5
La merera soio tegiteu la tahalo la vuliti
1 La merera taku isa lou eia goio tamutou ale tahola la uati uru. Taritigi amuto ge sokoa veia amuto ge pigi la tilali, la ilo mutou ge vaulo, la vuhula la iloburukola eia ge sibitala robo amutou, amuto ge ilo ruru sesele.
2 La vuliti tamutou ele, eia ge mai ale kalesoti, la lavalava tamutou kamati ge kokora, la sasabe me kusuke ge koro lahua.
3 La uati ale amuto tau olutiale, eia tai ge kama kokora, eia ge veipala la vulovulo mutou mai ele, eia ge vikaluvu tai la mahulila te la vovo mutou mai la havi ale gutu la obu. La imamala ale igoie, eia hagagaviti ge la tapasi la haro, eala moli amuto tau oluti la vuliti veia eia ge suli amutou.
4 Hiloa, amuto pala baha egiteu la valalua soio te la igogolu tamutou, eala moli amuto kamati loto tigi egiteu, egite oio taliti soata te La Tahalo Uru, ale eia moli sekela vagari, eia lolotia.
5 Amuto mahuli tabaati, amuto pou moli la sagegela, amuto kama savelea isa la paga, amuto pou tataho moli, eala moli amuto kama gabutatala e tabarabara mutou. Amuto pou tatahoti, amuto ali maru, la kabili mutou tubu tataho mai la bolo ale la kabilila tubu, egite raragiti veia ge laoa, ge oloa, me amuto tai ge poga tavu la viluala mai la bolole.
6 Amuto kama kokora, amuto laputi egiteu ale kama ruru soilo te la vigagiala, amuto kaua giteu la merera usu, amuto mai ale biliti egiteu, eala moli egite kama vagari veia ge magiri robo amutou.
Etato ge vagari moli ge pou tali la guluvi te Kraist
7 Amuto tabarabaragu, taritigi amuto ge magiri vagari moli, amuto kama ge gabutatala papai, kara ale La Uru ge beu rivu loua somai, eia ge vimatata la iruru tomi. Amuto rovitia, la tahalo ale tuhakala, eia ge galu la ilali, eia ge pou tali la hura me la haro ale ge vikusi la ilali tetala orivo la mahuma. Eia pou tabaa mai ele, kara la ilali ge kusi.
8 Amutou tai, taritigi amuto ge vagari moli, amuto ge toro moli te Kraist, la vuhula la haro ale eia ge beu rivu loua somai te la maututula, eia hagagaviti.
9 Umala tai veia amuto ge silaha taro egiteu e tabarabara mutou te la vareagila tegiteu veia ge vikara kukumua giteu, la vuhula amutou tai la tahalo la iruru, me La Tahalo Uru soukama ge tomu sasae la vulovulo mutou tai. La Uru eia oioti te la matapiro, bakisi moliti eia ge goluma, eia ge mata muli la vulovulo gatou la valalua me hatavivile tomi.
10-11 Amuto tabarabaragu, etato rovitia veia la tahalo ale magiri vagari, La Tahalo Uru ge vibalavea. Mai egiteu la bilalaha te La Tahalo Uru ale alaura, egite magiri vagari, egite veipala la merera te La Tahalo Uru soio te la valalua me hatavivile. La valalua vile egiteu, eala moli egite magiri vagari moli te la isa La Uru. Mai tai la tahalo ale e Iob, la iloburukola uru eia sibitala roboa, eala moli eia magiri vagari, mulimuli La Tahalo Uru goio vibalava seselea. Etato tomi tai rovia mai ele veia La Tahalo Uru, eia la tahalo la gilogo sesele.
Etato umala ge toi bulalahu la isa La Tahalo Uru veia ge vitikumu la merera tegatou
12 Amuto tabarabaragu, la merera isa ale tikumu eau masagea veia amuto ge matagaga ovola veia amuto umala ge vikara ge toi la isa La Tahalo Uru soio te la merera tamutou veia ge vitikumu loua mai ele. Amuto umala ge vitikumu la merera tamutou veia ge toi sesele soata te La Tahalo Uru, veia amuto ge toi la paga isa tai omai te la magasa. Mai amuto ge toi moli mago “Elo”, ale la masovala ge “elo” moli, kama ge vulo loua. Mai tai amuto ge toi moli mago “Ouka”, ale la masovala tai ge “ouka”, kama ge vulo loua. Mai amuto ge toi bulalahu moli la isa La Uru, me amuto ge visigolo lou, ale amuto ruruti me La Tahalo Uru ge vilai sesele amutou te la iruru tamutou ele.
La kilaka ale vagari, etato ge hilo la vavuala
13 Mave, isa oio kabili tamutou ele, eia bukeke la iloburukola ale uru? Taritigi eia ge kaka tavu La Tahalo Uru. Mai isa oio gabu la sagegela, taritigi veia eia ge vaisale La Uru te la bilau la sagegela.
14 Mave, isa oio tamutou, eia lea? Taritigi eia ge baha tavu egiteu la ururu te la lotu, egite ge goio tetala. Te la isale Kraist, egite ge bubu la abirila soio te la varula, egite ge vitikumu la kilaka tegiteu soio te La Tahalo Uru mai ele, veia eia ge vimahulia.
15 Mai egite ge kaka sesele, egite kama ge ilo lalua, la ilea ge mahuli lou, La Uru ge vimahulia. Me mai la iruru isa oio tetala soloio tabulibuli, ale tai La Uru ge vimavulaha taro leia.
16 Eala eia taritigi pepeho veia amuto ge veipala baololi la iruru tamutou, amuto ge suli baoli tai le amutou la kilaka mai ele, amuto ge mahuli lou. La kilaka te la tahalo ale matata, eia vagari, eia koramuli ge vimahuli la valalua me hatavivile tomi usu.
17 E Lisa, eia la tahalo la vovo mai moli etatoue. Eala moli eia kaka vagari veia la hura umalati ge pupu, eia kama pu la leavala itolu, la taio iuolo.
18 Mulimuli eia goio kaka lou, la hura goio pu lou, la ilali orivo goio kusi lou. Eala eia matagaga moli mai ele veia la kilaka ale sesele, eia vagari.
La tahalo ale eia puli rivu e tabarala loio te la iruru, eia taritigi
19 Amuto tabarabaragu, mai isa tamutou eia ge ruru, me e tabarala isa ge puli rivu loua soio te la gauru ale taritigi, la igogolu ale, eia taritigi pepeho.
20 Taritigi eia ge rovia mai ele veia eia vimahuli taroti e tabarala loio te la pileho, me la iruru tomi te tabaralale eia mavulaha tarotia. Eala moli ele.
Eau e Iakob.