3
Jooni Minkinara Daankiarakoꞌnaꞌ
(Mak 1:2-8; Luk 3:1-18; Jon 1:19-28)
1 Tenang Jiisuuꞌ Nasaretiꞌ otokoꞌnang eeꞌnang Jooni Minkinara sirakuraꞌ tavoꞌarara daankinang tutumpuuꞌ meeꞌboraꞌ sirakamaaꞌkoo Judiaꞌnavete-koonooꞌke.
2 Aaꞌpuma daankiaruꞌ, “Bereꞌdariai paninung muuꞌkoo tuntariainaꞌ, aiꞌ tee muuꞌ tee enang dueꞌ poing.”
3 Aung Jooni tee teie nakaronara Aisaiaꞌke urikamuꞌ minkuvuuꞌnung Daari Meekung-koo aaꞌpuuꞌnooꞌka,
“Aurong narung naning-koong meeꞌboraꞌ sirakamaaꞌkoo bokuma aaꞌpumaang, ‘Maamu-antaveriaing tee taung Ovoring bakaang. Koompevuriai poainavung.’ ” (Aisaiaꞌ 40:3)
4 Tee Jooni Minkinara tee tamung mononopaꞌ kaameliꞌkoong dapo-koo nkoniiꞌ kurumparakoꞌ, eeꞌnoko dopaꞌnooꞌke tokoarakoꞌ. Eeꞌnoko bakaang taamang teing aaꞌning maaꞌurikoꞌ: ntaaꞌnanka eeꞌnoko davainta poraꞌkooning.
5 Eeꞌnoko mmauꞌ nantoonanka Jerusalemaꞌketa tee-anko berouꞌ, ookara Judiaꞌnameng-nupoong nariꞌ, bera ookara Jooꞌdani-nari-nupoong-koo basi.
6 Eeꞌnoko biikaning orakaꞌ nkonanka siraꞌpariko ntong-koo minkivurima meekaꞌantavurikoꞌ teie Jooꞌdani-nari-koo.
7 Eeꞌnoko tenang eeꞌnang tevitu Moosesi bakaang Boto Keperuuꞌnavitu miring Paarisi-navitu eeꞌnoko Noruꞌ Pitunavitu miring Saadiusi-navitu nariꞌ ntong-koo minkivurira meekaꞌantavuriiꞌnaang porouꞌ. Teka Jooni Minkinarai oovurira aaꞌpurikoꞌ,
“Diiꞌ borukoporonuka, baie aaꞌduri diiꞌ tamung minkirarira kooꞌdariaining Kumponing bakaang iira tavoꞌkuaing-eta?
8 Masikaꞌ bereꞌdariaing tee-koo sinang oroꞌparavainaꞌ.
9 Tamung diiꞌka aaꞌperiaukaꞌ, ‘Eebaraamiꞌ tee niiꞌke niuma otong,’ aiꞌ masikung ninge naurampimang Kumponinge tee Eebaraamiꞌ baurukaaꞌ aing-eta kapananka-ita nkovuripeuꞌ diiꞌ pariꞌanta-koo, domang ivekaꞌdariko deekoꞌ.
10 Teriꞌ marekenariꞌ teriꞌ maamuari otong koiꞌkoo okoraꞌ. Diiꞌ teing koiꞌ makosinuka. Diiꞌkoo ookara sinang tampara nkaveriaukaꞌning tee nokiraarira ntaꞌkoo duaꞌdaariaining.
11 Ninge tee tamung ntong-koo minkirampima meekaꞌantarampimaang domang bereꞌdariko, nka tee ning aaꞌnaꞌ apooꞌmui otoing iirakuta mmeꞌ pomaang, doonge-taara˜. Tee eeꞌnara poko aaꞌnaꞌ tampaꞌ taaraveriai, aiꞌ teie tee meekaꞌantaruriaing diiꞌ Tanuaang Meekung eeꞌnoko ntaꞌ ninka.
12 Teie, tee simpeꞌnkoi˜ teing makosinuka bakaang muuꞌkoo kuunga onkeonkeꞌuriaing, eeꞌnoko teing makosinuka deeaing tee-koo ntaꞌkoo siriꞌpaaꞌkoo tai-antavuriaing.”
Joonie Jiisuuꞌ Ntong-koo Minkivura Meekaꞌantavuuꞌnaꞌ
(Mak 1:9-11; Luk 3:21-22)
13 Teketa tenang tee Jiisuuꞌ Kaaleliꞌnameensiꞌketa Jooꞌdani-nari-aape pouꞌ Joonie ntong-koo minkivura meekaꞌantavuuꞌnaang.
14 Teka Joonie orokovuma aaꞌpuuꞌ, “Ning dake ntong-koo minkimera meekaꞌanta-koo makosi eeꞌnoko daꞌ arekeeꞌkoo ning-anko poi?”
15 Teka Jiisuuꞌke makuꞌuma aaꞌpuuꞌ, “Emuꞌ nkomeaing. Makosi neeꞌke teeꞌ nkoampema dupe-antavampeaing ookara aarumo koontoꞌnanka.” Tenang teeꞌ minkuvuioꞌ Joonie arooꞌuuꞌ.
16 Teketa tenang Joonie Jiisuuꞌ ntong-koo minkivura meekaꞌantavuioꞌ doompeto daaꞌarioꞌ ntong-eta tontaꞌarako tee-koo batei-koo paning daateꞌaruꞌ eeꞌnoko tenang teie tee Tanuaang Meekung Kumponing bakaang, kuukuuꞌpinaꞌ siarara Jiisuuꞌkoo pantoko oovuuꞌ.
17 Eeꞌnoko kara auromparuꞌ paning-eta aaꞌpuma, “Aung tee nnuring ninge piaavamaung. Ning aung-koo aaꞌnaꞌ dotumaramaung.”