5
ຕັດຊີ່ນ ກວາຍ ຕຶ່ງ ມູ່ ກາ ຊາອຳ ກາ ອີດ ມັນແຊມ ກາ ຕາ ແກີນ ລາກວຍ ອັນ
1 ເກົາ ຊັອງ ເຈີ່ ເນົ່າ ຕະ ອຶນຕີ ແຕ ມານະ ຕຶ່ງ ຈຸ່ມ ເຍືາ ຕະ ຣານະ ຕາ ອໍ ລາລື່. ຣານະ ກັອຍ ລາ ອັນ ບິ ກະ ລາກວຍ ອຶມປໍ່ ອັນ. ປັຣນາຍ ໄນ່ ດັອຮ ເດີນ ເປາະ ກູ່ ອຶນຕຸ ເຈີ່. ມັຮ ກວາຍ ກາ ຕາ ເບີນ ຊາອຳ ປັຣນາຍ ເຢືາງ ເຈົາຣາຊີ, ລາ ຕາ ເກີ່ຍ ຕະ ຣານະ ຕາ ອໍ ນ່ະກັອຍ.
2 ນານ່ະ ເຍືາ ອຶນນັ່ອງ ໂອດ ປາຍ ເຍືາ ລາ ກວາຍ ອໍ ຢັ່ຮ ເມືາງ ເຢືາງ ເຈົາຣາຊີ? ຄາອ໌ ເຍືາ ຊັອງ ຕຸ່ຮ ງໍ່ ແຕ ຣານະ ຕາ ອໍ ກັອຍ. ອໍ ໂອນ ເຍືາ ຕູ່ຍຮ ຕັຮ ຊັອງ ອັນ ກາ ຕະ ຣານະ ຕາ ອໍ ກັອຍ.
3 ຈະ ເກົາ ໄນ່ ແອີດ ເຢີ່ງ ແຕ ເຍືາ, ມາ ຣາງຶ່ຮ ເກົາ ແອີດ ມັນຕຸ ກະ ເຍືາ. ຍ່ອນ ເຢຊູ ກຣີດ ໂອນ ເກົາ ເບີນ ອຳນາດ, ເກົາ ຄຶ່ດ ເຈີ່ ຕຶ່ງ ຣາງຶ່ຮ ເກົາ, ອຶນເຕົ່າ ຢໍອ໌ ອີ ຕະ ໂອນ ກວາຍ ກາ ຕະ ຣານະ ຕາ ອໍ ກັອຍ.
4-5 ເກົາ ຄຶ່ດ ນ່ະໄນ່: ພໍກາ ເຍືາ ໂຣ່ມ ລາ ນ່ະ ເກົາ ໂຣ່ມ ມັນຕຸ ກະ ເຍືາ ເຕ່. ບັອງ ກາ ກັອຍ ອຶງເຄາະ ເຍືາ ມ່ອບ ອັນ ກາ ຕະ ຣານະ ຕາ ອໍ ກັອຍ ໂອນ ເຢືາງ ຊາຕານ ຕະ ຈະ ອັນ, ໂອນ ຣາເວືາຍ ອັນ ເບີນ ອາມົ່ງ ຕຶ່ງ ຕາໄງ ເຢຊູ ເຈົາ ລັ່ຮ ປໍ ກູແຕອ໌ ໄນ່. ເຍືາ ຕະ ຣານະ ກັອຍ ຍ່ອນ ເຍືາ ເບີນ ອຳນາດ ແຕ ເຢຊູ ກຣີດ, ອຶນເຈົາ ໄຮ.
6 ຕາ ໄກຣ ເຍືາ ຄຶ່ດ ປາຍ ເຍືາ ລາ ກວາຍ ຕານັ່ອງ ອໍ ຢັ່ຮ ເມືາງ ເຢືາງ ເຈົາຣາຊີ. ເຍືາ ດັງ ເຈີ່ ປັຣນາຍ ຊາກຳ ແຕ ບວຮ ຊື່ອ໌ ນ່ະໄນ່: "ຄັນ ເບີນ ບີ່ອ໌ ບວຮ ຊື່ອ໌, ມາ ເຍືາ ເປຍ ກະ ແປງ, ອຶນແຍ່ະ ແປງ ກັອຍ ແກີດ ຊື່ອ໌ ອາຊັອຮ ອຶນແຍ່ະ."
7 ບວຮ ຊື່ອ໌ ໄນ່ ລາ ຊາກຳ ແຕ ຣານະ ໂລ່ຍຮ. ອຶງເຄາະ ເຍືາ ຕາເວ່ງ ຕັຮ ຣານະ ຕຍາ ແຕ ຣາງຶ່ຮ ເຍືາ, ໂອນ ເຍືາ ແກີດ ຣາງຶ່ຮ ຕາໄມ ແອັນ. ເຢຊູ ກຣີດ ກູຈີດ ຕາງ ໄຮ ເຈີ່. ນ່ະກັອຍ ໄຮ ແກີດ ຣາງຶ່ຮ ຕາໄມ ແອັນ. ເຢຊູ ລາ ນ່ະ ແກະ ກາ ມັຮ ກວາຍ ອິດຊະຣາເອລ ດຸ ກຍາກ ຈາ ຊາແຍີ ຕາໄງ ອາກຼັຮ.
