18
Tehuicahque tlamactili in Jesús
Satepa ihcuac omotlamiihto inin tlahtolten, in Jesús oquixohuac inuan tetlamachticahuan huan ohuilohuac ic sentlapal in atlautli itoca Cedrón. Ompa ocatca se tlamiloli canin Jesús ocalacohuac ihuan tetlamachticahuan. Noyojqui in Judas, in aquin otetemactihticatca, yehhua oquixmatiyaya inon tlamiloli, tleca miyacpa in Jesús omosentlalilohuaya inuan tetlamachticahuan. Ijcon in Judas oahsito ompa ihuan se ololi den soldados huan oc sequin topilihten den tiopantli, intlatitlanil in hueyixtoque den tiopixcamen huan den fariseos. Oquihuicayayahque intepos huan intlahtlanex. Huan quen Jesús yimomautica in tlen yau tepanohua, oquixohuac huan oquitlahtlaniloc:
―¿Aquin nanquitemohuahque?
Yehhuanten otenanquilihque:
―Tictemohuahque in Jesús ialtepeu Nazaret.
Huan Jesús oquinnanquililoc:
―Nehhuatl niJesús.
Huan ompa inuan ocatca in Judas, aquin oteichtacatemactihticatca. Huan ihcuac Jesús oquiniluiloc: “Nehhuatl niJesús”, omotzinquisque huan ohuetzque tlalpa ica moucayotl. Oncan Jesús oc sepa oquintlahtlaniloc:
―¿Aquin nanquitemohuahque?
Huan yehhuan oquihtohque:
―Tictemohuahque in Jesús ialtepeu Nazaret.
Oncan Jesús oquiniluiloc:
―Yonamechiluic quen yinehhuatl in Jesús. In tla nehhuatl nannechtemohuahque, xiquincahuacan inin oc sequin mayacan.
Inin opanoc ic matzonquisa in tlen Jesús omihto: “Ica yehhuan aquin onechmacaloc, Nohueyitahtzin, ahmo opoliu niyan seya.” 10 Oncan Simón Pedro, quen oquipiyaya se espada, oquiquixtic huan oquinacastzontec se den tlacamen itoca Malco, itlaquehual in hueyixtoc den tiopixcamen. 11 Huan Jesús oquiluiloc in Pedro:
―Xiquehua in espada. Huelica nicselis inin tlapanolistli quen monequis Tohueyitahtzin, masque molui tequiyo.
Jesús iixpa in achtoque den tiopixcamen
12 Oncan in soldados den ololi, ihuan incomandante, huan in topilihten den judeahtecos otequitzquihque in Jesús huan oteilpihque. 13 Oncan niman otehuicaque ichan in Anás. Anás imonta in Caifás, in aquin ocatca in hueyixtoc den tiopixcamen inon xihuitl. 14 Inin Caifás yiyehhua aquin oquiniluic in judeahtecos mach ocachi cuali para yehhuanten mamiqui san se tlacatl impampa in tlacamen.
In Pedro teixtlatiya in Jesús
15 In Simón Pedro huan oc se tetlamachticau otecuitlapanuihtayahque in Jesús. Huan moixmatihque inon oc se tetlamachticau huan in hueyixtoc den tiopixcamen. Huan ijcon yehhuatl ocalac tehuan in Jesús ipan in icaltenco den ical in hueyixtoc den tiopixcamen. 16 Huan in Pedro omocau quiahuac, ipan puerta. Huan ic inon oquis inon tetlamachticau, in aquin quixmati in hueyixtoc den tiopixcamen, huan ihcuac otlahto ica in ichpochtli aquin tlachiya ipan puerta, oquicalaqui in Pedro. 17 Oncan in tlachixqui den puerta oquitlahtlani in Pedro:
―¿Ahmo noyojqui tehhua se itlamachticau inon tlacatl?
Huan Pedro oquinanquilic:
―Ahmo, nehhuatl ahmo.
18 Huan quen osehuayaya, in tlaquehualten huan in topilihten oquitlalihque se tlecuili huan ihihcaticaten moscohticaten. Pedro noyojqui ompa inuan ocatca, omoscohticatca itenco in tletl.
In hueyixtoc den tiopixcamen teyoluitiya in Jesús
19 In hueyixtoc den tiopixcamen opeu tetlahtlaniya in Jesús ica aquin yehhuan in tetlamachticahuan huan tlen inon omonextiliyayahque. 20 Huan Jesús oquiluiloc:
―Nehhuatl nitlanonotztoc in miyacaixpa. Nochipa oniquinnextiliyaya ipan in hueyi tiopantli huan ipan in tiopanten canin mosentlaliyayahque in judeahtecos. Ahyic queman tlen niquihtohtoc san ichtaca. 21 ¿Tleca tinechtlahtlaniya? Maquintlahtlani in aquihque nechtlahtolcactoque, huan yehhuanten maquihtocan ica tlenon niquinnonotztoc. Yehhuanten quimatihque in tlen niquihtohtoc.
