2
Waare Yéesú-Kiristaa fa daaƴu kurwaha ra
1 Koy-yaayyi ƴeh, húmú ayaꞌ mi soꞌ mi bee ginon teeɓi ron yee húmú níɓ Koope te ow húmú yéeh rí rë, mi teeɓaay biti daa mi lukki mín won mbée daa mi lukki lah ham-ham,
2 ndah húmú homaꞌ mi ɗon na ra, mi caŋ biti mii won yin kay gét nëe yii leŋke sun fi Yéesú-Kiristaa, ɗi fa daaƴu kurwaha ra.
3 Húmú homaꞌ mi leeloon ɗa soꞌ mi lahay doole, soꞌ mi neeh neeho níi maa saak.
4 Ɗee na húmú yëeddëꞌ mí a ɗee na húmú waariyaꞌ mi ra húmú tíkëey ham-ham ow, tíkëey neɓ won, doolii Ruuh-Peseŋ daa na húmú teeɓ ɓëewë biti iña won mi ra kaah.
5 Ɗon ot mi henaꞌ ri ɗaaha, nda ngémën ɓanti tíkëh sun ham-ham ow, ɗi tíkëh sun fi doolii Koope.
Ham-hami Koope
6 Añcaŋ, koy-yaayya maanu ngémë rë fun yëeddúu wë ham-ham. Ham-hama na yëeddú fun wa ra, ham-hami ëldúnë fi bee neh, bi kolaꞌ kélfë yë feey fi bee neh, kélfë yë fí yúhté biti suu húlé húlë rë.
7 Fun hom yëeddúu ham-hama húmú níɓ Koope ɗappe ri te ow húmú yéeh rí rë, bee maañ ɗii yen waaƴiɗ balaa ɗi sak ëldúnë, nda yen lah ndam ra.
8 Ow yínë sah di kélfë yë feey fi bee yéeh ham-hami baaha. Wa yúh rí koon, wa ii daaƴ Yíkëe fa lah ndam ra sun fi kurwaha.
9-10 Fun fi ƴee nék, Koope ñeete Ruuh-Peseŋ na teeɓpe fun yee bíníyú Téerëe bee ra bitih :
« Yii ow yínë sah mësëy ríi tík íl,
yii ow mësëy ríi keloh,
yii ow mësëy ríi níɓ,
yii Koope waaƴiɗte ri ɓëewë fahuu ri ra. »
Nagajek, Ruuha daa na saam níi ot ɓéeɓ, níi lukaꞌ iña níɓ Koope tal nufi ra.
11 Daa yúh yee hom af ow ra ? Yee hom af ow ra ɓëeꞌ daa yúh rí nufi neh a ? Ti ɗaaha nen, ow yéeh yee hom nuf Koope ra, Ruuhi ɗi fi Koope daa yúh yee hom nufa ra.
12 Fun nék, fun liiluy nufi kolaꞌ feey fi beh ; fun liilu Ruuha kolaꞌ Koope na ra, nda fun yúh malla on yen Koope ra.
13 Unna na wonu fun di yii leŋke malli ƴaa ra kolaay ham-ham ow, wa kolaꞌ Ruuh-Peseŋ na. Ɗaaha, fun ƴahti poysiriɗ ɓëewë iña kolaꞌ Ruuh-Peseŋ na raa, fun ñeeꞌuu unna kolaꞌ Ruuhi baaha na ra.
14 Ɓëyí fí níɓëꞌ iñi ëldúnë, na taheh yii kolaꞌ Ruuhi Koope na. Iñƴaaha homaꞌ yin dof ɗii na ; ɗi mínéh nëe keloh, ndah yii baa míntí ɓíssúun a Ruuha.
15 Ɓëyí fí yéŋké biti Ruuh-Peseŋ aa ɗii na mín ɓíssëꞌ ɓéeɓ, ndaa ow kay mínéh ɓíssëꞌ iñi ɓëyí baaha.
16 Nagajek bíníyúté Téerëe bitih :
« Daa yúh nuf Yíkëe ?
Daa mín ɗíi ɓaat nuf ? »
Yen nék, nufa lah Kiristaa ra yen lahuu ri.