8 ຍ່ອນ ນ່ະກັອຍ, ອຶງເຄາະ ໄຮ ຊາແຍີ ຕາໄງ ກັອຍ, ຈາ ໂດຍ ບຸຮ ຕາ ເບີນ ເບີນ ບວຮ ຊື່ອ໌. ບວຮ ຊື່ອ໌ ໄນ່ ລາ ນ່ະ ຣານະ ໂລ່ຍຮ ກະ ມັຮ ຣາງຶ່ຮ ຕາ ອໍ. ມາ ອໍ ໂອນ ໄຮ ຈາ ໂດຍ ບຸຮ ແອິ ບວຮ ຊື່ອ໌. ໄນ່ ລາ ນ່ະ ໄຮ ຕາ ເບີນ ເບີນ ໂລ່ຍຮ ນັ່ອງ ກະ ຕາປູ່ນ ກຣັ່ກ ລາລື່ ປັຣນາຍ ປຍາຍ໌ ອໍ.
9 ຕຶ່ງ ປັຣນາຍ ຊາອົຮ ອຶນໂຍ່ງ ເກົາ ພາອ໌ ໂອນ ເຍືາ, ເກົາ ອາຕີ ເຍືາ ອຶນໂຈຍ ຣາຕອຍ ກະ ກວາຍ ກາ ມັ່ກ ປັຣລື່ຍ ລາກວຍ ກາຢາອ໌ ເນົ່າ.
10 ຕຶ່ງ ປັຣນາຍ ຊາອົຮ ກັອຍ, ເກົາ ຕາ ເບີນ ໄຄອ໌ ເຍືາ ຣາຕອຍ ກະ ກວາຍ ຕາ ເບີນ ຊາອຳ ກາ ປັຣລື່ຍ ລາກວຍ ກາຢາອ໌ ເນົ່າ, ແຕີລາ ອີດ ເກຣີ່ງ ເນົ່າ, ແຕີລາ ຊາງ ເຢືາງ ການໍ່ອ໌. ຄັນ ເຍືາ ຕາ ແອອ໌ ອີ ຣາຕອຍ ມັຮ ກວາຍ ນ່ະກັອຍ, ອຶງເຄາະ ເຍືາ ລັ່ອຮ ແຕ ກູແຕອ໌ ໄນ່!
11 ມາ ຕຶ່ງ ປັຣນາຍ ຊາອົຮ ກັອຍ, ເກົາ ອາຕີ ເຍືາ ແຕ ກວາຍ ກາ ຊາອຳ ເຈີ່, ມາ ອຶນນັ່ອງ ໄລ່ ຕະ ຣານະ ຕາ ອໍ ຕາ ເບີນ ລາກວຍ ກາຢາອ໌ ມາ ບິ ມັນຕຸ, ແຕີລາ ກຸມປູ່ຣ ຢໍອ໌ ອີ ເບີນ ຊາອຶ່ຍ, ແຕີລາ ຊາງ ເຢືາງ ຕາ ອໍ, ແຕີລາ ຕາແມີຍຮ ກວາຍ ການໍ່ອ໌, ແຕີລາ ບູລ ບຼັອງ, ແຕີລາ ໂລ່ບ ອີດ ເກຣີ່ງ ກວາຍ ການໍ່ອ໌. ເກົາ ປາຕັບ ເຍືາ ນ່ະໄນ່: ເຍືາ ອຶນໂຈຍ ຈາ ມັນຕຸ ກະ ມັຮ ກວາຍ ກັອຍ.
12-13 ຕາ ແກີນ ຣານະ ເກົາ ອີ ຕັດຊີ່ນ ແຕ ກວາຍ ກາ ຕາ ເບີນ ຊາອຳ. ແອີງ ເຢືາງ ເຈົາຣາຊີ ຊັອງ ຕັດຊີ່ນ ກວາຍ ກັອຍ. ມາ ມັຮ ກວາຍ ຊາອຳ ຕຶ່ງ ຈຸ່ມ ເຍືາ, ອຶງເຄາະ ເຍືາ ຕັດຊີ່ນ ເບີມ; ເຈີ່ ເຍືາ ຕູ່ຍຮ ຕັຮ ກວາຍ ກາ ຕະ ຣານະ ຕາ ອໍ ກັອຍ ແຕ ຈຸ່ມ ເຍືາ, ຕາປູ່ນ ປັຣນາຍ ເຢືາງ ເຈົາຣາຊີ ປາຍ ແຕ ອຶມແບິ ເຈີ່.