³ta² ha³tih³ ĩ³nxa² a²nũ²ai²na² u̱³lha²kxai³ wxa²wa³ka³la² ĩ²ũ³nx2ti³kxe³su² en²kxai²nãn²tu̱³ ĩ³kwa̱i²kxi¹txain¹yah³lxi³hẽ¹la². Wxa²yu³ta² ha³tih³ ĩ³nxa² yu̱h³lxi³te²sa²kxai²nãn²tu̱³ ĩ³nxũ²kwa̱i³lxũ¹txi³txain¹yah³lxi³hẽ¹la². Ãh¹ a²ha³tih³ ĩ³nxa² nũ³kxũn³txi³ yxo²ĩ²xa³te²a² Sũ̱³na² wãn³txa² wain³jau³su² ĩ³tih³nxe³txain¹yah³lxi³hẽ¹la². Ya³nãn³ta³ki²la²sxã³ yxau²xai³la³nha¹jah³lxi³hẽ¹la².
15 Ko̱³nxe³ti³ o²la³kxi¹nx2tain¹kxan²ti³ te²yã¹nxe² ĩ³wa²lũ³xain¹yah³lxi³txa³hẽ¹la². Yxãn¹ta¹ wi¹lo²la³kxi²waun¹nha¹jah³lxi³hẽ¹la². A²nũ²a² ĩ²li³te²a² yxo²ha³kxa¹ te²yã¹nxe³txain¹yah³lxi³hẽ¹la².
16 Hãi¹sxã³ ka³li³sxã³ yxau²xai³jah¹lxi³hẽ¹la².
17 Ha³lo²a² ĩ²li³ju³ta² ĩ³ha¹txi¹nx2ti³kxe³su² Txa²wã¹sũ̱³na² ĩ³ye³kxi¹jah³lxi³to³hẽ¹la².
18 Yen³kxa² wi¹ta̱³nxa² ko̱³nxe³ta̱³nxa² nxe³te²a² wxã³kxan²ti³ Je³su² Kris²tu³jah¹la² wãn³txa² yxo²ĩ²ki̱³sa²kxai³ wi¹lxo³kxi¹tain¹yah³lxi³hẽ¹la². Nxe³ju³tai²li² Je³su² Kris²tu³jah¹la² Txa²wã¹hxi²kan¹ta² Si³yxau³jah¹lo²su² jah¹la² ã³nũ²kxi²sxã³ yxau³yah³lxi¹nha²kxai³ jau³xai²na² yxo²ha³kxa¹ sa²yxo²wet1sxã³ yxau²xai³lyah³lxi¹lxa². Nxe³ju³tai²li² Txa²wã¹sũ̱³na² a²ten³ju³tai²la¹wa².
19 Txa²wã¹sũ̱³na² Yãu³ka³jxah¹la² ĩ³ye³kxi¹nx2tain¹kxai²nãn²tu̱³ en²jau³su² ĩ³wa²lũ³xain¹yah³lxi³txa³hẽ¹la².
20 Wxa²yu³ta² ha³tih³ ĩ³nxai²na² ne³te³nah¹lxi¹:
— Txa²wã¹sũ̱³na² wãn³txa² tah²yau³xa² yũ³nha¹wi¹. Nxe³nx2tain¹kxai²nãn²tu̱³ ĩ³kwa̱i²kxain¹yah³lxi³txa³hẽ¹la².
21 Wãn³txa² ne³ka¹jah³lxin¹jau³xa² yxo²ha³kxa¹ wi¹lha̱in³nha¹jah³lxi³sã²nhẽ³la², wain³jau³sxa³kxa²ya̱n³txi³sa³. Yah³lxin¹kxai²nãn²tu̱³ wãn³txa² wain³jau³xa² so¹lxi³ sa²so¹jah³lxi³hẽ¹la².
22 Yxãn¹ta¹ a²ko̱³nxe³ju³ta² yxo²ha³kxa¹ ã³na¹hxa³jah¹lxi³hẽ¹la². Yu³ka³na³ka³na³kxan²ti³ ko̱³nxe³ti³ kãi³yah³lxi³txa³hẽ¹la².
23 Nxe³jut3su² Txa²wã¹sũ̱³na² sa²kxai³lu² sa²hãu²no³tẽ³ju³ta² ũ³hũ¹nẽ³jah³lo²si²te²kxai³lu² wxa²ẽ¹nãu³ai²na² whãi²na¹ sa²wa²su¹tha²kxai³ a²ko̱³nxe³ju³ta² wxa²hxan³kxa²ti³nx2ti³ju³ta² nxe² yxau³yah³lxin¹ju³ta² ten³sa²sĩn¹nha²wa². Nxe³nx2ti³ha²kxai³ wxa²nũ²nãu³ai²na² whãi²na¹ wxa²ẽ¹nãu³ai²na² whãi²na¹ wi¹lhau³ko³txa²lxi³ju³ta² nxe² yxau³yah³lxin¹ju³ta² ten³sa²sĩn¹nha²wa². Hã²wxãn³txa³ Txa²wã¹hxi²kan¹ta² Si³yxau³jah¹la² Je³su² Kris²tu³jah¹la² a³ka³nxi²tãu³a² wi¹lĩ²nx2ti³tu¹wa². Hai³txi³ ko̱³nxe³ti³ kãi³yah³lxin¹ju³ta² a³ya³txi¹nx2ti³xa³lho³la².
24 Nxe³jut3su² Txa²wã¹sũ̱³na² wãn³txi³khai³su² ha²kxai³ ĩ²sxã³ ĩ³so¹nx2ti³ha²kxai³ sa²yxo²ã³nx2ti³xa³lho³la².
25 Txa²wã³tã̱³nãu³xãi³. Txa²wã¹sũ̱³na² e³kxi²yah³lxi³to³hin¹tãu³a² txa²wã¹ki̱³na¹xai²na² nxe³wãn²yah³lxi³txa³hẽ¹la².
26 Txa²wã¹sũ̱³na² wãn³txa² yxo²ĩ²yah³lxi¹nha²kxai³ ne³khauh²xi²nyhu¹ah³lxin¹kxai²nãn²tu̱³ ĩ³yxo²sai¹la³kxi²nha¹ju³ah³lxi³hẽ¹la².
27 Jã¹nxa¹jau³su² Sũ̱³na² wãn³txa² ũ³wha²li¹la³kxi¹nx2ta¹wa². Nxe³jau³xai²na² yxo²ĩ²ain¹tũ̱³ka̱³txa² a²yxo²ha³kxa¹ ĩ³hen³txi³tain¹yah³lxi³hẽ¹la². A²nxe³ju³tai²li² Txa²wã¹hxi²kan¹ta² Si³yxau³jah¹la² ĩ³kwa³na³kxi²nẽ³jau³su² na³la².
28 Nxe³na¹jut3su² Je³su² Kris²tu³jah¹lai²na² Txa²wã¹hxi²kan¹ta² Si³yxau³jah¹lo²su² ha²kxai³ thãi³ti³la² a³lxi¹nx2ti³ju³ta² ten³sa³nha²wa². Txai²li² Pau²lah³lo²na¹xai²li² ta³lu²na¹wa².