4
So̱so̱ a ke̱bware̱suŋ‑o
1 Amo̱‑ɔ pɛɛɛ kamɛɛ‑ɔ, mo̱ a be̱e̱ ŋu dee‑ro, na baa taye̱ po̱ne̱ ko̱ so̱so̱, ne̱ bo̱re̱ ko̱ ne̱ o su fe̱yɛ kabe̱re̱, ne̱ mo̱ a dɛɛ nu fe̱yɛ ɔɔ sa se̱ŋsa gywii mo̱‑ɔ a tɔwe̱ fe̱yɛ, “Ba so̱so̱ mfe̱e̱, na ŋ kaapo̱ fo̱ ke̱tɔ ne̱ ke̱ e̱ ba a ke̱ bo̱ ba‑ɔ.”
2 Puri amo̱‑rɔ ne̱ Wuribware̱ a kufwiiŋe‑o a ywe̱e̱ mo̱ se̱ nya mo̱ se̱ ke̱yaale̱ŋ. So̱so̱ mfe̱ŋ ne̱ mo̱ a ŋu kuwuregya ko̱ na ɔko̱ te si.
3 Mò̱ akatɔ‑rɔ e̱ to̱re̱ se̱ ne̱e̱ fe̱yɛ kibu pipee‑o. Mo̱ a de̱e̱re̱ kuwuregya‑ɔ, ne̱ mo̱ a ŋu nyiŋkpe̱ŋtaliilii ne̱ o du fe̱yɛ kibu bo̱bwɛɛ‑ɔ a kyaŋ muruwaa ke̱mo̱.
4 Muruwaa kuwuregya‑ɔ, ne̱ mo̱ a ŋu ŋwuregya adunyɔ na ana, ne̱ abre̱sɛ adunyɔ na ana te mmo̱ se̱, ne̱ bo̱ buŋ atɔ fufuri na atanne̱ pipee awurepa‑ɔ.
5 Ne̱ e̱lɛɛlɛɛ me̱lɛɛ me̱lɛɛ na e̱fɛɛfɛɛ gburi gburi gburi a le̱e̱ kuwuregya amo̱ ase̱ ii su. Ne̱ ifetiri isunoo ne̱ baa kyaŋŋe̱ se̱‑ɔ ye̱re̱ kuwuregya‑ɔ akatɔ‑rɔ e̱ ye̱re̱ bo̱ sa Wuribware̱ a kufwiiŋe a akatɔ asunoo‑o.
6 Kuwuregya‑ɔ akatɔ‑rɔ ke̱tɔ dabe̱ ko̱ da ne̱ ke̱ e̱ to̱re̱ se̱ fe̱yɛ diki‑o, ne̱ ke̱ be̱e̱ ku du fe̱yɛ ɔpo̱o̱ ne̱ ɔ da diŋŋ‑o.
Muruwaa kuwuregya‑ɔ, mbo̱ nna ko̱ bo̱‑rɔ, ne̱ bo̱ maa kuwuregya‑ɔ, ne̱ akatɔ te te bamo̱ ŋyo̱wɔre̱ se̱ pɛɛɛ.
7 Mbo̱‑ɔ‑rɔ ɔgye̱ŋkpɛɛpo̱ du ne̱e̱ fe̱yɛ ɔfaasɛ‑ɔ, ɔnyɔse̱po̱‑ɔ du ne̱e̱ fe̱yɛ kpe̱ŋnyare̱‑ɔ, ɔsase̱po̱‑ɔ akatɔ‑rɔ du ne̱e̱ fe̱yɛ nyiŋkpasɛ lee‑o, ne̱ ɔnase̱po̱‑ɔ du fe̱yɛ oluŋ dabe̱ ne̱ ɔ brawe̱ abaŋbaŋ‑nɔ fe̱yɛ mò̱ a fuwi‑o.
8 Mbo̱ nna mɔ ɔke̱maa de abaŋbaŋ asiye, ne̱ akatɔ te te amo̱ kame‑ro na amo̱ kamɛɛ. Mpase̱ na kanye pɛɛɛ bo̱ maa se̱ ba waa iliŋ fe̱yɛ,
“Bo̱-e̱le̱ŋ‑ɔ‑kyo̱ŋ‑ɔke̱maa-Bware̱!
Bɔye̱ ko̱ mo̱ŋ te mò̱ se̱ ooo!
Bɔye̱ ko̱ mo̱ŋ te mò̱ se̱ ooo!
Bɔye̱ ko̱ mo̱ŋ te mò̱ se̱ eee!
Fo̱ e̱ gye̱ ne̱ fo̱ mo̱ŋ de ke̱le̱e̱kaase̱,
ne̱ fo̱ saŋ fo̱ te, ne̱ fo̱ mo̱ŋ de kɛɛ.”
9-10 Mbo̱ mɔ de bo̱nyaa na aŋsɛ ke̱sa iliŋ ko̱waa bo̱ kyo̱rɔ mò̱ ne̱ o te kuwuregya‑ɔ se̱, ne̱ mò̱ kakye̱na mo̱ŋ de kɛɛ‑ɔ. Saŋ ke̱maa ne̱ ba waa ane̱ŋ‑ɔ, abre̱sɛ adunyɔ na ana‑ɔ i kpuni aŋurii a bo̱ suŋ mò̱ ne̱ o te kuwuregya‑ɔ se̱, ne̱ mò̱ kakye̱na mo̱ŋ de kɛɛ‑ɔ. Ba buŋŋi bamo̱ awurepa ne̱e̱ bo̱ be̱ya kuwuregya‑ɔ akatɔ‑rɔ, na bo̱ tɔwe̱ fe̱yɛ,
11 “Ane̱ nyaŋpe̱ Wuribware̱, fo̱ a fo̱ fe̱yɛ
fo̱ nya ke̱dabe̱ na ke̱nyare̱ na ke̱yaale̱ŋ,
a le̱e̱ fe̱yɛ fo̱ ya twe̱e̱ ke̱tɔ ke̱maa,
na fo̱ ke̱pre̱ se̱ ne̱ amo̱ pɛɛɛ a ba, ne̱ a bo̱‑rɔ.”