6
1 Fun légéyúu a Koope raa kay, fun ɗagu ron yii beh : pëgí ɓéeɓ níi mala lahuu ron ɗa ɓanti sooƴ teem ɗaaha,
2 ndah ɗi won filiɓ Téerëe tih :
« Lahaꞌ wahtaa ra,
mi síkírëhté ɗaŋŋu.
Lahaꞌ wahtu múc ɗë,
mi hílíppé rë. »
Ëlsíi ! Leegi wahtaa lahte ! Ëlsíi ! Wahtu múc lahte leegi !
3 Fun fahuuy biti ow won yin sun fi légéyí fun, daa tah fun kaaꞌ paŋ dara di yii mín ɗíi hen, bi ay kabine ow.
4 Fun kay, yii ƴah fun paŋ ɓéeɓ, fun hom teeɓuu ɗee madu fun, fun fa súrgë yí Koope ra. Fun homun coono, fun homun kofeel, wuti keeññi fun ɗúm rëe sah, fun múñ rí.
5 Fun ñeyute hap, fun téƴúté, ɓëewë na yejuu fun, fun tíkúté légéyí misikke, fun oluy pëní, fun oluy ñam te ƴaa ɓéeɓ fun mújúté wë.
6 Fun hom teeɓuu biti fun légéyírú Koope di pagaɗɗi lanni fun, di yee yúhú fun Koope na ra, di iña na mújú fun ɗa, di naaꞌi keeññi fun, di yee na paŋ Ruuh-Peseŋ fun na ra, di ɗee fahuu fun ow keeññi fun ra,
7 di kaaf ka na wonu fun ɗa, di doolaa on fun Koope ra, a di iñi júɓɓë na pagu fun ti ganaay yaꞌ yi fun nen ra.
8 Ɓëewí ƴee kañe fun raa, lah ƴi fëelíyíih fun ; ƴee sole fun ɗaa, ƴee laase fun. Ɓëewë habuu fun feloh, te añcaŋ yii hente paɗɗah íníh fun na ;
9 wa habuu fun ɓëewí ow yéeh wë, te añcaŋ ɓëewë yúhúté fun níi yúh ; wa habuu fun ɓëewí húlúté, te añcaŋ fun ee pesu ra ee ; wa habuu fun ɓëewí paguu yin ɓos moklute, ndaa fun hawuy húl ;
10 wa habuu fun ɓëewí keeññi wa neɓay, te faraah keeññi fun ee sos ɗa ; wa habuu biti fun lahuy yin, ndaa fun ee ɓaatu ow caak alal ra ; wa habuu biti fun lahuy dara, ndaa fun lahute ɓéeɓ.
11 Ɗon fi koy-yaayya dékú Korente ra, fun kúnsírúté ron keeññi fun, fun wonute ron filiɓ fi fun a fëel fí fun ɓéeɓ.
12 Fun kaaꞌuuy fahaꞌi ron, ɗon kay ɗon daa téƴúu fun na.
13 Kon mi won ɗon na ti ɓëyí won a koyyi nen : Kúnsëhë kúnsúu fun ɗon na ra, kúnsí keeññon ɗaaha fun na !
Gém Koope a yin kay ñéerëey
14 Ngënë hëelsíi a ɓëewí gémúy Yéesú, ɗoni wa míníh ñéerëꞌ ! Yii júɓpé a yii taway dara a Koope míníh ñéerëꞌ ! Niiñ mínëꞌ bok a ñúus ílíƴ ɗíh ?
15 Kiristaa ay mínée a Seytaane ɗíh ? Mbée ɓëyí gémpé a ɓëyí gémëy ay mínée bok yih ?
16 Faam Koope a yúullë taaꞌuu yih ? Yen daa faam Koope fa na pes ɗa, ti di wonaꞌ ri ɗi fi baa nen ! Ɗi won tih :
« May déké a wa, funi wa nay ñéerée ;
daa mi ac Koope fi wa, wa hen ɓëewí sëꞌ. »
17 Yii baa daa tah Koo-Yíkëe won bitih :
« Këlíi leelii ɓëewí ɓossa,
ɗon wuloh wa,
ɗon ɓanti leɓ dara yii sobete,
may ron tahaꞌ a yaꞌ ana. »
18 Koo-Yíkëe fë mín ɓéeɓ rë wonilte bitih :
« May hen baap ɗon na,
ɗon hen koy soo na. »