22 Queman Jesús omihto inin, se den topilihten den tiopantli aquin ompa ocatca, oteixtecapani huan otetlahtlani:
―Tel, ¿ijcon ticnanquilis in hueyixtoc den tiopixcamen?
23 Huan Jesús omonanquilic:
―In tla oniquihto itlahtlen ahmo cuali, xiquihto in tlen ahmo cuali oniquihto; huan tla oniquihto in tlen cuali, ¿tleca tinechtehuiya?
24 Oncan Anás oquintequiuti mateilpican in Jesús, huan otetitlan in Caifás, in hueyixtoc den tiopixcamen.
Pedro teixtlatiya oc sepa in Jesús
25 Ic ocachi in Pedro san ijcon ihcatica moscohtica inahuac in tlecuili, huan oquitlahtlanihque:
―Tel, ¿ahmo tehhua se titlamachticau inon tlacatl?
Huan Pedro ahmo otemocuitiyaya, huan oquihto:
―Ahmo, ahmo nehhuatl.
26 Oncan oquitlahtlani se itlaquehual in hueyixtoc den tiopixcamen, inon ipariente in tlacatl aquin Pedro oquinacastzontec:
―¿Tlen, cana ahmo onimitzitac ihuan ipan in tlamiloli?
27 Huan Pedro oc sepa ahmo otemocuitiyaya, huan san ic inon chihton otzahtzic se pachilel.
Otehuicaque in Jesús iixpa in Pilato in tequihua romanohteco
28 Oncan otehuicaque in Jesús den ichan in Caifás hasta ipan in cali den tequihua, itoca Pilato. Yopeu tlatui ipan in tonali achto den pascuahiluitl. Huan in judeahtecos ahmo ocalajque ipan in palacio, tleca ahmo quincahuilihtoc macalaquican canin calaquihque in aquin ahmo judeahtecos tla quicuasque in tlacuali den pascuahiluitl. 29 Yeh in ica in Pilato oquis ic quinnonotzas, huan oquiniluic:
―¿Tlen ica nanquiteluiyahque inin tlacatl?
30 Yehhuanten oquinanquilihque:
―In tlahmo oquichiu in ahmo cuali, ahmo timitzmactilihtonihque.
31 Oncan in Pilato oquiniluic:
―Xicuicacan namehhuanten, huan xiquixcomacacan quen ca ipan in namotlanahuatil.
Huan in judeahtecos oquinanquilihque:
―Huan tehhuanten tijudeahtecos ahmo techcahuilihtoc ic ticmictisque niyan aquin.
32 Ijconon otzonquis in tlen Jesús omihto ica quenin mopiya micohuas ipan cruz. 33 In Pilato oc sepa ocalac ipan in ipalacio, huan otenotz in Jesús huan otetlahtlani:
―Tel, ¿tehhuatl in hueyixtoc den judeahtecos?
34 Huan Jesús oquinanquililoc:
―Tel, ¿ijcon tlahtlanilohtoc tehhuatzin ica motlanehnehuilis, noso tleca oc sequin yomitziluihque ica nehhuatl?
35 In Pilato otenanquilic:
―¿Cana ticnehnehuiliya nehhuatl no nijudeahteco? Yehhuan den mochantlacahuan huan in achtohque den tiopixcamen, inohque in aquin omitztemactihque ica nehhuatl. ¿Tlen inon ticchiutoc?
36 Oncan Jesús oquinanquililoc:
―In campa nihueyixtoc ahmo ipan in tlalticpac. Tla de nican yeni, in aquin nechcuitlapanuiyahque motehuinihque, ahmo maniyeni nitlatemactili inmajco in judeahtecos. Huan in campa nihueyixtoc ahmo nican tlalticpac.
37 Oncan Pilato otetlahtlani:
―Ijcon tel, ¿tehhuatl in hueyixtoc?
Huan Jesús omonanquilic:
―Nihueyixtoc, quen tehhuatzin mihtohua. Nehhuatl ic inon onitlacat huan onihuala ipan in tlalticpac manitlanonotza ica tlen melahuac. Nochten in aquin quimatisnequihque in tlen melahuac nechcaquisque in tlen neh niquihtohua.
38 In Pilato otetlahtlani:
―¿Huan tlenon in melahuac?
Jesús ilohuac tlamactili ica in miquilistli
Satepa ic otlan tetlahtlaniya, in Pilato oquis oc sepa quinnotza in tequihuahten den judeahtecos huan oquiniluic:
―Nehhuatl ahmo nicahxiliya niyan tlen tlahtlacoli ica inin tlacatl. 39 Huan namehhuanten nanmomautoque quen mach nehhua manicahcahua ica namehhuan se motzacuani ipan in pascuahiluitl. Tel, ¿nanquinequihque manicahcahuas in hueyixtoc den judeahtecos?
40 Oncan nochtehque opeuque coutzahtzihque:
―¡Inon ahmo! ¡Xicahcahua in Barrabás!
Huan inon Barrabás ocatca tlachtejqui.