3
1 Kraiye el emb itye yelpulamalde. Kraiye ile yarnin inangk mimine. Minye Jehovil tingowir umangk nowaiy inde tak ityan fruitowe lamatyerald.
2 Werentun ile mimine inangk kraiye; ngurn tak ilde yan fruitowe lamatyeran gardenungai.
3 Yammalaitye lamatyeri yummun tunte gardenungai in ambe Jehovah yarnir luku, nowaiy ungune tak al yan; ungunuk ungune tak al yan; wunyungune pornani.
4 Yarnin ile kraiye inangk mimine luku, nowaiy ungune pornani.
5 Nglemin ile Jehovah ungunuk ngune takkani ityan fruitowe ngune lun ellani ity an Jehovah wunyungune nglalin al yan; ngune nglemani nunkeri wirrangi.
6 Mimine nakkin ile yan lamatyeri, nunkeri itye ellin, winmin ile yan nglemamalde, wunyile yan mimine morokkun fruitowe takkin ile ityan; wunyile yan pempin inangk napalle, takkin ile yan.
7 Wunyengk nuntun engk merate ngoppun, kengk tulkun an muldar, winmin an kaininggar.
8 Pangarinda wunyengk kungun ityan Jehovah ngoppun itye gardenungai. Wunyengk Adame, napalle, engk enggun angk nampulun lamatyerungar kin ambe nowaiy nakkin enggun.
9 Wunyile Jehovah kaikundun yan Adame luku, “Yang inde.”
10 Wunyitye werentun; ngate yan kungir umauwe tungare gardenungai, wunyap turlin, hil amb uk ngape merate ngoppun, wunyap an angk nampulun.
11 Jehovah kurrin ile ityan, “Ngande tingowir umangk, merate, ellin inde; takkir inde yan kai fruitowe yar atte tingowir um nowaiy inde tak ityan.
12 Wunyile korn yarnin, luku. “Mimine yar inde pempir anangk pempir ile ityan anangk, wunyatte takkir ityan.
13 Wunyile Jehovah yarnin inangk mimine. Mekimb inde ennir luku. Wunyitye luku mimine kraiye ile yelpulir wunyatte yan takkir.
14 Wunyile in angk kraiye Jehovil yarnin luku, Hil amb uk inde el ellani wirrangi kaldowamp inde malkani kaldowamp inde an takkani tune; kaldowamp mimine el ellani umauwe ngrakkuwalamalde; kinauwe porlar el ellani ar ngrakkuwalamaldar kan ambe umauwe porlar; ngultani ile yan porlpalle umauwe kurle; ngultani inde yan naitye reytyinne.
16 Jehovil luku inangk mimine. Multuwarrani inde parpani; nginte parpani yaral inde an pundani porlar; taiyani um mai nape wunyinde ellani in ambe.
17 In angk Adame Iuku ile Jehovah; nginte kungir umauwe nape, nginte yan takkir fruitowe yar atte um tingowir, nowaiy inde tak ityan; wunyatte winmani ruwe wirrangi, nginte yan takkani ngune, wunyinde parpani kaldowamp.
18 Palyar, talga, ar kringani; nginte an takkani ngune.
19 Umauwe make wurtuwallaini ungunai inde yan takkani krepowe. Palli ar um grauwani tunungai; ngate um winmir tunungai; nginte ellani tune yammallellin.
20 Kile yan Adame krunkun naitye napalle Eve, hil amb uk, itye narkowalle an ambe an ngruwar.
21 Wunyile Jehovah winmin an maiyinggar wankandungai enggun ambe Adame Eve; kengk ngolun an.
22 Wunyitye Jehovah yarnin korn itye nglalin arnan; nglemin itye nunkeri wirrangi, ungunuk itye lewin alye palli ile yan takkani fruitowe wunyitye tumbewallani kaldowamp, nowaiy pornani.
23 Wunyile yan Jehovah taiyin Adame gardenanmant; kin ambe an kaltani an tune, yarnd ile morokkir ityan.
24 Kile yan Jehovah prildin Adame; wunyile yan yuppun swordowe ngorkulald gardenungai; hikkai swordowe ngeraggeyelin; kile yan moerpun tumbewarrin lamatyeri.