4
Vawuli va udesi
1 Mfuki wa Chapanga akudeta lipala hela kucha chipindi cha mwishu vamonga davawudangili kutali ujumilwa, davasipikani fuki jangi na kukamula ng'ulilu ya finyamkela.
2 Ng'ulilu ayi yikukwishiwa na vandu vajangi yivavelili vafyangu na natilu shawu siyanangika kucha chindu chilungulili na motu.
3 Vandu ava vakuwula kucha ndi livifyu kuheta na wuwula wula kulya filivi fiwutunga. Lakini Chapanga afilumbili filivi afi ili vala yivavelili vajumila na vala yivavelili vamjumila Chapanga na kuumanya unakaka, vafigoleli kwa kulumba.
4 Kila chindu Chapanga cha chilumbili chinofu, kwahela cha kuchilema, leki chikuyangiwa kwa kulumba,
5 kwanongwa chilongu cha Chapanga na dadavu yikuchigola chindu achi chijumiliwi na Chapanga.
Ndumindumi msangi wa Yesu Kilistu.
6 Leki pawuvapa vandu vosi yivamjumilili Chapanga layilayi asi, dawuvi ndumindumi msangi wa Yesu Kilistu, pawidindasha chindima kwa filongu fya ujumilwa na ng'ulilu sha nakaka sila yuwi siwusikombikesha.
7 Lakini wusileki himusi singajila kuva sha Chapanga na sha chipufi. Wiwuli kwikala ngalilu yimunowesha Chapanga.
8 Kwikimbanisha njimba yina fwayida yaki, lakini kwikala kwa kumunowesha Chapanga ndi nyanyi munu, nongwa yikutujanga unofu mungalilu ya ponopa na wuwula wula ngalilu ya pambeli.
9 Detelu ayi ndi ya nakaka na yikudayiliwa kujumiliwa nakamu.
10 Yufwi tukukimbanika na kugola chichuku munu, nongwa tukumshuvilila Chapanga yaveli mnofu na mlowola wa vandu vosi, chamunu vala yivajumila.
11 Wuvagayili nayililu asi na ng'ulilu asi.
12 Ukotoo kujumila mundu yoyonda akubedali nongwa yuwi chijana, ila wuvi kimbaniki kuva chilangushilu kwa vala yivamjumila Chapanga, kwa detelu yaku na ngalilu yaku na utami waku na ujumilwa waku na ngalilu yimunowesha Chapanga.
13 Majuva vosi yendileli kusomela vandu Mayandiku Vang'alili pawelu na kulandula na kuwula, mbaka panyisa.
14 Ukotoo kuleka kuchigolela chichuku yila fupu ya Kilistu mugati yaku yiwugayiliwili na vambuyi va Chapanga na kwa kuvikiwa mawoku na vavaha.
15 Wiholi munu kwa fyonda afi na kugola ili vandu vonda valoli ndambu chichuku chaku wuchiyongisheka.
16 Loli munu findu fyaku umweni na ng'ulilu yaku. Yendileli kugola afi, nongwa pawugola naha, dawilowoli umweni na vala yivakupikanisha.